А. Гусев
Урысыем и Правительствэ и Тхьаматэ игуадзэу Марат Хуснуллиным шъолъыр хэхъоныгъэмкIэ Правительствэ комиссием ипрезидиум (иштаб) изэхэсыгъо зэрищагъ. ПэIудзыгъэ шIыкIэм тетэу кIогъэ зэIукIэм хэлэжьагъэх Адыгеим и ЛIышъхьэу КъумпIыл Мурат, АР-м иминистрэхэм я Кабинет и Тхьаматэу КIэрэщэ Анзауррэ ащ игуадзэу Хъоткъо Хъызыррэ, АР-м иминистрэхэм я Кабинет хэтхэр, къулыкъу зэфэшъхьафхэм яIэшъхьэтетхэр.
Лъэпкъ проектэу «ЩыIэныгъэм пае инфраструктурэр» зыфиIорэмрэ 2026-рэ илъэсымкIэ федеральнэ проектхэмрэ япхырыщын тегъэпсыхьагъэу игъэкIотыгъэ псэолъэшIыным къыхиубытэхэрэм япхыгъэ IофшIэнхэр зэрагъэцэкIэщтхэмрэ мылъкоу ахэм апэIухьащтымрэ ары зытегущыIагъэхэр.Шъолъырхэм къэралыгъо программэхэр зэрагъэцакIэхэрэм икIэуххэм зэхэсыгъом хэлажьэхэрэр ахэплъагъэх, инфраструктурэмрэ социальнэ лъэныкъомрэкIэ япсэуалъэхэм яшIын зэращыкIорэм анаIэ тырагъэтыгъ. Коммунальнэ инфраструктурэм игъэкIэжьын иIофыгъохэм шъхьафэу къащыуцугъэх.УФ-м и Правительствэ и Тхьаматэ игуадзэу Марат Хуснуллиным къызэрэхигъэщыгъэмкIэ, шъолъырхэм ясоциальнэ-экономикэ хэхъоныгъэкIэ коммунальнэ инфраструктурэм игъэкIэжьын мэхьанэшхо иI, цIыф миллион пчъагъэмэ ящыIакIэ щынэгъончъэу щытынымкIи ащ ифэмэ-бжьымэ атырехьэ. Партиеу «Единэ Россием» инароднэ программэ диштэу гъэпсыгъэх лъэпкъ проектым къыпкъырыкIырэ Iофтхьабзэхэри. Хэгъэгум икоммунальнэ инфраструктурэ гъэкIэжьыгъэнымкIэ, къэлэ хъызмэтым ипсэуалъэхэр уахътэм диштэу зэтегъэпсыхьэгъэнхэмкIэ проект шъхьаIэхэм япхырыщын ренэу партием ынаIэ тырегъэты.2026-рэ илъэсым коммунальнэ инфраструктурэм игъэкIэжьынкIэ проектым сомэ миллиони 180,4-рэ Адыгеим щыпэIуагъэхьагъ. Республикэм щыпсэухэрэм псыр нахь дэгъоу аIэкIэгъэхьэгъэным епхыгъэ IофшIэнхэр агъэцакIэх. Ащ фэдэу псэолъи 7-мэ ягъэцэкIэжьынрэ яшIынрэ макIо: къуаджэу Тэхъутэмыкъуае псырыкIуапIэ щашIы, къэлэ гъэпсыкIэ зиIэ псэупIэу Инэм псыуцупIэ щагъэпсы, къалэу Мыекъуапэ псырыкIопIитIу щагъэцэкIэжьы, къутырэу Суповскэм ипсыубытыпIэрэ къуаджэу Улапэ ипсырыкIуапIэхэмрэ зэтырагъэпсыхьэх, селоу Красногвардейскэм псырыкIуапIэ щашIы.Проектэу «Iэрыфэгъу къэлэ щыIакIэр» зыфиIорэм къыдыхэлъытагъэу мы илъэсым республикэм чIыпIэ 21-рэ щызэтырагъэпсыхьащт: общественнэ чIыпIэу 18 ыкIи щагуи 3. А IофшIэнхэм сомэ миллиони 151,5-рэ апэIуагъэхьанэу щыт. Джащ фэдэу мы илъэсым проекти 3 зэшIуахыщт, къэлэ цIыкIухэмкIэ Урысые зэнэкъокъоу щыIагъэм щатекIуагъэхэр ары ащ къыхиубытэхэрэр: мэз шъолъырэу «Мэздахэм» изэтегъэпсыхьан ия 3-рэ чэзыу, общественнэ чIыпIэу «Зэкъошныгъэм игупч» зыфиIоу Инэм дэтыр игъэкIотыгъэу агъэцэкIэжьыщт, псэупIэу Яблоновскэм ипаркэу «Зэкъошныгъэри» зэтырагъэпсыхьащт.Къэралыгъо программэу «ПсэолъэшIыныр» зыфиIорэм къыдыхэлъытагъэу псэуалъэхэр зэрашIыхэрэм Адыгеим и ЛIышъхьэ ренэу ынаIэ тырегъэты. А программэм ишIуагъэкIэ илъэситIум къыкIоцI Адыгеим социальнэ мэхьанэ зиIэ учреждение заулэ къитэджэщт. Ахэм ащыщых къуаджэу АдыгеякIэм щагъэпсырэ кIэлэцIыкIу IыгъыпIэу нэбгырэ 280-м телъытагъэр, къуаджэу Гъобэкъуае щашIырэ врач амбулаториер, къутырхэу Усть-Сахрай, Прогрессым, Игнатьевскэм, къуаджэу БжыхьэкъоякIэм ащашIырэ фельдшер-мамыку IэзапIэхэр. Мыекъуапэ хирургическэ унэу приемнэ отделение зыхэтыщтым ишIын щаублагъ. 2027-рэ илъэсым ыкIэхэм адэжь ар аухынэу рахъухьагъ. М. Хь. Iэшъхьэмафэм ыцIэ зыхьырэ Адыгэ республикэ клиническэ онкологическэ диспансерым иунэ шъхьаIэ изэтегъэпсыхьан лъэкIуатэ.Зэхэсыгъом илъэхъан цIыфхэр зычIэсыщтхэ унэхэм яшIын, гъогухэм ягъэцэкIэжьын, унагъохэу кIэлэцIыкIуищ ыкIи ащ нахьыбэ зиIэхэм апае чIыгу Iахьхэм инженер инфраструктурэр ащыгъэпсыгъэным япхыгъэ Iофыгъохэм атегущыIагъэх.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.