АР-м хэдзынхэмкIэ и Гупчэ комиссие я 75-рэ зэхэсыгъо иIагъ. Къэблэгъэрэ хэдзынхэр зэрэрекIокIыщтхэм ащ щытегущыIагъэх. Мы кампанием имэфэ шъхьаIэхэр къыдэзылъытэрэ мэфэпчъыр агъэнэфагъ, хэдзакIохэм яIэпэкIадзэхэр кандидатхэм къызэраугъоищт шапхъэхэр, хэдзынхэм апэIухьащт мылъкум икъэкIуапIэхэр агъэнэфагъэх.
Зэхэсыгъор зезыщагъэр АР-м хэдзынхэмкIэ и Гупчэ комиссие итхьаматэу Сэмэгу Нурбый. АР-м и Къэралыгъо Совет — Хасэм идепутатхэм яхэдзынхэр 2026-рэ илъэсым Iоныгъом и 20-м зэрэрагъэкIокIыщтым фэгъэхьыгъэ унашъор Адыгеим и Парламент зэрэщаштагъэр ащ къыIуагъ. УФ-м и Къэралыгъо Думэ идепутатхэм яхэдзынхэр зыщыкIощт мафэм ар тефэ. Федеральнэ хэдзын кампанием диштэу шъолъыр парламентым идепутатхэм яхэдзынхэри мэфищрэ кIощт.АР-м хэдзынхэмкIэ и Гупчэ комиссие исекретарэу ХьацIэцIэ Фатимэ къызэриIуагъэмкIэ, мэкъуогъум и 18-м къыщыублагъэу бэдзэогъум и 17-м нэс мэфэ 30-у къыдафэрэм хэдзэкIо зэхахьэхэм зэхащэщт конференциехэм зы мандат зиIэ хэдзэкIо коимкIэ кандидатхэр къагъэлъэгъонхэ ыкIи зыкI хэдзэкIо коимкIэ кандидатхэм яспискэхэр къатынхэ алъэкIыщт. А охътэ дэдэм къыхиубытэу УФ-м ицIыфхэу хэдзынхэм ахэлэжьэнхэмкIэ фитыныгъэхэр зиIэхэм ежь-ежьырэу зыкъагъэлъэгъон алъэкIыщт. ЗыцIэ къетIогъэ кандидатхэм яспискэхэр АР-м хэдзынхэмкIэ и Гупчэ комиссие бэдзэогъум и 18-м пчыхьэм сыхьатыр хым блэмыкIэу къырахьылIэнхэ фае.Бэдзэогъум и 23-м блэмыкIэу зы мандат зиIэ хэдзэкIо коимкIэ хэдзэкIо зэхахьэхэм къагъэлъэгъогъэ кандидатхэу хэдзынхэмкIэ Гупчэ комиссием щатхыгъэхэм зыкъагъэлъэгъоным пае ятхылъхэр ащ къырахьылIэнхэ фае.Бэдзэогъум и 6-м къыщыублагъэу шышъхьэIум и 5-м нэс кандидатхэмрэ хэдзэкIо зэхахьэхэм яуполномоченнэ лIыкIохэмрэ зарагъэтхыным пае ятхылъхэр къырахьылIэщтых. ШышъхьэIум и 14-м нэс ахэм АР-м хэдзынхэмкIэ и Гупчэ комиссие ахэплъэщт. ШышъхьэIум и 20-м блэмыкIэу кандидатхэм республикэм икъэбарлъыгъэIэс амалхэм эфир уахътэу ащагъэфедэн ыкIи материал хэутыгъэу къарахьылIэн алъэкIыщтхэр пхъэдзыкIэ агъэнэфэщтых. ШышъхьэIум и 22-м къыщыублагъэу хэдзынхэр къызщихьащт мафэм нэс агитацием иуахътэ кIощт. Джащ фэдэу Iоныгъом и 9-м блэмыкIэу политическэ партиехэм япрограммэхэр республикэм икъэбарлъыгъэIэс амалхэм къыхаутынхэ ыкIи интернетым къырагъэхьанхэ фае. Ежь мэкъэтыныр Iоныгъом и 18-м, и 19-м ыкIи и 20-м пчэдыжьым сыхьатыр 8-м къыщыублагъэу пчыхьэм сыхьатыр им нэс рекIокIыщт. Iоныгъом и 20-м хэдзыпIэ чIыпIэхэр зызэфашIыжьыхэкIэ хэдзэкIо комиссиехэм зэфэхьысыжьхэр ашIыщтых.УФ-м и Къэралыгъо Думэ ыкIи АР-м и Къэралыгъо Совет — Хасэм ядепутатхэм яхэдзынхэм анэмыкIэу Iоныгъом и 20-м къоджэ койхэм ясоветхэм янароднэ депутатхэри хадзыщтых. Джащ фэдэу Сергиевскэ, Дондуковскэ, Белосельскэ, Большесидоровскэ, Еленовскэ, Красногвардейскэ, Садовэ, Улэпэ, Хьатикъое, Аскъэлэе къоджэ койхэм мыщ фэдэ хэдзынхэр ащыкIощтых. Муниципальнэ образованиехэм ялIыкIо къулыкъухэм ядепутатхэр Очэпщые, Гъобэкъое, Пэнэжьыкъое, ПчыхьалIыкъое, Лъэустэнхьэблэ койхэм ащахадзыщтых.