Тульскэм искусствэхэмкIэ икIэлэцIыкIу еджапI
«ИскусствэмкIэ кIэлэегъэджэ анахь дэгъу» зыфиIорэ зэнэкъокъум ишъолъыр уцугъо мы мафэхэм зэфахьысыжьыгъ.
АР-м искусствэхэмкIэ иеджапIэхэм ащылэжьэрэ кIэлэегъаджэхэр ащ хэлэжьагъэх. АР-м культурэмкIэ и Министерствэ, искусствэхэмкIэ кIэлэцIыкIу еджапIэу N 1-м иметодическэ кабинет Iофтхьабзэм кIэщакIо фэхъугъэх.Зэнэкъокъум хэлажьэхэрэм гъэхъагъэу яIэхэр къыдалъытагъэх: искусствэм ылъэныкъокIэ программэ тедзэхэр зэрагъэфедэхэрэр, урысые ыкIи дунэе зэнэкъокъухэм ялауреат ыкIи ядипломант хъугъэхэм ягъэхьазырын, культурэм ылъэныкъокIэ гурыт сэнэхьат зыщызэрагъэгъотырэ ыкIи апшъэрэ еджапIэхэм ачIэхьажьыгъэ ныбжьыкIэхэр зэряIэхэр.Шъолъыр комиссием хэтхэм зэнэкъокъум къырахьылIэгъэ материалхэр зызэхафым ыуж текIоныгъэр къыдэзыхыгъэхэр къагъэнэфагъэх. Ахэр зэнэкъокъум иятIонэрэ едзыгъоу бжыхьэм культурэмкIэ къэралыгъо институтэу Краснодар дэтым щыкIощтым хэлэжьэщтых.АР-м культурэмкIэ и Министерствэ къызэритыгъэмкIэ, искусствэхэмкIэ кIэлэцIыкIу еджапIэу псэупIэу Тульскэм дэтым икIэлэегъаджэу Ольга Мекеровам «ИскусствэмкIэ кIэлэегъэджэ анахь дэгъу» зыфиIорэ цIэр фагъэшъошагъ. ИскусствэхэмкIэ Джэджэ кIэлэцIыкIу еджапIэм икIэлэегъаджэу Ирина Большаковам «ИскусствэмкIэ анахь кIэлэегъэджэ ныбжьыкI» зыфиIорэр ратыгъ. Адыгеир зэрифэшъуашэу тапэкIэ къагъэлъэгъоным ахэм зыфагъэхьазыры.Зэнэкъокъум текIоныгъэ къыщыдэзыхыгъэ кIэлэегъаджэхэм ягъэхъагъэхэм джыри ахагъэхъонэу, ыпэкIэ лъыкIотэнхэу, зэрифэшъуашэу Адыгеир къагъэлъэгъонэу афэтэIо.Лъэпшъыкъо Фатим.