А. Балабась
Илъэс къэс республикэм икъэлэ шъхьаIэ итеплъэ зехъожьы.
ЦIыфхэм языгъэпсэфыгъо уахътэ зыщагъэкIорэ, къатыбэу зэтет унэ щагухэр, нэмыкI чIыпIэхэри къэлэдэсхэмкIи хьакIэхэмкIи нахь гупсэф зэрэхъущтым фэIорышIэрэ программэхэр щагъэцакIэх. Ау теплъэ къодыер арэп, ежь къалэм «ыкуцIи» ащ фэдэ IофшIэнхэр зэрищыкIагъэхэр АР-м и ЛIышъхьэу КъумпIыл Мурат къыхигъэщыгъ:— Псым, электричествэм ыкIи гъэстыныпхъэ шхъуантIэм ярыкIуапIэхэм ищыкIэгъэ кIуачIэ яIэу Iоф ашIэ зыхъукIэ ары псэупIэхэм, хъызмэтшIапIэхэм ыкIи социальнэ чIыпIэхэм яшIын фэгъэхьыгъэ проектхэр икъоу зыдгъэцэкIэшъущтхэр. Арышъ, ахэм ягъэкIэжьынкIэ республикэм ыкIуачIэ, къэралыгъо IэпыIэгъури къызфигъэфедэзэ, хилъхьан фае. ЦIыфхэм ящыIэкIэ-псэукIи нахь дэгъу хъуныр ащ зэрепхыгъэри нафэ.ПсырыкIопIэ хъытыоу Мыекъуапэ щызэбгырыщыгъэм километрэ 550-рэ икIыхьагъ. Жъы хъугъэхэм язэблэхъункIэ IофшIэнхэр аублагъэх. «Коммунальнэ хъызмэтым епхыгъэ чIыпIэхэм ягъэкIэжьын» зыфиIорэ къэралыгъо проектым къыдыхэлъытагъэу, километрибгъум ехъурэ чIыпIэ 14 блэкIыгъэ илъэсым агъэтэрэзыгъ. Мыгъи IофшIэнхэр лъагъэкIотагъэх. ЧIыпIэ 20-м ехъу пэшIорыгъэшъ уплэкIунхэм апхырыкIыгъ.— ПсырыкIопIакIэхэу жъыхэр зэрэзэблэтхъухэрэм илъэс шъэныкъо пIалъэ яI. ГумэкIыгъо къапымыкIэу лэжьэщтых, цIыфхэми зэхъокIыныгъэшIухэр зэхашIэщтых, — къыхигъэщыгъ хъызмэтшIапIэу «Мыекъопэ псырыкIуапIэхэр» зыфиIорэм ипащэу Апэжьыхьэ СултIан.ГъэцэкIэжьынхэр едзыгъо заулэу гощыгъэх: гъэнэфэгъэ чIыпIэм етIэх, псырыкIопIэ лэжьагъэр къычIахы, кIэр чIалъхьэ. Iофыгъохэр къызпыкIхэрэри къахэкIых. ЧIыгум ипытагъэрэ псырыкIуапIэр зэрэчIэлъым икууагъэрэ бэ ялъытыгъэр.— УетIэнкIэ хьылъэ дэдэхэри, чIычIэгъ псыр лъэшэу къызыщыдэкIуаехэрэри къыхэкIых. Автомобиль гъогухэми тапхырыкIын фае мэхъу, — къыхегъэщы гъэцэкIэжьынхэм афэгъэзэгъэ хъызмэтшIапIэм ипащэ игуадзэу Андрей Вагнер.ПсырыкIуапIэхэм афэдэу псызэбгырыщыпIэхэм афэгъэхьыгъэ IофшIэнхэри блэкIыгъэ илъэсым къалэм щагъэцэкIэнхэу аублагъ. Сомэ миллиони 123-м ехъу ащ пэIуагъэхьащт. Ащ щыщэу сомэ миллион 56-м кIахьэу мыгъэрэ IофшIэнхэм ателъытагъ.— Проект зэмылIэужыгъохэм тадэлажьэ. Мы уахътэм ехъулIэу къалэм итыгъэкъохьэпIэ лъэныкъо ыкIи аэропортыр зыдэщыIэгъэ чIыпIэхэм псырыкIуапIэхэр ащызэбгырыщыгъэным епхыгъэ тхылъхэр тэгъэхьазырых. Мыекъуапэ нахь дахэ ыкIи нахь гупсэф зэрэхъущтым зэпымыоу тыдэлажьэ, — къыхигъэщыгъ къалэм ипащэу Геннадий Митрофановым.Александра Балабась.