Илъэсым иврач анахь дэгъу хъугъэ гематологэу, Адыгэ республикэ онкологие диспансерым гематологиемкIэ иотделение ипащэу Лэгъуф Заринэ «Адыгэ макъэм» зэдэгущыIэгъу дишIыгъ.
Адыгэ Республикэм псауныгъэр къэухъумэгъэнымкIэ и Министерствэ исистемэ илъэс 13-м ехъугъэу Заринэ Iоф щешIэ. Ащ щыщэу илъэс 12-м онкологие диспансерым Iут. 2023-рэ илъэсым къыщыублагъэу кIэу агъэпсыгъэ медицинэ гематологием и Гупчэ пэщэныгъэ дызэрехьэ. А охътэ кIэкIым къыкIоцI ар шэпхъэшIухэм адиштэу зэтырагъэпсыхьагъ. Илъэс зэкIэлъыкIохэм къакIоцI IэпэIэсэныгъэшхо хэлъэу, иIофшIэн хэшIыкI икъу фыриIэу зэригъэцакIэрэм фэшI Лэгъуф Заринэ ыцIэ дахэкIэ раIо.— Тын лъапIэу къысфагъэшъошагъэм лъэшэу сыщыгушIукIыгъ, ар шъуашэу сэлъытэ, — еIо Заринэ. — Сымэджэщым ипащэхэм зэнэкъокъум сыхэлэжьэн фаеу къызысаIом, сезэгъыгъ. СэркIэ мы зэнэкъокъур апэр нахь мышIэми, сшIогъэшIэгъоныгъ. СиIофшIэнкIэ гъэхъагъэу сиIэхэр, тынэу къысфагъэшъошагъэхэр, къыздэхъугъэхэр къэзыгъэшъыпкъэжьырэ тхьапэхэр зэнэкъокъум есхьылIагъэх. ТекIоныгъэ къыдэсхыным сицыхьэшхо телъыгъэп, ау макIэу сыщыгугъыгъ. Зымакъэ къысфэзытыгъэхэм лъэшэу сафэраз. ЗэрэслъытэрэмкIэ, мы щытхъуцIэр зифэшъошэ врачыбэ тиI. ТекIоныгъэу къысфагъэшъошагъэр сиIофшIэгъухэм афэсэгъэхьы, сыда пIомэ, зэкIэми зы командэу тызэдэлажьэ. Дэгъоу уалъытэным пшъэдэкIыжь пылъ, арышъ, щытхъуцIэр къызэрэзгъэшъыпкъэжьыщтым сыпылъыщт.Заринэ къызэрэтфиIотагъэмкIэ, Пшызэ къэралыгъо медицинэ академием икъутамэ 2012-рэ илъэсым къыухыгъ. 2013-рэ илъэсым интернатурэм щеджагъ. Нэужым химиотерапевтэу тIэкIурэ Iоф ышIагъэу, ишIэныгъэхэм ахигъахъуи, лъэныкъоу гематологиер ыIэ къыригъэхьагъ.АР-м псауныгъэр къэухъумэгъэнымкIэ и Министерствэ тызэрэщагъэгъозагъэмкIэ, Заринэ гематологиемкIэ Гупчэм пэщэныгъэ дызэрихьэзэ Iэмэ-псымакIэхэр къызIэкIигъэхьагъэх, IэпэIэсэныгъэшхо зыхэлъ IофышIэхэр зэрищэлIагъэх. Лъым епхыгъэу уз гъэтIылъыгъэ зиIэхэм республикэр къамыбгынэу шэпхъэшIухэм адиштэрэ Iэмэ-псымэхэмкIэ джы уплъэкIунхэр ашIынхэмкIэ амал дэгъухэр яIэ хъугъэ. Ащ ишIуагъэкIэ адэбз уз зиIэхэм ягъэхъужьынкIэ шIыкIэу агъэфедэхэрэми нахьышIум ылъэныкъокIэ зэхъокIыныгъэхэр афэхъугъэх.Заринэ гематологиемкIэ апшъэрэ квалификацие зиIэ врач. ИшIэныгъэхэм ренэу ахегъахъо, научнэ ушэтынхэм, зэфэсхэм, конференциехэм ренэу ахэлажьэ. Ежь IэпэIэсэныгъэу IэкIэлъымкIэ врач ныбжьыкIэхэм адэгуащэ.Щытхъу хэлъэу иIофшIэн зэригъэцакIэрэм ишыхьатэу АР-м псауныгъэр къэухъумэгъэнымкIэ и Министерствэ ищытхъу тхылъхэр мымакIэу къыфагъэшъошагъэх. 2026-рэ илъэсым лъэныкъоу «Терапия ыкIи педиатрия» зыфиIорэмкIэ врач анахь дэгъоу агъэнэфагъ.— УишIуагъэ зэбгъэкIыгъэ цIыфхэм пцIэ дахэкIэ къызыраIокIэ ащ гухахъо хэогъуатэ. Ащыгъум къыбгурэIо узыфеджэгъэ сэнэхьатыр пкIэнчъэ зэрэмыхъугъэр. ТапэкIи нахьышIужьэу уадэIэпыIэнэу угу мэхъу, кIуачIэ къыпхелъхьэ, — еIо врач ныбжьыкIэм.— Зарина, щысэтехыпIэ врачэу хэта уиIэр?— Ащ фэдэу сиIэр УФ-м псауныгъэр къэухъумэгъэнымкIэ и Министерствэ игематолог шъхьаIэу, шIэныгъэлэжьэу Елена Поровичниковар ары. Мы IэнатIэм ар зыIухьагъэр бэшIагъэп нахь мышIэми, мы къулыкъум хэхъоныгъэ ышIынымкIэ бэ ышIэрэр. Iофтхьабзэхэм ахэлажьэ, шIэныгъэм ылъэныкъокIэ гематологием мэхьанэшхо зэриIэр къыхегъэщы, икъоу ащ удэлажьэмэ, сымаджэхэм ягъэхъужьынкIэ къэгъэлъэгъонышIухэр зэрэщыIэхэр къэзыгъэшъыпкъэжьырэ ушэтынхэр ешIых.— Врач-гематологым сыд фэдэ уза ыгъэхъужьырэр?— Лъым изытет, ащ епхыгъэу уз гъэтIылъыгъэ зиIэхэм ягъэхъужьын гематологыр пылъ. Мы мафэм ехъулIэу тишъолъыр процент 60 фэдизмэ лъым епхыгъэ адэбз узхэр яIэхэу учетым хэтых, процент 50-м а узыр ямыIэу алъэплъэх.— Врач-гематолог сэнэхьатыр бэмэ къыхахырэп. IэзапIэхэм Iоф ащызышIэщтхэр яIэхэп. Сыда ар къызыхэкIырэр?— Гукъау нахь мышIэми, ар шъыпкъэ. ГематологиемкIэ Гупчэм врачиплIымэ Iоф щашIэ, зы ныбжьыкIэ тэгъэхьазыры. Сэ зэрэслъытэрэмкIэ, мы лъэныкъом Iоф щыпшIэныр къинэу зэрэщытым къыхэкIэу бэмэ ар къыхахырэп. Терапием ылъэныкъокIэ уз къиным лъапсэ фэхъугъэр къыхэбгъэщын фае. Врач-гематологым къыхигъэщыгъэ узыр ыгъэхъужь къодыеп, ар къызыхэкIыгъэри ыгъэунэфышъун фае. Ащ пае анализ къинхэр тэшIых, ахэр Москва, Санкт-Петербург тэгъэхьых. Джэуапыр къызыкIожьыкIэ, Адыгеим щыпсэухэрэр зыми мыкIохэу, медицинэ страхованием иполискIэ тэгъэхъужьых. Мы мафэхэм онкологическэ диспансерым гъэцэкIэжьын IофшIэнышхо щэкIо. ЦIыфхэм ащ гупсэфэу зыщагъэхъужьыным фэшI гематологиемкIэ Гупчэм хэтыщтых хэушъхьафыкIыгъэ боксхэр, палатэхэр, джащ фэдэу шэпхъэшIухэм адиштэрэ Iэмэ-псымэхэр чIэтыщтых. АР-м псауныгъэр къэухъумэгъэнымкIэ и Министерствэ лъэшэу тыфэраз мыщ фэдэ амал дэгъухэр къызэрэтитыхэрэм фэшI.— Сыда анахьэу гематологиер къызкIыхэпхыгъэр?— ЫпэрапшIэ адэбз уз зиIэхэм яIэзэрэ врач сыхъунэу сыфэягъ. Ау нэужым сегупшыси, гематологиер къыхэсхыгъ, сыда пIомэ цIыфым иуз тэрэзэу зыбгъэунэфыкIэ, ащ нахь еIэзэгъошIу. Ылъакъомэ атемытэу сымэджэщым къащагъэр ежь-ежьырэу зычIэкIыжьыкIэ ыкIи пцIэ дахэкIэ къызыраIокIэ, зымыуасэ щыIэп.ЩыIэныгъэр зы чIыпIэ итэп, ренэу тигъашIэ кIэ горэ къыхэхьэ. Заринэ ар къыгурыIозэ ишIэныгъэхэм ренэу зэрахигъэхъощтым пылъ. Москва икураторхэм зэпхыныгъэ адыриIэу шIыкIакIэу къежьэхэрэм алъэплъэ.Хьалэлэу, угу етыгъэу Iоф пшIэмэ, цIыфхэм лъытэныгъэ къыпфашIэу, сыдигъуи ахэм урящыкIагъэу, уиIофшIагъэ уасэ къыфашIы хъумэ, насыпыгъэшху. Заринэ «Илъэсым иврач анахь дэгъу» зыфиIорэ щытхъуцIэр къызэрэфагъэшъошагъэм фэшI тыфэгушIо. ТапэкIи игъэхъагъэхэм ахигъэхъонэу, цIэ лъапIэу къырапэсыгъэр къыгъэшъыпкъэжьынэу фэтэIо.КIарэ Фатим.