Лъэпшъыкъо Ф.
Программэу «Къоджэ доктор» зыфиIорэм Адыгеим иврач ныбжьыкIэхэр чанэу хэлажьэх. Медицинэ IофышIэхэр зэримыкъухэрэр дэгъэзыжьыгъэным фэIорышIэрэ федеральнэ проектэу «Медицинэ IофышIэхэр» зыфиIоу лъэпкъ проектэу «ГъэшIэ кIыхьэр ыкIи чаныр» зыцIэм хахьэрэм ишIуагъэкIэ ар зэшIохыгъэ хъугъэ.
Педиатрэ ныбжьыкIэу КIэрэф Асхьади мы программэм хэлэжьагъ. Асхьад илъэс 24-рэ ыныбжь, Шытхьалэ къыщыхъугъ, щеджагъ. Мыекъопэ къэралыгъо университетым имедицинэ институт педиатриемкIэ ифакультет къыухыгъ. Апшъэрэ еджапIэм ыуж, IофышIэ зыдэкIощт чIыпIэм бэрэ егупшысагъэп, Красногвардейскэ дэт район сымэджэщми, псэупIэу Садовэм дэт IэзапIэми врач-педиатрэу IофшIэныр ащиублагъ. Медицинэ сэнэхьатым къызэрэфэкIуагъэр тигущыIэгъу къедгъэIотагъ.— СицIыкIугъом къыщегъэжьагъэу теубытагъэ хэлъэу врач сызэрэхъущтыр сшIэщтыгъ. Сятэу Мыхьамэт а сэнэхьатыр зэригъэгъотыныр къыдэмыхъугъэми, илъфыгъэхэр фыригъэджагъэх. ТиунагъокIэ щысэ зытесхын врачхэр тиIэх. Сшыпхъухэу Иннэрэ Маринэрэ врачых. МэфэкI зыгъэпсэфыгъохэм тызызэхахьэхэкIэ, шъхьадж зыфэгъэзэгъэ лъэныкъом епхыгъэу IэзэкIэ зэфэшъхьафхэм, узхэм яклиническэ нэшанэхэм афэгъэхьыгъэу зэхэгущыIэжьыхэ зыхъукIэ, сэри ахэм сахэсэу сядэIущтыгъ. Сянэ Анисэт мы сэнэхьатыр къыхэсхыным сыдигъуи кIэхъопсыгъ. Уахътэ тешIагъ, илъэс пчъагъэм Iоф зышIэрэ сшыпхъухэр джы сиупчIэжьэгъух. Непэрэ мафэм педиатрэ сэнэхьатымкIэ сэлажьэми, офтальмологэу седжэжьын гухэлъ сиI, — къеIуатэ Асхьад.
Исэнэхьат ыгукIэ зэрэфэщагъэр, сабыйхэр шIу зэрилъэгъухэрэр IофышIэ ныбжьыкIэм къыхэщыгъ.— Сабыйхэм сяIэзэныр лъэшэу сыгу рехьы, ахэм абзэ къызгурэIо, екIолIэкIэ-шIыкIэ амалхэр къафэзгъотын сэлъэкIы. КIэлэцIыкIухэр шIу умылъэгъухэу, угу зэIухыгъэу уафыщымытмэ, уаштэщтэп, абзэ зэхэпшIыкIыщтэп, яузи къэпшIэщтэп. Шъыпкъэ, анализхэр яогъэтых, янэ-ятэхэм уяупчIы анахь зыгъэгумэкIыхэрэмкIэ, ежь сабыйхэм язекIокIэ-шIыкIэхэм ахэплъагъорэр захэбгъэхъожьыкIэ, узым «исурэт» къызэхэуцо, узэреIэзэщт лъэныкъор огъэнафэ, — еIо врачым.ТигущыIэгъу къызэриIуагъэмкIэ, медицинэ IэпыIэгъоу цIыфхэм арагъэгъотырэм идэгъугъэ зэрэхагъэхъощтым, цIыфхэр зэрагъэрэзэщтым пылъых. Ахэр ары врач Iазэм ипшъэрылъ шъхьаIэу Асхьад ылъытэрэр. Уз пэпчъ узэреIэзэщт шапхъэхэр къыдалъытэзэ, шIуагъэ зыхэлъ IэпыIэгъур сымаджэхэм арагъэгъоты.— ЦIыф лъэпкъ зэфэшъхьафыбэ мыщ щэпсэу. Район сымэджэщэу сызщылажьэрэм Адыгеим ичIыпIэ зэфэшъхьафхэм къарыкIыгъэ врач ныбжьыкIэхэм Iоф щашIэ. ЦIыфхэм тишIуагъэ ятэгъэкIы. Сымэджэ хьылъэхэр Мыекъопэ сымэджэщым тэгъакIох, — еIо тигущыIэгъу.Программэм зэрэхэлэжьэгъэ шIыкIэми Асхьад тыщигъэгъозагъ.— Ащ сыхэлэжьэн амал зэрэсиIэр сшыпхъухэм къысаIуагъ. Нахь къыспэблагъэу Красногвардейскэ районым сыщылэжьэнэу зызгъэзагъ. Программэм къызэрэдилъытэрэмкIэ, джы илъэситфэ ащ Iоф щысшIэщт. Сомэ миллион 1,5-рэ къысатыгъ. Мы ахъщэр сэ зэрэсшIоигъоу згъэзекIон сыфит. Ащ псэупIэ рысщэфын гухэлъ сиI, амал зэриIэкIэ хэзгъэхъонышъ. СинэIуасэхэм, къыздеджагъэхэм ащыщхэу а программэм хэлэжьагъэхэм янахьыбэм а фэныкъуагъэр ары зыпэIуагъахьэрэр. Сэ зэрэслъытэрэмкIэ, пстэуми апэу мы IэпыIэгъур зыпкъитыныгъэм ылъапс. ЯтIонэрэмкIэ, врачым нахь ицыхьэ зытелъыжь мэхъу, неущрэ мафэм щегъэгугъы, — къыхигъэщыгъ Асхьад.Анахь IофшIэгъу охътэ къинэу къыхэкIыгъэмкIэ теупчIыгъ.— Зэрэхабзэу, сымэджэщым къакIорэр сымаджэ хъурэр, гумэкIыгъо хафэрэр ары. БэмышIэу илъэси 7 зыныбжь кIэлэцIыкIу къытфащагъ. Лъэсгъогум тетэу кIозэ, машинэу блэкIырэм ищэрэхъ къыкIэчъи, сабыим ышъхьэ къытефагъ. Шъобж инхэр зытырищэгъэ кIэлэцIыкIум бэрэ теIэзагъ. Насыпыгъ цIыфым медицинэ IэпыIэгъоу ебгъэгъотыгъэм ишIуагъэкIэ ипсауныгъэ къызэтебгъэнэныр, ищыIэныгъэ уухъумэн плъэкIыныр. Ахэр ары врачым гухахъо зыхигъуатэрэр, иIофшIэнкIэ анахь шъхьаIэр. Уфэчэфэу IофышIэ укIон, джащ фэдэу пшIагъэм урыразэуи учIэкIыжьын фае, — еIо Асхьад.Садовэм дэт IэзапIэм тигъэзет зеблэгъэгъэ мафэм врачым цIыфыбэ къыфэкIогъагъ. Ар иIофшIэн фэшъыпкъэу зэрэлажьэрэр, сымаджэхэм дахэу зэрапэгъокIырэр нэрылъэгъу къытфэхъугъ.ЛъэпшъыкъоФатим.