Гъэсэныгъэ гупчэу «Полярис-Адыгеяр» кIэщакIо зыфэхъугъэ яблэнэрэ Гъэмэфэ спорт еджапIэм иIофшIэн зэфэхьысыжьхэр фашIыгъэх. Адыгэ къэралыгъо университетым изыгъэпсэфыпIэу «Горная легенда» зыфиIорэм Iофтхьабзэр щырагъэкIокIыгъ.
Мэкъуогъум и 2-м къыщегъэжьагъэу и 22-м нэс кушъхьэфэчъэ спорт еджапIэм, Мыекъопэ спорт еджапIэхэу С. М. Джэнчатэм ыкIи В.С. Максимовым ацIэ зыхьыхэрэм защызыгъасэхэрэм заушэтын амал яIагъ.
Ящэнэрэ илъэс хъугъэу лазертагым пыщэгъэ ныбжьыкIэхэри Iофтхьабзэм къыхэлажьэх. Тхьамэфищыр псынкIэу кIуагъэ, а уахътэм кIалэхэр ыкIи пшъашъэхэр еджагъэх, спорт ухьазырыныгъэу аIэкIэлъыр къагъэлъэгъуагъ. Джащ фэдэу мастер-классхэр, творческэ зэнэкъокъухэр, спартакиадэхэр, викторинэхэр, нэмыкIхэр афызэхащагъэх. Ащ дакIоу дэкIыгъохэр яIагъэх, чIыпIэ дахэхэр зэ-рагъэлъэгъугъэх. Мы мафэхэр шIукIэ агу къинэжьынхэм зэхэщакIохэм анаIэ тырагъэтыгъ.Зэфэхьысыжьэу ашIыгъэхэмкIэ, анахь дэгъоу зыкъэзыгъэлъэгъуагъэхэм щытхъу тхылъхэр ыкIи шIухьафтынхэр, еджапIэм къекIолIагъэхэм зэкIэми сертификатхэр афагъэшъошагъэх.