ЩыIэныгъэр къызщежьэрэ чIыпI

Псауныгъэм икъэухъумэнкIэ, демографием ылъэныкъокIэ Iофхэм язытет нахьышIу шIыгъэнымкIэ Мыекъопэ къэлэ сымэджэщым и Перинатальнэ гупчэ мэхьанэшхо иI. Лъэпкъ проектэу «Унагъом» къыдыхэлъытэгъэ шъолъыр проектэу «Ныгъор ыкIи кIэлэцIыкIугъор къэухъумэгъэнхэр» зыфиIорэм ишIуагъэкIэ сомэ миллиони 176-рэ зыпэIухьэ­гъэ шэпхъэшIухэм адиштэрэ Iэмэ-псымакIэхэр гупчэм къы­фащэфыгъ. Къэбарыр къедгъэIотагъ Перинатальнэ гупчэм ипащэу МатIыжъ Жаннэ.

Мы гупчэм зэпымыоу гъэцэкIэжьынхэр рашIылIэх, ищыкIэгъэ пстэумкIи зэтырагъэпсыхьэ. ИлъэситфыкIэ узэ­кIэIэбэжьмэ, программэу «Псауныгъэр къэухъумэгъэныр» зыфиIорэм ыкIи рес­публикэ бюджетым яамалкIэ сомэ мил­лион 215-рэ фэдиз зытефэгъэ оборудованиякIэ гупчэм къыфащэфыгъ, сабыйхэр къызыщыхъухэрэм зэхъокIыныгъэшхохэр фашIыгъэх: ар зычIэт унэм я 5-рэ къат тырашIыхьагъ, унэ пчъагъэ къыпашIы­хьагъ. Квадрат метрэ 1121-кIэ ащ зи­ушъомбгъугъ. Сабый къэхъугъакIэхэм реанимациемкIэ ыкIи терапиемкIэ яотделение, пэсащэу къэхъурэ кIэлэцIыкIу­хэу дагъо зиIэхэм яотделение щыIэхэ хъугъэ. Ахэм анэмыкIэу Перинатальнэ гупчэм приемнэ отделение къыпашIы­хьагъ, сабый къызыфэхъугъэхэм защы­фэгушIощтхэ чIыпIэ шъхьафи агъэпсыгъ. ИкIыгъэ илъэсым сымэджэщым къыфатIупщыгъэ сомэ миллиони 176-мкIэ гупчэм оборудованиякIэ чIагъэуцуагъ, мэзэ заулэ хъугъэу ащ Iоф рашIэ, шIуа­гъэу пылъыр зэхашIагъ.

— Непэ Перинатальнэ гупчэр сабыир ным ышъо зыхэфагъэм къыщегъэ­жьагъэу ар къэхъуфэ нэс щынагъоу къэуцухэрэр дэгъэзыжьыгъэнхэмкIэ ама­лышIухэр зыIэкIэлъ джырэ медицинэ учреждениеу щыт, щыIэныгъэр къызще­жьэрэ чIыпI. ЗэкIэ ищыкIагъэмкIэ зэтегъэпсыхьагъ ыкIи шэпхъэшIухэм адиштэу медицинэ IэпыIэгъу аригъэгъотын елъэ­кIы. Зэпкъаджэ хъун зымылъэкIырэ бзылъфыгъэхэм шIокI зимыIэ медицинэ страхованием иполискIэ ЭКО-р афэтэшIы. Джащ фэдэу зипIалъэ къэмысэу къэхъугъэ сабыйхэу зионтэгъугъэ ма­кIэхэм узэряIэзэщт амалэу Урысыем щагъэфедэхэрэм такъыщинэрэп. Гъэ­нэфэгъэ шапхъэу сабыим ионтэгъугъэ грамм 500-м нахь мымакIэр реанимацием аштэ, грамм 450-рэ хъухэрэри ащ ащэхэу къыхэкIы ыкIи зыпкъ щырагъэуцожьых. Ар къыддэхъун тэзыгъэлъэкIыгъэр дгъотыгъэ оборудованиякIэр ары. Джырэ лъэхъаным диштэрэ кувейзхэр тиIэх. Ахэм яшIуагъэкIэ сабыир ным ыныбэ илъ амалхэм апэблагъэу тIыгъын­хэ тэлъэкIы. ИВЛ-аппаратэу тиIэхэр шъабэх, ахэм зэкIэ псауныгъэм ишап­хъэхэр къытыретхэх: ыгу къызэрэтеорэр, жьы къызэрищэрэр, нэмыкIхэри. Операцие зыщытшIырэ чIыпIэри зэтедгъэ­псыхьагъ, сабыир къэхъуфэ ныбэм илъэу изытет улъыплъэн олъэкIы, джащ фэдэу ным лъэу чIинэрэр гъэмэкIэ­гъэнымкIэ аппарат тиIэ хъугъэ, — хигъэунэфыкIыгъ МатIыжъ Жаннэ.

ТигущыIэгъу къызэрэхигъэщыгъэмкIэ, лъэбэкъушIоу ашIыгъэхэм къакIэкIуа­гъэр ыпэрэ илъэсхэм ябгъапшэмэ, сабый лIэныгъэр хэпшIыкIэу мы аужырэ илъэ­ситIум нахь макIэ хъугъэ. Ар пчъэгъэ къодыеу щытэп, нэбгырэ пэпчъ ищыIэны­гъэ лъэпкъым икъэкIощткIэ мэхьанэ иI.Перинатальнэ гупчэм гумэкIыгъоу иIэхэм ащыщыгъ мыщ Iоф щызышIэщт врачхэм зэращыкIэщтыгъэр. Гупчэм иврач шъхьаIэ ишIуагъэкIэ а Iофыгъори дэгъэзыжьыгъэ хъугъэ. Апшъэрэ еджапIэхэм ащеджэхэрэм МатIыжъ Жаннэ анаIэ атыридзэмэ, яIофшIэн шIуагъэу пылъыр къафиIуатэзэ, ныбжьыкIабэ къырищэлIэн ылъэкIыгъ. ИкIыгъэ илъэсым неонатологи 4 ыкIи бэмышIэу джыри зы стажер къаштагъэх.— Тигупчэ шэпхъэ лъагэхэм адиштэу зэтегъэпсыхьагъэ хъугъэ, ищыкIэгъэ оборудованиер, медицинэ IофышIэхэри икъоу тиI. Къэнэгъэ закъор врач ныбжьыкIэу къыIухьагъэхэр гъэсэнхэр ары. ЯсэнэхьаткIэ IэпэIэсэныгъэрэ шIэны­гъэрэ аIэкIэлъынэу зэрэщытыр зыми щигъэзыягъэп, ау ахэм акIыIу хъужьырэр цIыфыныгъэрэ гукIэгъурэ ахэлъыныр ары, — къыхигъэщыгъ МатIыжъ ­Жаннэ.IЭШЪЫНЭ Сусан.