Егъэджэнхэм язэфэхьысыжь

Адыгеим и ЛIышъхьэу, «ЛIыхъужъхэм яуахът» зыфиIорэ федеральнэ программэм игъэсакIоу КъумпIыл Мурат хэушъхьафыкIыгъэ дзэ операцием иветеранэу, подпол­ковникэу Сергей Ковалевым АР-м и Правительствэ зы­чIэт Унэм зэIукIэгъу щыдыриIагъ. Къэралыгъо ыкIи муници­пальнэ гъэIорышIэным изыфэгъэхьазырынкIэ егъэджэн­хэр зэрэкIуагъэхэр ащ щызэфахьысыжьыгъ.

Шъугу къэдгъэкIыжьын, Сергей Ко­валевыр «ЛIыхъужъхэм яуахът» зыфиIорэ федеральнэ программэм хэлажьэ ыкIи 2025-рэ илъэсым ибэдзэогъу мазэ къы­щыублагъэу шъолъырым ипащэу КъумпIыл Мурат игъэсакIоу Адыгэ Респуб­ликэм стажировкэр щекIу. Проектым Урысыем и Президентэу Вла­димир Путиныр кIэщакIо фэхъугъ ыкIи лъэпкъ хъызмэтымрэ къэралыгъо къулы­къум­рэкIэ Урысые Академием къэралыгъо гъэIорышIэнымкIэ и Апшъэрэ еджапIэ ар пхырещы. Мурад шъхьаIэу иIэр хэу­шъхьафыкIыгъэ дзэ операцием хэлажьэхэрэмрэ иветеранхэмрэ къэра­лыгъо ыкIи муниципальнэ гъэIорышIэным фэгъэсэгъэнхэр ары.Сергей Ковалевым стажировкэр зыщикIугъэ уахътэм АР-м игъэцэкIэкIо хэбзэ ыкIи чIыпIэ зыгъэIорышIэжьыпIэ къулыкъухэр зэрэзэхэтхэр, Iофэу агъэцакIэрэр зэригъэшIагъ, шъолъыр Парламентым, ащ и Аппарат, АР-м и ЛIы­шъхьэ ыкIи министрэхэм я Кабинет я Администрацие яIофшIэн нэIуасэ зыфишIыгъ.Джащ фэдэу Сергей Ковалевым лъэ­ныкъо зэфэшъхьафхэмкIэ шъолъыр ыкIи муниципальнэ проектэу Адыгеим ща­гъэцакIэхэрэм адэлэжьагъ. «Хэгъэгум иухъумакIохэр» зыфиIорэ Фондымрэ партиеу «Единэ Россиемрэ» зэпхыныгъэ адыриIэу хэушъхьафыкIыгъэ дзэ опе­рацием хэлажьэхэрэмрэ ахэм яунагъо­хэмрэ IэпыIэгъу афэхъугъэным ынаIэ тыригъэтыгъ.Шъолъырым ипащэ Сергей Ковалевым истажировкэ зэрэкIуагъэм, рес­публикэм щызэшIуахыхэрэм ар зэрахэщэгъагъэм осэ ин къыфишIыгъ. КъумпIыл Мурат къызэрэхигъэщыгъэмкIэ, проектым хэлэжьэрэ ветераным профессионализмэгъэ ин зэрэхэлъыр, пшъэдэкIыжь ыхьын зэрилъэкIыщтыр егъэджэнхэм къащи­гъэлъэгъуагъ.«ЛIыхъужъхэм яуахът» зыфиIорэ федеральнэ программэм IофышIэхэм якъыхэхынкIэ ыкIи ягъэхьазырынкIэ амалышхохэр къетых. ЧIыпIэ къинхэм закъыщызгъэлъэгъуагъэхэу, патриотизмагъэу ахэлъыр, я Хэгъэгу зэрэфэ­шъыпкъэхэр, пшъэрылъ къызэрымыкIохэр сыд фэдэрэ чIыпIи зэрэщагъэцэкIэшъущтхэр, нэмыкIхэм апае пшъэдэкIыжь ахьын зэралъэкIыщтыр къэзыушыхьатыжьыгъэ цIыфхэр ары ар зытегъэ­псыхьагъэр. УФ-м и Президент къызэ­рэхигъэщырэмкIэ, ахэм афэдэхэр хэ­гъэгум игъэIорышIэкIо системэ лъапсэ фэхъунхэ фай. Къэралыгъом ипащэ пшъэрылъ къышIыгъэу программэр шъо­лъырхэм зэкIэми ащыпхыращы. Рес­публикэм ипрограммэу «Адыгеим и лIы­хъужъхэр» зыфиIорэм къыщыдэлъытагъэуи блэкIыгъэ илъэсым къыщегъэжьагъэу хэушъхьафыкIыгъэ дзэ операцием иветеранхэр етэгъаджэх. Ахэм яIэпэIэсэныгъэ, ягупшысакIэ, ягъогу дэмыхыхэу мурадхэм афэкIонхэ зэра­лъэкIырэм тиреспубликэ, хэгъэгум зэрэщытэу шIуагъэ къызэрафахьыщтым сицыхьэ телъ», — къыIуагъ КъумпIыл Мурат.