Адыгеир урысые Iофтхьабзэм хэлэжьагъ

Хэгъэгу зэошхор къызежьагъэр илъэс 85-рэ зыщыхъурэм ехъулIэу «ШIэжьым ишэф остыгъ» зыфиIорэ Iофтхьабзэр заом хэкIодагъэхэм афэгъэхьыгъэ зэхэт саугъэтэу Мыекъуапэ дэтым дэжь щызэхащагъ.

Ащ икIэщакIох Урысые общественнэ движениеу «ТекIоныгъэм игуфакIохэр» зыфиIорэр, партиеу «Единэ Россиер», ныбжьыкIэхэм яIофхэмкIэ республикэ Комитетыр, Мыекъуапэ иадминистрацие. Iофтхьабзэм хэлэжьагъэх общественнэ IофышIэхэр, юнармейцэхэр, республикэм иныбжьыкIэ организациехэм ялIыкIохэр.Ар рамыгъажьэзэ, Адыгеим и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуард къэзэрэугъоигъэхэм закъыфигъэзагъ. Ащ зэрэхигъэунэфыкIыгъэмкIэ, тарихъ шIэжьыр къэухъумэгъэныр зятэжъ пIашъэхэр Хэгъэгу зэошхом хэлэжьэгъэ нэбгырэ пэпчъ ипшъэрылъ лъапIэу щыт.

— Зэо илъэс къинхэм цIыфхэм хьэзабэу ащэчыгъэр, ТекIоныгъэр къытфэзыгъэблэгъагъэхэм ацIэхэр егъашIи тщыгъупшэщтхэп. Тятэжъхэмрэ тятэжъ пIашъэхэмрэ сыд фэдэрэ къини къыгъэуцугъэхэп, нэмыц фашист техакIохэм псэемыблэжьэу апэуцужьыгъэх. Хэ­ушъхьафыкIыгъэ дзэ операцием хэлэжьэрэ дзэкIолIхэми лIыхъужъныгъэ зэрахьэзэ, Хэгъэгум ифедэхэр непэ къагъунэ. ТекIоныгъэ къыдахынышъ, ядэжь къагъэзэжьынэу ахэм тяжэ. Тишъхьафитыныгъэ къытфэзыухъумэрэ дзэкIолIхэм егъэшIэрэ щытхъур къа­лэжьыгъ! – къы­Iуагъ Цэй Эдуард.Хэгъэгу зэошхом илъэхъан фэхыгъэ­хэр агу къагъэкIыжьхэзэ, Iофтхьабзэм хэлэжьагъэхэм шэф остыгъишъэ пчъагъэ зэхагъэнагъ. Движениеу «Юнармием» хэтхэм саугъэтым къэгъэгъэ блэрхэр кIэлъыралъхьагъэх. Iофтхьабзэр концерт-реквиемкIэ аухыгъ, Мыекъуапэ итворческэ купхэм ахэтхэм зэо илъэс­хэм афэгъэхьыгъэ орэдхэр къаIуагъэх.