ШахматхэмкIэ Адыгеим гъогогъу пчъагъэрэ ичемпионэу, РСФСР-м народнэ гъэсэныгъэмкIэ изаслуженнэ IофышIэу Антраник Зейтунян ишIэжь фэгъэхьыгъэ турнир Мыекъуапэ щыкIуагъ.
АР-м шахматхэмкIэ и Федерацие и Кубок икъыдэхын иящэнэрэ едзыгъо зэфищагъэх республикэм ыкIи Краснодар краим ялIыкIохэр, зэкIэмкIи нэбгырэ 23-рэ. Зызыушэтыгъэхэм аныбжь илъэси 9-м къыщегъэжьагъэу 85-м нэс.Зэнэкъокъум текIоныгъэр къыщыдихыгъ Адыгеим ишахматист анахь лъэшэу Николай Удовиченкэм, ащ очкоуи 5,5-рэ ригъэкъугъ. Мы къэгъэлъэгъон дэдэр иI ятIонэрэ чIыпIэр зыфагъэшъошэгъэ Сергей Назарьевым. Борис Косенкэм очкоуи 5 къыхьыгъ, ящэнэрэ хъугъэ. ХагъэунэфыкIырэ чIыпIэхэр къыдэзыхыгъэхэм шъолъырым шахматхэмкIэ и Федерацие идипломхэр аратыжьыгъэх.Джащ фэдэу хэушъхьафыкIыгъэ шIухьафтынхэмкIэ къыхагъэщыгъэх Александр Кадилиныр, Дарья Коноплинар, Максим Кузьменкэр, Мэрэтыкъо ТIахьир. ЗэкIэмкIи ахъщэ шIухьафтынипшI афагъэшъошагъ. АщкIэ зэхэщакIохэм IэпыIэгъу къафэхъугъэр Антраник ыкъоу Роберт Зейтунян.Кубокым икъыдэхын фэбэнэрэ шахматистхэм джыри едзыгъуищ апэ илъ. Бэдзэогъум и 19-м, Iоныгъом и 6-м ахэр зэнэкъокъущтых, кIэух уцугъор чъэпыогъум и 18-м рагъэкIокIыщт. Ахэм язэфэхьысыжьхэмкIэ очко анахьыбэ изыгъэкъугъэ нэбгырищ къыхахыщт.