Къэбыхьэблэ къоджэ тхылъеджэпIэ-къутамэу N 3-м игъэкIотыгъэ гъэцэкIэжьынхэр щэкIох. Лъэпкъ проектэу «Унагъом» къызэрэдыхэлъытагъэу ащ пае сомэ миллиони 8 къатIупщыгъ.
Агъэнэфэгъэ планым елъытыгъэу IофшIэнхэр макIох. Унэм ыкIоцI ыкIи чIэхьэгъур зэтырагъэпсыхьэх, электрорыкIуапIэхэр агъэтэрэзых, сплит-системэхэр хагъэуцуагъэх. Дэпкъхэм ягъэлэни ыкIэм фэкIо. ЗэкIэ гъэцэкIэжьын IофшIэнхэр бэдзэогъу мазэм икъихьэгъум аухынхэу мэгугъэх.«ГъэцэкIэжьынхэм адакIоу тхылъеджапIэм иматериальнэ-техническэ базэ зэтырагъэпсыхьажьы. Учреждением итхылъ фонд экземпляр 3422-кIэ нахьыбэ хъугъэ. Непэрэ уахътэм диштэрэ тхылъеджэпIэ системэм пае Iэмэ-псымакIэхэр ащэфыгъэх: интерактивнэ панелыр, дэпкъым палъэрэ экраныр, телевизорыр, планшетитIу, акустическэ системэр, интерактивнэ глобусыр, виртуальнэ джэгукIэмэ апае пэIуитIу, микрофоныр, фотоаппаратыр, нэмыкIхэри»,— къыщыхагъэщыгъ АР-м культурэмкIэ и Министерствэ.Шэуджэн районым имуниципальнэ гупчэ тхылъеджэпIэ системэ ипащэу Хьамыч Зарэ Сэфэрбый ыпхъум къызэриIуагъэмкIэ, уахътэм диштэрэ тхылъеджэпIакIэм амалыкIэхэр къыздихьыщтых, къуаджэм ыкIи ащ къыпэIулъ чылагъомэ ащыпсэурэмэ ягъэсэныгъэ щыхагъэхъон, культурнэ ыкIи творческэ гукъэкIхэр ащ щыпхыращынхэ алъэкIыщт.