В. Шепталенко
Адыгэ Республикэм и Къэралыгъо Совет — Хасэм зичэзыу я LVIII-рэ зэхэсыгъо тыгъуасэ иIагъ.
Iофтхьабзэм хэлэжьагъэх АР-м иминистрэхэм я Кабинет хэтхэр, федеральнэ ыкIи шъолъыр къулыкъу зэфэшъхьафхэм ялIыкIохэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.ЗэкIэмкIи Iофыгъо 30 повесткэм итыгъ. АпэрапшIэу Александр Деревянченкэр Джэджэ районым изэгъэшIужь хьыкум участкэу N 2-м ихьыкумышIэу гъэнэфэгъэным депутатхэр тегущыIэхи, дырагъэштагъ.Нэужым зытегущыIагъэхэм анахь шъхьаIэхэм ащыщ АР-м и Къэралыгъо Совет — Хасэм ияенэрэ зэIугъэкIэгъу идепутатхэм яхэдзын фэгъэхьыгъэр. Хэбзэгъэуцугъэу аштагъэм къызэрэщиIорэмкIэ, 2026-рэ илъэсым иIоныгъо мазэ и 20-м ахэр щыIэщтых.Шъугу къэдгъэкIыжьын, УФ-м и Президентэу Владимир Путиным иунашъокIэ мэкъэтынхэр Урысыем зыщызэхащэщтхэ зыкI мафэу ар агъэнэфагъ. УФ-м и Къэралыгъо Думэ иябгъонэрэ зэIугъэкIэгъу идепутатхэри джащыгъум хадзыщтых.БлэкIыгъэ 2025-рэ илъэсым къэралыгъо программэхэр республикэм зэрэщыпхыращыгъэми мы зэхэсыгъом щытегущыIагъэх. АР-м экономикэ хэхъоныгъэмкIэ ыкIи сатыумкIэ и Министерствэ ащ фэгъэхьыгъэ докладэу къыгъэхьазырыгъэм къызэрэщиIорэмкIэ, программэ 22-рэ шъолъырым щыпхыращыгъ. Ахэм къащыдэлъытагъэхэм пстэумкIи сомэ миллиард 42,7-рэ апэIухьагъ. Агъэнэфэгъагъэм ипроцент 98,4-р гъэцэкIагъэ хъугъэ.
Зэхэсыгъом АР-м и ЛIышъхьэ, Правительствэр, Парламентым хэхьэрэ фракциехэр кIэщакIо афэхъугъэхэу шъолъыр хэбзэгъэуцугъи 10 апэрэ ыкIи ятIонэрэ еджэгъухэмкIэ щаштагъ. Ахэр шIокI зимыIэ медицинэ страхованиемкIэ ЧIыпIэ фондым ибюджет блэкIыгъэ илъэсым гъэцэкIагъэ зэрэхъугъэм, физкультурэм ыкIи спортым, цIыфхэм ыкIи ахэм ябагаж таксихэм зэрэзэращэрэм игъэIорышIэн, бизнес цIыкIум ыкIи гурытым IэпыIэгъу ятыгъэным, лъэпкъ художественнэ промыслэм, тыкъэзыуцухьэрэ дунаим икъэухъумэн епхыгъэ зэфыщытыкIэхэм алъэныкъокIэ къэралыгъо хэбзэ къулыкъухэм япшъэрылъхэм, инвестициехэм япхыгъэ IофшIэным, культурнэ кIэным хэхьэрэ псэуалъэхэм якъэухъумэн ыкIи ягъэфедэн, административнэ хэукъоныгъэхэм, нэмыкIхэм афэгъэхьыгъэх.Депутатхэр республикэ бюджетыр 2025-рэ илъэсым гъэцэкIагъэ зэрэхъугъэми тегущыIагъэх. ХахъохэмкIэ ар сомэ миллиард 53,6-рэ хъущтыгъ. Ащ щыщэу сомэ миллиард 33-р шъолъырым иахъщ, миллиард 20,6-р зымыгъэзэжьын мылъкоу къыхэлъхьагъэ хъугъэ. Бюджетым ихъарджхэр сомэ миллиард 55,6-м ехъущтыгъэх, миллиарди 2 щыкIагъэ фэхъугъ.Докладым зытегущыIэхэм ыуж 2025-рэ илъэсымкIэ республикэ бюджетыр гъэцэкIагъэ зэрэхъугъэм фэгъэхьыгъэ хэбзэгъэуцугъэр аштагъ.Джащ фэдэу парламент зэпхыныгъэхэм къащыдэлъытагъэу АР-м и Къэралыгъо Совет —Хасэмрэ Къэрэщэе-Щэрджэс Республикэм и Лъэпкъ ЗэIукIэрэ язэдэлэжьэныгъэ фэгъэхьыгъэ зэзэгъыныгъэм тегущыIэхи, дырагъэштагъ.ХЪУТ Нэфсэт.