УгукIэ уфэмыщагъэу мыщ Iоф щыпшIэшъущтэп

Къэралыгъо автоинспекторхэм ясэнэхьат епхыгъэ мэфэкIым ипэгъокIэу мы къулыкъум илъэс 32-рэ хъугъэу щытхъу хэлъэу Iоф щызышIэрэ ПIатIыкъо Мосэ гущыIэгъу тыфэхъугъ. Ар гъогу-патруль къулыкъум ихэушъхьафыкIыгъэ батальон икомандир игуадз, полицием иподполковник.

Мосэ Шэуджэн районым ит къуаджэу Пщыжъхьаблэ къыщыхъугъ, щапIугъ. ШIу зыщызэрэлъэгъухэрэ, зыщызэгурыIохэрэ, адыгагъэр зыщагъэлъэпIэрэ унагъо кIалэр къихъухьагъ. Янэ-ятэхэу Ерэджыбэрэ Риммэрэ сыдигъуи чанэу зэдэлэжьагъэх, якIалэхэр гъогу занкIэ зэрэтыращэщтхэм ыуж итыгъэх. Зэшъхьэ­гъусэхэм нэбгыриплI зэдапIун, апшъэрэ гъэсэныгъэ арагъэгъотын алъэкIыгъ.ТигущыIэгъу ищыIэныгъэ полицием рипхынэу зэрэхъугъэм ушъхьагъу гъэнэфагъэ иIагъ. Джыри ар гурыт еджапIэм щеджэзэ, я 6-рэ классым исэу инспектор ныбжьыкIэхэм ядвижение (ЮИД) хэхьанэу хъугъэ. Зэнэкъокъоу Шэуджэн районым щызэхащэгъагъэм зэлэгъу кIалэхэр хэлэжьагъэх, ары пакIошъ, анахь лъэшэу алъытэщтыгъэ командэм ыпэ ишъыхи, апэрэ чIыпIэр къыдахы­гъагъ.— Едзыгъо пчъагъэу зэтеутыгъэ зэнэкъокъум тыфэхьазырэу тыкIогъагъ ыкIи зэрифэшъуашэу зыкъыщыдгъэлъэ­гъуагъ. Автомобиль маркэхэм хэшIыкI дэгъу афысиIэу щытыгъ, ащкIэ сакъы­хэщыгъагъ, щытхъу тхылъэу къысатыгъэр непэ къызнэсыгъэми згъашIоу сиI. Джащ фэдэу щымыIэ тамыгъэ сэмэркъэу хэлъэу къэтыугупшысынэу щытыгъ, «ЛъэсрыкIом удэхы хъущтэп!» зыфиIоу етхьылIагъэр осэшI купым ыгъэшIэгъуагъ. Джащ къыщегъэжьа­гъэу сыгукIэ мы къулыкъум сыфэщэгъагъ ыкIи ар сэнэхьатэу къызэрэхэсхыщтым сыфэкIуагъ, — къеIуатэ ­М. ПIатIыкъом.Дзэ къулыкъури, Мыекъопэ автотранспортнэ техникумри къыуххи, 1993-рэ илъэсым шэкIогъум Адыгеим и Къэралыгъо автоинспекцие хэхьагъ, непэ къызнэсыгъэм Iоф щешIэ. Нэужым апшъэрэ юридическэ гъэсэныгъэ зэригъэгъотыгъ.

ПIатIыкъо Мосэ апэ гъогу-патруль къулыкъум ихэушъхьафыкIыгъэ взвод старшэ инспекторэу IофшIэныр щыригъэжьагъ, нэужым ащ икомандирыгъ. ЗэрэхъурэмкIэ, пэщэ IэнатIэм къыфэмыкIозэ, гъогум тетэу къулыкъур ­ыхьыгъ. АР-м и ЛIышъхьэ игъусэу къе­кIокIыхэрэм илъэс пчъагъэрэ ахэтыгъ. Гъогум утетыныр, хъугъэ-шIагъэхэр къы­хэбгъэщынхэр, цIыф зэфэшъхьафхэм гущыIэгъу уафэхъуныр зэрэмыпсынкIэр дэгъоу ешIэ. Мыекъуапэ и МРЭО-уN 1-м ипащэу агъэнафи, тIэкIурэ Iоф ышIагъэу, джы ыгъэцэкIэрэ IэнатIэм тырагъэхьагъ.Гъогу щынэгъончъагъэр ыкIи зекIокIэ тэрэзыр гъэпытэгъэнхэм, иIофшIэн щытхъу хэлъэу ыгъэцэкIэным сыдигъуи пылъыгъ.— СищыIэныгъэ Къэралыгъо автоинспекцием зэреспхыгъэмкIэ зы мафэ сырыкIэгъожьэу къыхэкIыгъэп, — еIо хэушъхьафыкIыгъэ батальоным ипащэ игуадзэ. – Сыдигъуи автомобильхэр сикIэсагъэх, а лъэныкъом епхыгъ сиIоф­шIэни. Арышъ, гухахъо хэзгъуатэу ­илъэс зэкIэлъыкIохэм IэпэIэсэныгъэ къызIэкIэзгъахьэзэ Iоф сэшIэ. Автоинспектор сэнэхьатым угукIэ уфэмыщагъэу Iоф рыпшIэшъущтэп. Ар лъэныкъо шъхьаIэхэм ащыщ.

Гъогу полицейскэхэр сыд фэдэрэ хъугъэ-шIагъи апэу къэсыхэрэм ащыщых. «Хэукъоныгъэхэр гъогум къыпфигъэгъу­хэрэп» зыфиIорэм имэхьанэ ахэм дэгъоу къагурэIо. Мосэ IофшIэныр зыщыригъэжьэгъэ илъэсхэм инспекцием ухэ­хьаныр псынкIагъэп. Ащ ишапхъэхэр зэригъэцэкIэщтхэм непэ къызнэсыгъэми пылъ.— Къин зыхэмылъ IофшIэн хъурэп, ау автоинспекцием къулыкъу щыпхьыныр къызэрыкIоп. О зэрэпшIоигъоу уиуахътэ бгъэфедэн плъэкIырэп, игъом IофшIэныр уухырэп, зыгъэпсэфыгъохэр макIэх, ащ дакIоу ом изытет емылъытыгъэу гъогум утетын фае. Хэти щыгъуаз я 90-рэ илъэсхэу IофшIэныр зыщезгъэжьэгъа­гъэм, бзэджэшIагъэм изытет хьылъэу зэрэщытыгъэр, машинэхэр рафыжьэхэу, IашэкIэ зыщыфэе чIыпIэм щыохэу. Ау сыд фэдэрэ къиныгъуи зэрэзэпыпчыщтым зыфэбгъэсэн фае. Джырэ уахътэр ыпэрэ илъэсхэм зябгъапшэкIэ, джащ фэдэ зэфэмыдэныгъэхэр къыхэщых. Водительхэм ягугъу пшIымэ, дысэу гущыIэхэрэр сыдигъуи щыIагъэх ыкIи щыIэх, еплъыкIэ гъэнэфагъэхэри инспекторхэм афыряIэх. ЗэкIэхэмкIи дэгъу ухъун плъэкIыщтэп. Хэбзэгъэуцугъэ закъокIэ цIыфхэм уадэзекIон плъэкIыщтэп, сыдигъокIи сызпылъыгъэр гукIэгъуныгъэрэ цIыфыгъэрэ адызесхьанхэр ары, — хигъэунэфыкIыгъ ПIатIыкъо Мосэ.Гъогум къулыкъур щыпхьыныр зэрэмыIэшIэхым фэд пэщэ IэнатIэ пIыгъынри аукъодыеу щытэп. Мосэ зипэщэ батальоным нэбгыри 192-рэ хэхьэ, мыщ епхыгъэ хэушъхьафыкIыгъэ взводым — 34-рэ. Ахэм зэкIэми шэн гъэнэфагъэ яI, илъэс пчъагъэрэ Iоф щызышIагъэхэри, къыхэхьэгъакIэхэри ахэтых. Пстэуми екIолIакIэ къафэбгъотын фае. ТигущыIэгъу IэпэIэсэныгъэу IэкIэлъыр ныбжьыкIэхэм зэраригъэшIэщтым пылъ. Хэукъо­ныгъэ горэхэр къахафэхэми, зэрагъэтэрэзыжьыщтхэм анаIэ тырегъэты. ЦIыфым зэкIэри ышIэу къэхъурэп, арышъ, фэлъэкIыщтымкIэ иIофшIэгъухэм адеIэ. Нарядым техьэхэрэм зэрэзекIощтхэр, гъогурыкIоныр щынэгъончъэныр, ащ хэлажьэхэрэм ящыIэныгъэ ыкIи япсауныгъэ къэухъумэгъэнхэр пшъэрылъ шъхьаIэу зэряIэр ренэу агу къегъэ­кIыжьы.ПIатIыкъо Мосэ IофшIэныр щытхъу хэлъэу зэригъэцакIэрэм ишыхьатэу щытхъу ыкIи рэзэныгъэ тхылъхэмкIэ, медаль зэфэшъхьафхэмкIэ ­къыхагъэщыгъ. IофшIэным дакIоу, унэгъо дахи ышIэн ылъэкIыгъ. Ишъхьэгъусэу Анжелэрэ ежьыррэ кIэлитIурэ зы пшъашъэрэ зэдапIугъ.Унэгъо шэн-хэбзэхэр лъыгъэкIотэгъэн­хэр сыд фэдэрэ лъэхъани анахь шъхьаI. ПIатIыкъохэм яунагъокIэ ятэ илъагъо къыхихыгъ якIэлэ нахьыжъэу Рустам. IофшIэныр зэрэмыпсынкIэр, пшъэдэкIыжь зэрэпылъыр къыгурыIозэ, хэгъэгу кIоцI IофхэмкIэ къулыкъухэм 2018-рэ илъэсым ахэхьагъ. Гъогу-патруль къулыкъум, экономическэ бзэджэшIагъэхэм якъыхэгъэщын пылъ отделым Iоф ащишIагъ, нэужым къэралыгъо автоинспекцием зигъэзэжьыгъэу МРЭО-у N 1-м щэлажьэ. Инспектор ныбжьыкIэм Къэралыгъо автоинспекцием и Мафэрэ ежь къызыхъугъэ мафэмрэ зэтефэхэшъ, ахэр зэдегъэмэфэкIых.Мосэ иIофшIэгъухэм, къулыкъум иветеранхэм ямэфэкI мафэкIэ афэгушIо. Псауныгъэ пытэрэ кIуачIэрэ яIэу, яунагъохэм адатхъэхэу, ядунай мамырэу щыIэнхэу афэлъаIо.Iэшъынэ Сусан.