МэфэкIым ипэгъокIэу

Медицинэм иIофышIэ и Мафэ ипэгъокIэу республикэмкIэ псауныгъэм икъэухъумэн ылъэны­къо­кIэ Iоф зышIэхэрэм афэгушIуагъ Адыгеим и ЛIышъхьэу КъумпIыл Мурат. МэфэкIым фэгъэхьы­гъэ зэхахьэм республикэ зэнэкъокъоу «Илъэсым иврач анахь дэгъу» зыфиIорэм щатекIогъэ Лэгъуф Заринэ, гъэхъагъэхэр медицинэм щызышIыгъэхэр къыщыхагъэщыгъэх, щагъэшIуагъэх.

Iофтхьабзэм хэлэжьагъэх Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, ха­бзэм ифедеральнэ, иреспубликэ ыкIи имуниципальнэ къулыкъухэм ялIыкIохэр, медицинэм иIофышIэхэр, гуфакIохэр.Ясэнэхьат мэфэкIэу къэблагъэрэмкIэ республикэм и ЛIышъхьэ афэгушIо зэ­хъум мафэ къэс цIыфхэм япсауныгъэ къэзыухъумэрэ, республикэм псауны­гъэм икъэухъумэнкIэ исистемэ джыри нахь гъэпытэгъэным зиIахьышхо хэзышIы­хьэрэ пстэуми зэрафэразэр къыIуагъ. Анахьэу етIани къыхигъэщыгъэхэр а лъэныкъомкIэ ветеранхэр ары. Адыгэ Республикэм и ЛIышъхьэ къызэриIуа­гъэмкIэ, ахэм IофшIэкIэшIоу аIэкIэлъым­рэ ясэнэхьат зэрэфэшъыпкъэхэмрэ джы­рэ медицинэ IофышIэ ныбжьыкIэхэмкIэ щысэтехыпIэх.

«Тиврачхэм IэпэIэсэныгъэ ин ахэлъэу псауныгъэм икъэу­хъумэнкIэ хэбзэшIухэр лъа­гъэкIуатэх, Адыгеим ифедэ хэлъэу, пшъэдэкIыжьэу ахьырэр къагурыIозэ Iоф ашIэ, нэмыкI шъолъырхэм ащыпсэу­хэрэми IэпыIэгъу аратыным фэхьазырых. Ахэм зыкIэ ащыщых тынаIэ зытедгъэтырэ Херсон хэкумрэ ткъош Абхъазымрэ. ЦIыфхэм япсауныгъэ къэухъумэгъэным анаIэ зэрэтырагъэтырэм имызакъоу, ащ фэдэ зэфыщытыкIэхэм лъэпкъхэм азыфагу илъ зэпхыныгъэшIухэр джыри нахь агъэ­пытэх. ЦIыфхэм ящыкIэгъэ медицинэ IэпыIэгъур ­игъом аIэкIэгъэхьэгъэныр социальнэ лъэныкъомкIэзыпкъитыныгъэ щыIэным икъэ­кIуапI», — къыIуагъ ­КъумпIыл Мурат.Республикэм и ЛIышъхьэ къызэрэхигъэщыгъэмкIэ, Iофэу зэдагъэцакIэрэм кIэухышIухэр фэхъух: 2025-рэ илъэ­сым Адыгеим гурытымкIэ къыщагъа­шIэрэр илъэс 76,65-м нэсыгъ (2024-рэ илъэсым ар зынэсыщтыгъэр илъэс 75,5-рэ). Урысыем гурытымкIэ илъэс 75,03-рэ къыщагъашIэмэ, Адыгеим нахьыб. Илъэси 10-м къыкIоцI Адыгеим щы­псэухэрэм къагъашIэрэр илъэси 4,4-кIэ нахьыбэ хъугъэ, ар республикэмкIэ гъэ­хъэгъэшху.Президентэу Вдадимир Путиным къы­гъэуцурэ пшъэрылъхэр тапэкIи гъэцэкIэгъэнхэм пае Урысые Федерацием и Правительствэ, партиеу «Единэ Россием» яIэпыIэгъу хэлъэу, лъэпкъ проектэу «ГъэшIэ кIыхьэр ыкIи чаныр» зыфиIорэр зэрэпхыращырэм ишIуагъэкIэ зэхэубы­тэгъэ Iофышхо Адыгеим щызэшIуахы: сымэджэщхэр, IэзапIэхэр ашIых ыкIи агъэкIэжьых, джырэ уахътэм диштэрэ Iэмэ-псымэхэр, цифрэ технологиехэр къызфагъэфедэх, кIэлэцIыкIухэм япсау­ныгъэ икъэухъумэн нахьышIоу зэхэ­щагъэ мэхъу, нахьыжъхэм IэпыIэгъоу ара­тырэм ыкIи хэушъхьафыкIыгъэ дзэ операцием хэлажьэхэрэр щыIэныгъэм нахь псынкIэу хэгъозэжьынхэмкIэ яшIуагъэу арагъэкIырэм зеушъомбгъу. Илъэсэу икIыгъэм а пшъэрылъхэм язэшIохын сомэ миллиард 13 пэIуагъэхьагъ. Мы илъэсым сомэ миллиард 14,6-м шъхьадэкIэу ахэм апэIуагъэхьащт.«Сыд фэдэрэ Iэмэ-псымэхэр ыкIи технологиехэр огъэфедэ­хэкIи, гъэхъэгъэ ин дэдэхэр пшIынхэ плъэкIыщтэп, анахь шъхьаIэр — IэпэIэсэныгъэ зы­хэлъ IофышIэхэр щыIэнхэ фае. Ахэм ягъэхьазырынкIэ зэшIо­тхырэр бэ, хэгъэгум ипэрыт ашъэрэ еджапIэхэм адытиIэ зэдэлэжьэныгъэр тэгъэпытэ, медицинэм иIофышIэхэм социальнэ IэпыIэгъоу яттырэми нахь зетэ­гъэушъомбгъу, ахэм IофшIэнымкIэ япэсыгъэ амал­хэр ятэгъэгъотых. Гуетыныгъэ ин зыхэлъэу Iоф зышIэ­хэрэр кIэгъэгушIугъэнхэми мэхьанэшхо етэты», — къыхигъэщыгъ КъумпIыл Мурат.КIэухым Адыгеим и ЛIышъхьэ къэралыгъо шIухьафтынхэри аритыжьыгъэх. Урысые Федерацием зыкъэухъумэжьыгъэнымкIэ и Министерствэ имедалэу «IэпыIэгъумрэ гукIэгъумрэ апае» зыфиIорэр фагъэшъошагъ Мыекъопэ медицинэ колледжым ипащэу Алексей Самоквитовым.Псауныгъэм икъэухъумэнкIэ гъэхъагъэу яIэхэм апае щытхъуцIэу «Адыгэ Республикэм изаслуженнэ врач» зыфиIорэр афагъэшъошагъ Адыгэкъалэ дэт сымэджэщэу К. М. Батмэным ыцIэ зы­хьырэм иврач-статистикэу ТхьазфэшIу МулиIэт ыкIи Мыекъопэ къэлэ IэзапIэм иврач-мамыку-гинекологэу Валентина Чудопаловам. ЩытхъуцIэу «Адыгэ Рес­публикэм псауныгъэм икъэухъумэнкIэ изаслуженнэ IофышI» зыфиIорэр афагъэшъошагъ республикэ клиническэ сымэджэщым иврач шъхьаIэ игуадзэу Светлана Строкань, республикэ клиническэ цэшIэ IэзапIэм ицашIэу Хьа­къунэ Сайрэт. Адыгэ Республикэм и ЛIышъхьэ и Рэзэныгъэ тхылъхэр аратыжьыгъэх медицинэ IэпыIэгъу псынкIэмкIэ ыкIи тхьамыкIагъохэм ахэфагъэхэм IэпыIэгъу ятыгъэнымкIэ республикэ гупчэм игараж имеханикэу Вячеслав Кочерга, а организацие дэдэм имамыкоу Аврора Кравченкэм, Мыекъопэ къэлэ IэзапIэм ибзылъфыгъэ консульта­цие ипащэу Наталья Савенкэм, Адыгэ­къэлэ сымэджэщым ихирургическэ отделение имедицинэ сестра шъхьаIэу ЛIыхэсэ Симэ, Адыгэ республикэ клиническэ сымэджэщым иврач-рентге­нологэу Алевтина Шевченкэм, Мые­къопэ медицинэ колледжым ипащэ игуадзэу ХьэкIэко Эммэ.Iофтхьабзэм илъэгапIэу плъытэн плъэ­кIыщт республикэ зэнэкъокъоу «Илъэсым иврач анахь дэгъу» зыфиIорэм щатекIуагъэм фагъэшъошагъэр: IэпэIасэу Еутых Асе иIофшIагъэу «Сэтэнае икъэ­гъагъ» зыфиIоу адыгэхэм ялъэпкъ медицинэ итамыгъэу щытыр. Мы илъэсым зэнэкъокъум текIоныгъэр къыщыдэзы­хыгъэр Адыгэ республикэ онкологическэ диспансерэу М. Хь. Iэшъхьэмафэм ыцIэ зыхьырэм иврач-гематологэу, гематологическэ гупчэм ипащэу Лэгъуф Зарин.ШIухьафтынхэр афагъэшъошагъэх Мыекъопэ къэлэ кIэлэцIыкIу IэзапIэм иврач-педиатрэу Елена Загуменновам, Адыгэ республикэ клиническэ сы­мэджэщым эндоскопиемкIэ икъутамэ ипащэу Нэгъой Батыр, медицинэ Iэпы­Iэгъу псынкIэмкIэ ыкIи тхьамыкIагъохэм ахэфагъэхэм IэпыIэгъу ятыгъэнымкIэ Адыгэ республикэ гупчэм иврачэу Нарт Наталье, Адыгэкъэлэ сымэджэщым трав­матологиемкIэ ыкIи ортопедиемкIэ икъутамэ иврачэу КIырмыт Мурат.Гурыт медицинэ гъэсэныгъэ зиIэ IофышIэ анахь дэгъу хъугъэхэми шIу­хьаф­тынхэр аратыгъэх. Адыгэ Респуб­ликэм и Къэралыгъо Совет — Хасэм ирэзэныгъэ тхылъхэмкIэ, Адыгэ Респуб­ликэм псауныгъэм икъэухъумэнкIэ икъулыкъу тынхэри IофышIэ заулэхэм афагъэшъошагъэх.Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем, псауныгъэм икъэухъумэн иIофышIэхэм япрофсоюзхэм я Адыгэ республикэ организацие итхьаматэу Любовь Усачевар медицинэм иIофы­шIэхэм афэгушIуагъэх.МэфэкI къэгъэлъэгъонкIэ Iофтхьабзэр зэфашIыжьыгъ.АР-м и ЛIышъхьэ ипресс-къулыкъукъытырэ къэбархэмкIэТхьаркъохъо Сафыет.