ЕшIэгъуитф — текIоныгъиплI

ФутболымкIэ Урысыем ипервенствэ иятIонэрэ лигэ хэт Мыекъопэ «Зэкъошныгъэм» тегъэгушIо. Я 12-рэ турым къыдыхэлъытэгъэ ешIэгъоу иIагъэр зэнэкъокъум пэрытныгъэ щызыIыгъ донецкэ «Шахтерым» 1:0-у къышIуихьыгъ ыкIи я 4-рэ чIыпIэм къэкIуагъ.

ФутболымкIэ Урысыем ипервенствэ иятIонэрэ лигэ хэт Мыекъопэ «Зэкъошныгъэм» тегъэгушIо. Я 12-рэ турым къыдыхэлъытэгъэ ешIэгъоу иIагъэр зэнэкъокъум пэрытныгъэ щызыIыгъ донецкэ «Шахтерым» 1:0-у къышIуихьыгъ ыкIи я 4-рэ чIыпIэм къэкIуагъ.«Шахтер» — «Зэкъошныгъ» — 0:1 (0:0).Къэлапчъэм Iэгуаор дэзыдзагъэр: Делэ­къо Аскэр (я 61-рэ такъикъыр).«Шахтерым» хэтыгъэх:Шиханматовыр (къэлэпчъэIут), Хозиныр, Щербань (Дегтяревыр), Степановыр, Булатниковыр, Карташовыр, Орловыр (Талибовыр), Махатадзе (Детенышевыр), Трофимовыр (Джамуевыр), Касимовыр, Гаврильчик.

Тренер шъхьаIэр — Виктор Коваленкэр.«Зэкъошныгъэм» щешIагъэх:Хачировыр (къэлэпчъэIут), Солоп, Къэ­бжыр, Блэгъожъыр, Васильевыр, Коблыр (Зе­зэрахьэр), Хьэхыр (Едыджыр), Цанава, Юшко, Къонэр (ХъуакIор), Делэкъор (Iащэр).Тренер шъхьаIэр — Александр Кайвановыр.Командэхэм ешIэкIэ лъэш къагъэлъэ­гъуагъ. Турнир таблицэм апэрэ чIыпIэр щызыIыгъ «Шахтерым» текIоныгъэ къыдихыщтэу бэмэ яцыхьэ телъыгъ. Ау яхэнэрэу щыт «Зэ­къошныгъэм» мы уахътэм амалэу IэкIэлъыр къыгъэлъэгъуагъ, дахэу, узIэпищэу джэгугъэ. Я 61-рэ такъикъым тикомандэ икапитанэу Делэкъо Аскэр къэлапчъэм Iэгуаор дидзагъ. Ащ пэублэ фэхъугъ тикъэлэпчъэIутэу Тамерлан Хачировым ыпэкIэ чыжьэу ыдзыгъэ Iэгуаор. Ар Аскэр къызIэкIигъэхьагъ, псынкIэу ыкIи техникэ дахэ къыгъэлъагъозэ бысымхэм якъэлъэпчъэIут шIокIи, ебэджызэ лъэгуанджэкIэ Iэгуаор дидзагъ. ТикъэлэпчъэIутэу Тамерлан Хачировыр цыхьэшIэгъоу зэрешIагъэр къыхэтэгъэщы. ЗэкIэлъыкIоу ешIэгъуиплI хъугъэу ащ икъэлапчъэ Iэгуао къыдадзэн алъэкIырэп, ар къэгъэлъэгъон дэгъу.

— Командэ шъыпкъэ тиIэ хъугъэ. «ПСК-м» тызытекIом ыуж «Шахтерми» къышIотхьынэу гущыIэ стыгъагъ ыкIи ар къэдгъэ­шъып­къэжьыгъ, —къыIуагъ «Зэкъошны­гъэм» итренер шъхьаIэу Александр Кайвановым.Я 12-рэ турым изэфэхьысыжьхэр:«Шахтер» — «Зэкъошныгъ» — 0:1, «Чайка-М» — «Нарт» — 1:2, «Заря» — «Ангушт» — 1:0, «Рубин Ялта» — «Динамо-2» — 0:0, «Кызылташ» — «Нефтяник» — 1:2, «ПСК» — «Астрахань» — 1:4, «Севастополь» — «Победа» — 2:1, «Рос­тов-2» — «Спартак-Налщык» — 1:1.Таганрог щыриIэгъэ зэIукIэгъур къызэри­хьыгъэм ишIуагъэкIэ «Зэкъошныгъэр» я 4-рэ чIыпIэм къэкIуагъ ыкIи пэрытныгъэ зыIыгъ командэхэм ауж къэзэринырэ очко пчъа­гъэр нахь макIэ ышIыгъ. «Шахтерыр» апэрэ чIыпIэм къэнагъ, ащ зы очкокIэ ыуж къенэ «Севастополь». Зэнэкъокъум изэхэщакIохэм къызэраIуагъэмкIэ, Краснодар краир къэ­зыгъэлъэгъорэ «ПСК-р» зэнэкъокъум хэкIы­жьынэу унашъо ышIыгъ. «Зэкъошныгъэм» къыфэдгъэзэжьмэ, ащ иешIакIэкIэ къегъэлъагъо бэкIэ узщыгугъын плъэкIыщт командэу зэрэщытыр. КъыкIэлъыкIощт турым ар Мыекъуапэ щешIэщт, мэкъуогъум и 20-м Ростов хэкур къэзыгъэлъэгъорэ «Чайка-М» зыфиIорэр тихьакIэщт. Тикомандэ текIоныгъакIэхэр къыдихынхэу, ыпэкIэ лъыкIотэнэу фэтэIо.Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Шахтер» — 28.
2. «Севастополь» — 27.
3. «Ростов-2» — 25.
4. «Зэкъошныгъ» — 21.
5. «Кызылташ» — 20.
6. «Рубин Ялта» — 19.
7. «Нарт» — 18.
8. «Победа» — 17.
9. «ПСК» — 17.
10. «Спартак-Налщык» — 17.
11. «Астрахань» — 15.
12. «Ангушт» — 13.
13. «Заря» — 12.
14. «Нефтяник» — 12.
15. «Динамо-2» — 8.
16. «Чайка-М» — 1.