Урысыем ыкIуачIэр сыда?

Обществэу «ШIэныгъэм» илекторэу, тарихъ шIэныгъэхэмкIэ докторэу, профессорэу, шIэныгъэхэмкIэ Урысые академием и ШIэныгъэ совет хэтэу Елена Малышевам тихэгъэгу тарихъ ушэтыпIэхэм зэрапхырыкIыщтыгъэр къызщиIотэгъэ зэIукIэгъу ригъэкIокIыгъ.

Урысыем итарихъкIэ мэхьэнэ гъэнэфагъэ зиIэ лъэхъанхэм ащ едэIугъэхэр апхырищыгъэх — пасэм къыщегъэжьагъэу непэрэ текIоныгъэхэм анэсыжьэу. Анахь чIыпIэ къинхэм кIочIэ зэхэлъкIэ пыим зэрэпэуцужьыщтыгъэхэм Урысыем ипытагъэ зэрэхэлъыр ащ къыхигъэщыгъ.«Урысыер бэрэ ушэтыпIэхэм арыфэщтыгъ, ау сыдигъуи бзыоу Феникс фэдэу псэ къыпыкIэжьыщтыгъ, адырэмэ амыукIочIышъущт лъэгапIэхэм анэсыщтыгъ, афызэшIомыкIыщтыр УрысыемкIэ гъэхъэ­гъэшIухэм яегъэжьапIэ хъущтыгъ, ыпэ лъыкIуатэщтыгъ», — Урысыем и Президент IэнатIэ Iухьэ зэхъум къыIо­гъагъ Владимир Путиным.

Къэндзал-монгол теоныр, Польшэм итебэнэгъу, Хэгъэгу зэошхор — къэралыгъом ушэтыпIэ хьылъэхэр ыщэчыгъэхэ къодыеп, ахэр иублапIэхэу ыпэ лъыкIотагъ, хэхъоныгъэхэр ышIыгъэх. Зы гухэлъым, зы пыим, узэуи, шIэныгъэнчъагъэуи шIы, зыкIыныгъэ ахэлъэу зэрапэуцужьыгъэхэм ихьатыркIэ ушэтыпIэхэр къэралыгъом зэрищэчыгъэхэр тарихъым инэкIубгъохэм ищысэхэмкIэ егъэджэным хэлэжьагъэхэм лекторым нэрылъэгъу къафишIыгъ.— Урысыем итарихъ къызэригъэлъа­гъорэмкIэ, текIоныгъэр цIыфхэм языкIыныгъэкIэ къыдахыщтыгъ. Ахэм хэгъэ­гум шIулъэгъоу фыряIэм, ащ инеущкIэ пшъэдэкIыжьэу ахьырэм яшIуагъэкIэ къиныгъохэр къэралыгъом ыукIочIыщтыгъэх. ЗыкIыныгъэм цIыфхэр тезгъэгушIухьэщтыгъэхэр Александр Невскэм фэдэ къэралыгъо IофышIэ закъохэр арэп, цIыф къызэрыкIохэу Кузьма Мининым фэдэхэри ары. Непи, сыдигъуи фэдэу, ушэтыпIэхэм тапэуцужьыным тизыкIыныгъэ ищыкIагъ, — къыIуагъ Елена Малышевам.Ащ къызэрэхигъэщыгъэмкIэ, ТекIоныгъэшхом ишIэжь непэрэ цIыфхэмкIэ тамыгъэ шъхьаI ыкIи зэкIэми тызэзыпхырэ лъапс. Информационнэ заоу кIорэми пстэуми апэу Хэгъэгу зэошхом фэгъэхьыгъэ къэбархэр сыдми зэпырагъэзэн къодыем пылъхэп.— ТишIэжь ныбжь иIэп, джырэ Урысыем ар илъэпкъ нэшан. Тарихъыр кIатхыкIыжьынымкIэ лъэбэкъоу ашIыхэрэмкIэ къэралыгъом ылъапсэ кIаутынэу зэрэфаехэр Владимир Путиным къыIуагъ. ТиблэкIыгъэ лъытэныгъэ фашIэу пIугъэнхэр – непэ псэухэрэм япшъэрылъ шъхьаI. Къэралыгъом хахъо езыгъэшIыщтыр ыкIи итарихъ кIэн бай къэзыухъумэщтыр лIэужхэм язэпхыныгъ, — къыхигъэщыгъ Елена Малышевам.