Урыс театрэм IукIагъэх

Урыс драматическэ те­атрэу А. С. Пушкиным ыцIэ зыхьрэр зызэхаща­гъэр илъэс 90-рэ зэрэхъу­рэр мыгъэ хегъэунэфыкIы.

Ащ фэгъэхьыгъэу театрэм иактерхэр зыхэлэжьэгъэ творческэ зэIукIэ Лъэпкъ тхылъ­еджапIэм щыкIуагъ.Урыс драматическэ театрэр — театрэ анахьыжъэу респуб­ликэм итмэ ащыщ. Пушкиным и Унэ шэкIогъум и 21-м 1900-рэ илъэсым апэрэу ипчъэ къы­зэ­Iуихыгъэу алъытэ. 1936-рэ илъэсым ВКП(б)-м и Адыгэ хэку комитет драмтеатрэр Мыекъуа­пэ къызэрэщызэIуахыщтым фэ­гъэхьыгъэ унашъо зештэр ары ащ фэдэ цIэр ухэсыгъэ зыхъугъэр.Режиссер цIэрыIохэу Ахэ­джэго Мэджыдэ, ТхьакIумэщэ Нал­бый, Михаил Локтовыр, Александр Романовскэр, Павел Ширшовыр театрэм илъэсыбэм фэлэжьагъэх. Хэбзэ шIагъохэу ахэм агъэуцугъэхэр театрэм егъэлъапIэх. Актер цIэрыIохэу Иван Кошелевым, ШъхьакIу­мыдэ Нуриет, Нина Старец, Луиза Матеж, Антонина Сесинам ыкIи нэмыкIхэм драмтеатрэм апэрэ лъэбэкъухэр дадзыгъэх.Творческэ зэIукIэр псэлъэ кIэкI фабэкIэ къызэIуихыгъ Лъэпкъ тхылъеджапIэм иIофы­шIэу Кучмэз Аминэт.— Урыс театрэм икъэгъэлъэ­гъонхэр ыкIи зэхищэрэ Iофтхьабзэхэр мыгъэ илъэс ар 90-рэ зэрэхъурэм фигъэшъошагъэх. Непэ театрэр зыхэлэжьэгъэ творческэ зэIукIэу Лъэпкъ тхылъеджапIэм зэхищагъэм ре­жиссерхэр, актерхэр хэла­жьэх. Ахэр спектаклэхэм ягъэуцун зэрэдэлажьэхэрэр къытфаIо­тэщт. Урысыем итхэкIошхоу, прозаикэу, драматургэу, джырэ урыс литературэм илъэпсэхэщэу Александр Пушкиным итхыгъэ­хэм актерхэр къяджэщтых. Адыгэ Республикэм изаслуженнэ артистэу Роман Корчага зэ­IукIэр зэрищэнэу фэсэгъэ­шъуашэ, — къыIуагъ Кучмэз Аминэт.— Урыс драматическэ теат­рэу А. С. Пушкиным ыцIэ зы­хьы­рэм тарихъ гъогушхо къы­кIугъ. Непэрэ щыIэкIэ-псэукIэм теат­рэм зыдырегъаштэ, культурэм чIыпIэ ин щеубыты, режиссермэ проектыкIэхэр агъэцакIэх. Теат­рэм илъэс пчъагъэрэ щылэжьагъэхэри, къычIэхьэгъакIэхэри, актер сэнэхьатым джы зыфэзыгъасэхэрэри зы бын-унагъоу сценэм тызэдытетых, — къы­Iуагъ Роман Корчага.Iофтхьабзэм мурадэу иIэр къыткIэхъухьэрэ лIэужхэм теат­рэм уасэ фашIэу, ашIогъэшIэгъонэу, шIу алъэгъоу пIугъэнхэр ары. Зэхахьэм къекIолIэгъэ ныб­жьыкIэхэм упчIэ гъэшIэгъон­хэр актерхэм аратыгъ. Гуфэбэныгъэшхо хэлъэу Iофтхьабзэр кIуагъэ.ЛъэпшъыкъоФатим.