ЗыкI къэралыгъо ушэтынхэм балли 100 къащызыхьыгъэ кIэлэеджакIохэм япчъагъэ хэхъуагъ. Ахэм афэгушIуагъ республикэм ипащэ.
«Гуетыныгъэшхо ахэлъэу, пшъэрылъ гъэнэфагъэ зыфэзгъэуцужьызэ еджэгъэ ныбжьыкIэхэу мыщ фэдэ гъэхъагъэ зышIыгъэхэм сафэгушIо. Къыхахыщт сэнэхьатым фэкIонхэмкIэ ар лъэбэкъушхо хъугъэ. КIэлэегъаджэхэми, ны-тыхэми рэзэныгъэ гущыIэхэр афэзгъазэ сшIоигъу. ЗыкI къэралыгъо ушэтынхэм апхырыкIыгъэу джы нэбгырибгъу тиI. Ащ тырэгушхо» — социальнэ нэкIубгъохэм кIэлэеджакIохэм щафэгушIуагъ АР-м и ЛIышъхьэу КъумпIыл Мурат.ХьисапымкIэ балли 100 ригъэкъугъ Мыекъопэ гимназиеу N 22-м щеджэгъэ Глеб Стеблиным. Ятфэнэрэ классым исыгъ ар хьисапым фэщагъэ зэхъум. Нэужым естественнэ-хьисап республикэ еджапIэм ишIэныгъэхэм ащыхигъэхъуагъ. ГъэцэкIэн къинхэр ышIынхэр сыдигъокIи шIогъэшIэгъон. Ащ ишIуагъэкIэ, шъолъыр, къэралыгъо олимпиадэхэм текIоныгъэхэр къащихьыгъ.Мыщ фэдэ гъэхъагъэ иI Дарья Кроль. Мыекъопэ гурыт еджапIэу N 17-м ар щеджагъ. «Хьисапыр дэгъоу пшIэнэу уфаемэ, щэIагъэ пхэлъэу укIэрысыщт. Уздэмылэжьэжьэу шIэныгъэ куу хэти пшъхьэ къырилъхьащтэп» — еIо Дарье.УрысыбзэмкIэ баллишъэ къэзыхьыгъэ Элина Курочкинами мыщ фэдэ гупшысэхэр иI. Мыекъопэ гимназиеу N 22-м ар къычIэкIыгъ. Тхылъым еджэным пшъашъэр сыдигъуи фэщагъ. «Урысыбзэм идэхагъэ нэкIубгъо пэпчъ щысэлъэгъу», — еIо Элинэ. Ар дэзылъэгъугъэ кIэлэегъаджэхэми ныбжьыкIэм дырагъэштагъ. ЕджапIэм чIэсыфэкIэ ушэтын зэфэшъхьафхэм гъэхъагъэхэр ащишIынхэмкIэ ахэр иIэпыIэгъугъэх.КIэлэегъаджэхэм афэраз Олег Черносмаги. КIалэм Мыекъопэ гурыт еджапIэу N 17-р къыухыгъ. Илъэс 11 зикIыхьэгъэ еджэн гъогум ар чанэу рыкIуагъ. Союз къэралыгъохэу Урысыемрэ Беларусьрэ якIэлэеджакIохэм я Олимпиадэ анахь дэгъухэм ясатырэ хэфагъ, сэнаущыгъэшхо зыхэлъ ныбжьыкIэхэм IэпыIэгъу афэхъуным фытегъэпсыхьэгъэ республикэ шIухьафтыным илауреат, олимпиадэ пчъагъэхэм хагъэунэфыкIырэ чIыпIэхэр ащиубытыгъ. ЗыкI къэралыгъо ушэтыным балли 100 къызэрэщихьыгъэр мыщ фэдэ еджакIэм изэфэхьысыжь хъугъэ.Къэнэгъэ предметхэмкIэ ушэтынхэм зэфэхьысыжьэу афэхъугъэхэр мы мафэхэм къэнэфэщтых.