ДзюдомкIэ Урысыем и Кубок икъыдэхын фэгъэхьыгъэ зэнэкъокъухэр Республикэу Тыва щыкIуагъэх. ЗэкIэмкIи спортсмени 180-мэ заушэтыгъ.
Къыблэ федеральнэ шъолъырым икомандэ Адыгэ Республикэм илIыкIуитф хэтыгъ. Ау зы нэбгыр ныIэп хагъэунэфыкIырэ чIыпIэ къыдэзыхын зылъэкIыгъэр. Килограмм 60-нэс къэзыщэчыхэрэм якуп хэтыгъэ Мерэм Дамир ухьазырыныгъэ дэгъу къыгъэлъэгъуагъ, къытефэу джэрз медаль къыфагъэшъошагъ. Къэбэртэе-Бэлъкъарым щыщ Нэгъой Темири ящэнэрэ чIыпIэр къыдихыгъ. Мы купым зыщызыушэтыгъэ Тюменскэ хэкум щыщ Шамсутдин Умаевыр ятIонэр, турнирым ибысымэу Кан-Демир Суге-Маадыр чемпион хъугъэ.Адыгеим идзюдоистхэу Еутых Рэмэзанрэ Бэгъ Аслъанрэ ятфэнэрэ чIыпIэр къыдахыгъ, Дэхъужь Алый яблэнэрэ хъугъэ.