Гъэсэныгъэ организациер республикэм игъэмэфэ зыгъэпсэфыгъо кампание чанэу хэлажьэ: кIэлэцIыкIу мини 2-м ехъу лекцие гъэшIэгъонхэм ядэIущтых, викторинэхэм ыкIи мастер-классхэм ахэлэжьэщтых. Обществэу «ШIэныгъэм» иIофтхьабзэхэр лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм ипшъэрылъхэм адештэх.
Мары мэфэ лагерэу «Дружные ребята» зыфиIоу Инэм дэт еджапIэу N 6-м къыщызэIуахыгъэм ихьэкIагъ Мыекъопэ къэралыгъо технологическэ университетым ипрофессорэу Алексей Морозовыр. Ащ кIэлакIэхэр гъэмэфэ хъугъэ-шIагъэхэм ахищагъэх, зекIо лъэс гъогухэм, Урысыем ичIыопс ибаиныгъэ зыфэдэм ащигъэгъозагъэх. Джащ фэдэу шIуагъэ къатэу зыгъэпсэфыгъо мазэхэр зэрагъэкIошъущтыр къафиIотагъ.— Гъэмафэм сабыим шъхьафитныгъэ къыреты. Шъхьафитныгъэр уушэтын ыкIи зэбгъэшIэн фае, ащ епхыгъэ упчIэхэм яджэуапхэри къэгъотыгъэнхэр типшъэрылъ. Мы уахътэм бэ кIэу плъэгъущтыр, бэ узлъыIэсыщтыр, географиер картэкIэ зэогъашIэмэ, лъэс гъогумэ уатетэу, щэтырыр бгъаIэзэ, дунаир фэшъхьафэу плъэгъушъущт. Мыщ дэжьым нахьыжъхэр Iофым къыхахьэхэмэ хъущт — зэкIэ зышIогъэшIэгъонхэр гъогу зафэм тедгъэхьанхэ фае: ныбжьыкIэр зыдэлэжьэщтыр къыгъотынымкIэ удеIэныр, творчествэмкIэ ыгъэфедэщт Iэмэ-псымэхэр етыгъэнхэр, а зэкIэри ушэтыжьыгъэныр, джары тэ тиIофыр — къыхигъэщыгъ Алексей Морозовым.Обществэу «ШIэныгъэм» илектор ягъусэу кIэлэцIыкIумэ гъэмэфэ щагу джэгукIэхэр агу къагъэкIыжьыгъэх. Ащ ыуж джэгукIэ шIыкIэм тетэу зекIо гъогум «техьагъэх», Урысыем ичIыопс шIагъохэр зэрагъэлъэгъугъэх, чIыпIабэхэм язытет зэрагъэшIагъ, ахэм ащыщыгъэх псыхъураеу Байкал, псыхъоу Волгэ, амурскэ къэплъаныр, «къэшъорэ» чъыгхэу Куршскэ чIыгу шъолъырым итхэр ыкIи гейзерхэм я КIэеу Камчаткэ щыIэр.Лъэс зекIоным епхыгъэ щынэгъончъэнми нэсыгъэх. ЧIыопсым узэрэщызекIон фаер ауплъэкIугъ, хьаIоу пшхы хъущтхэр ыкIи мыхъущтхэр, фэшъхьафхэр зэрагъэшIагъэх.— Урысые обществэу «ШIэныгъэм» тыфэраз, джащ фэдэу Алексей Владимир ыкъом гуфэбэныгъэ зыхэлъ зэIукIэгъур зэрэригъэкIокIыгъэм, кIэлэцIыкIу творчествэм шIулъэгъу зэрэфыриIэм, зэрэшIогъэшIэгъоным апае. Ащ фэдэ хьакIэмэ ныбжьыкIэмэ гукъыдэчъхэр яIэнхэм фащэх, лъэныкъуакIэхэр къызэIуарагъэхых, — къыддэгощагъ пащэм гъэсэныгъэмкIэ иупчIэжьэгъоу Джарымэ Фатимэ.Обществэу «ШIэныгъэр» гъэ къэс республикэм игъэмэфэ зыгъэпсэфыгъо кампание изэхэщакIохэм ащыщ мэхъу. Проектэу «ШIэныгъэм кIыгъоу зыгъэпсэфыгъор» зыфиIорэм къыдыхэлъытагъэу гъэмэфэ уахътэр мэкIофэ хэгъэгум ит кIэлэцIыкIу лагерьхэм лекторхэр ащыIэщтых, викторинэхэр, мастер-классхэр ащырагъэкIокIыщтых, фэшъхьаф гъэсэныгъэ Iофтхьабзэхэри зэхащэщтых.