АКъУ
Мэкъуогъум и 4-м къыщыублагъэу и 7-м нэс хэгъэгум икъэлэ шъхьаIэ тхылъмэ я XII-рэ фестивалэу «Красная площадь» зыфиIорэр щыкIуагъ.
Iофтхьабзэр А.С. Пушкиным ыкIи урысыбзэм имафэхэм яхъулIэу зэхащагъ, джащ фэдэу ар Урысыем щыпсэурэ лъэпкъхэм языкIыныгъэ и Илъэс ипрограммэ къыдыхэлъытагъ.Адыгэ къэралыгъо университетым итхылъ тедзапIэ итхылъхэр апэрэу «КIэлэцIыкIу ыкIи егъэджэн литературэм» ипавильон къыщигъэлъэгъуагъэх.БлэкIыгъэ илъэситIум тхылъ тедзапIэм итхылъхэр гупчэу «Шъолъырхэр» зыфиIорэр ары къызщигъэлъагъощтыгъэхэр, джы хэушъхьафыкIыгъэ павильоным зэрэхэфагъэхэр гъэхъагъэкIэ плъытэ хъущт.«Тэ типшъэрылъэу тлъытэрэр тикIэлэцIыкIу литературэ хэхъоныгъэхэр едгъэшIынхэр ары. Джащ пае нэмыкI павильоным ишапхъэхэм тазэрадиштэрэр зэхэщакIохэм зэхядгъэшIыкIыным макIэп кIуачIэу етхьылIагъэр. Тэ титхылъхэр Адыгеим итарихъ ыкIи икультурэ зэзыгъашIэ зышIоигъо закъохэр арэп зыфытегъэпсыхьагъэхэр, ахэр тихэгъэгу щыпсэурэ кIэлэцIыкIумэ зэкIэми къагурыIощтых, анахь дэгъухэм ащыщых, ар агурыдгъэIон тлъэкIыгъэ», — къыIотагъ Адыгэ къэралыгъо университетым итхылъ тедзапIэ иредактор шъхьаIэу КIуращынэ Лейлэ.Мыгъэ Адыгэ къэралыгъо университетым адыгабзэкIэ ыкIи урысыбзэкIэ тхыгъэ тхылъ 19 фестивалым хигъэлэжьагъ. «Лобачевскэр ыкIи ащ иуахътэ» зыфиIорэ тхылъыр апэрэу мыщ къыщагъэлъэгъуагъ, ар зэлъашIэрэ урыс математикым фэгъэхьыгъ. Тхылъыр АКъУ-мрэ порталэу «Наука Mail» зыфиIорэмрэ зэгъусэхэу ыкIи гъэсэныгъэмрэ шIэныгъэмрэкIэ Урысыем и Министерствэ яIэпыIэгъоу программэу «ШIэныгъэр тыдэкIи щыI. УшэтыныкIэхэр лъытэгъэкIуатэх» зыфиIорэм къыдыхэлъытагъэу агъэхьазырыгъ, онлайн-викторинэу «Урысыем зэшIуехы!» зыфиIорэр лъапсэ фэхъугъ. IофшIагъэм иавторых Стекловым ыцIэ зыхьырэ МИАН-м хьисапым зегъэушъомбгъугъэнымкIэ илабораторие ипащэу Николай Андреевыр, кIэлэеджакIохэм я Дунэе хьисап олимпиадэ и Урысые командэ итренер шъхьаIэу Кирилл Суховыр ыкIи КIуращынэ Лейлэ.Ащ ыпэкIэ тхылъыр интеллектуальнэ литературэм и Московскэ дунэе бэдзэрэу Non/fiction зыцIэм икIыгъэ илъэсым къыщагъэлъэгъогъагъ, апэрэ экземплярхэу къыдагъэкIыгъэхэр зэкIэ щащэфыгъагъэх.Фестивалым ащэгъэ тхылъмэ янахьыбэм яавторхэр ыкIи яиллюстраторхэр кIэлэцIыкIу литературнэ произведениехэм я Дунэе зэнэкъокъоу Жэнэ Къырымызэ ыцIэ зыхьырэм щытекIуагъэхэр ары, мыгъэ ар ятфэнэрэу республикэм щызэхащэ.Гъэ къэс фестивалым тхылъ тедзэпIэ 400-м ехъу хэлажьэ, Iофтхьэбзэ 800 фэдиз щэкIо, тхылъеджэ минипшI пчъагъэхэр хьакIэу къафэкIох. «КIэлэцIыкIу ыкIи егъэджэн литературэм» ипавильонэу N 2-м истендэу АКъУ-м итхылъ тедзапIэ зычIэтыгъэм ыпкIэ хэмылъэу фаер чIэхьан ылъэкIыщтыгъ.Адыгэ къэралыгъоуниверситетымипресс-къулыкъу