Кощхьэблэ район администрациер
Республикэм ичIыгулэжьхэр игъэкIотыгъэу Iоныгъом ыуж итых. АР-м мэкъу-мэщымкIэ и Министерствэ къызэритырэмкIэ, мы мафэхэм яхъулIэу бжыхьэсэ хьэр гектар 600-м кIахьэу Iуахыжьыгъах.
Кощхьэблэ районымкIэ Iоныгъор апэрэу зыублагъэхэм ащыщ хъызмэтшIапIэу «ЕмыкI» зыфиIорэр. ПстэумкIи бжыхьэсэ хьэ лъэпкъэу «Саня» зыцIэр гектар 20-м щилэжьыгъ. Непэрэ мафэу ехъулIэу гектар 16-м ехъур Iуихыжьыгъах. Зы гектарым гурытымкIэ лэжьыгъэ центнер 45-рэ къырехыжьы.Шъыпкъэ, нахьыбэ къырахыжьынэу хъызмэтшIапIэм ибысымэу ЕмыкI Ахьмэд щыгугъыгъ, ау мыгъэрэ ом изытет лэжьыгъацэхэм ягоуагъ. Пэрыохъухэр иIагъэх нахь мышIэми, бжыхьасэхэм игъом ящыкIэгъэ чIыгъэшIухэр арихьылIагъэх, узхэм, уцыжъхэм ащиухъумагъэх.Iоныгъом хэлэжьэрэ техникэр бэджэндэу ыштагъ. Комбайным тесыр хынэкIо Iазэу КIэрэщэ Ерстэм, коцыр кIэзыщырэр — Борэй Аслъан.
Красногвардейскэ районымкIэ бжыхьэсэ хьэм иIухыжьын апэрэу езыгъэжьагъэр Чыназыр Эдуард имэкъумэщ хъызмэтшIапI. Гектар 70-м нахьыбэ ыIожьыгъах, ащи гурытымкIэ центнер 45-рэ къырехыжьы.ЧIыгулэжьхэм мэфэ ошIухэр къызыфагъэфедэхэзэ Iоф ашIэщт. Бжыхьэсэ хьэм ыуж коцым иIожьын аублэщт.Анцокъо Ирин.