Терроризмэм пэшIуекIогъэнымкIэ Комиссиемрэ Оперативнэ штабымрэ язэхэсыгъоу Адыгеим и Правительствэ зычIэт унэм щыкIуагъэм республикэм и ЛIышъхьэу КъумпIыл Мурат тхьамэтагъор щызэрихьагъ.
ЗэIукIэм хэлэжьагъэхэр Урысыем и Къэралыгъо Думэрэ Адыгеим и Къэралыгъо Совет – Хасэмрэ яхэдзынхэр щынэгъончъэу зэхэщэгъэнхэм, террористическэ актхэр зэрамыхьанхэм пае псэуалъэхэр нахь лъэшэу ухъумэгъэнхэмкIэ амал тедзэу зэрахьащтхэм атегущыIагъэх.Зэхэсыгъом хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, нэмыкI къулыкъухэм япащэхэр.КъумпIыл Мурат зэрэхигъэунэфыкIыгъэмкIэ, УФ-м и Къэралыгъо Думэ идепутатхэм, АР-м и Къэралыгъо Совет – Хасэм идепутатхэм яхэдзынхэр, джащ фэдэу чIыпIэ зыгъэIорышIэжьынымкIэ къулыкъухэм яхэдзын тегъэпсыхьэгъэ Iофтхьэбзэ 15 Адыгеим щыкIощт. АР-м и Къэралыгъо Совет – Хасэм идепутат мандат 50-у нэкI хъугъэр, республикэм имуниципальнэ образованиехэм ямандати 166-у нэкI хъугъэхэр нэмыкI кандидатхэм аратыжьыщтых.«Гъогу, транспорт, промышленнэ, энергетическэ инфраструктурэм ипсэуалъэхэр, хэдзакIохэм амакъэ зыщатыщт чIыпIэхэр икъоу къызэлъаплъыхьан ыкIи зэтырагъэпсыхьан фае. Ахэм видеохэр ащагъэфедэн, мэкъэтынымкIэ мобильнэ пункт лыехэр щыIэнхэ, къэбарлъыгъэIэс амалхэм, Интернетым гъунэ алъыфыгъэн, терроризмэм пэшIуекIорэ амалхэр зэкIэ зехьэгъэнхэ фае», — къыIуагъ ЛIышъхьэм.Адыгеим хэдзынхэм зызэрафигъэхьазырырэм фэгъэхьыгъэу къулыкъу зэфэшъхьафхэм япащэхэр къэгущыIагъэх.Зэхэсыгъом зэрэщыхагъэунэфыкIыгъэмкIэ, цIыфхэм амакъэ Адыгеим зыщатыщт мафэхэм хэдзынхэмкIэ чIыпIэ комиссии 9-мэ, участкэ 265-мэ Iоф ашIэщт. Республикэм ис нэбгырэ мин 340-м ехъумэ хэдзынхэм ахэлэжьэнхэу фитыныгъэ яI.«Iофхэм язытет икъоу зэхэфыгъэн фае. Къулыкъу пстэуми зэдырагъаштэу Iоф зэдашIэ зыхъукIэ ары цIыфхэм щынэгъончъагъэ яIэн, зыпкъитыныгъэр къаухъумэн залъэкIыщтыр. ЗэщыгъэкъокIо кIуачIэхэм ныбжьыкIэхэм лые арамыхыным лъэшэу гъунэ лъыфыгъэн фае», — къыIуагъ КъумпIыл Мурат.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.