Паспортхэр аритыжьыгъэх

МэфэкIым ипэгъокIэу Адыгеим и ЛIышъхьэу КъумпIыл Мурат рес­публикэм икIэлэеджакIоу еджэным, творчествэм, спортым, общественнэ IофшIэным гъэхъагъэхэр ащызышIыгъэ­хэм Урысые Федерацием ипаспортхэр ариты­жьыгъэх.Правительствэр зычIэт Унэм щыкIогъэ Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, «ЛIыхъужъхэм яуахът» зыфиIорэ программэм хэлажьэу Сергей Ковалевыр, гъэсэныгъэм ыкIи ныбжьыкIэ политикэм афэгъэзэгъэ министерствэхэмрэ къулыкъухэмрэ ялIыкIохэр, ны-тыхэр.Адыгеим и ЛIышъхьэ Урысыем и Мафэу зэкIэ хэгъэгум щыпсэухэрэр зэзыпхыхэрэм, тарихъыр, текIоныгъэхэр агу къэзыгъэкIыжьыхэрэм ипэгъокIэу мы Iофтхьабзэр зэрэзэхащагъэм мэхьанэшхо зэриIэр къыхигъэщыгъ.«Ти Хэгъэгу ищыIэныгъэ тиIахь зэрэ­хэлъыр мы мафэм анахьэу зэхэтэшIэ. Джыри шъуныбжьыкIэ нахь мышIэми, ар шъуигъэхъагъэхэмкIэ къэшъуушыхьатыгъ, шъузэрэчаныр, шъузэрегугъурэр, пшъэдэкIыжь зэрэшъухьышъурэр къэ­жъугъэлъэгъуагъ. Еджэным, спортым, творчествэм гъэхъагъэу ащышъушIы­гъэхэмкIэ, нэмыкIхэм шъуадеIэным шъузэрэфэхьазырымкIэ республикэм ыкIи хэгъэгум хэхъоныгъэ ашIыным шъуиIахьышхо хэшъолъхьэ», — къы­Iуагъ КъумпIыл Мурат кIэлэеджакIохэм зафигъазэзэ.Адыгеим и ЛIышъхьэ Урысыем игражданин ипаспорт аритыжьыгъ Даунэ Миланэ (Красногвардейскэ районым игимназиеу N 1-р), Гъурыжъ Амели (Кощхьэблэ районым игурыт еджапIэу N 2-р), Анастасия Каблучай (Джэджэ районым игурыт еджапIэу N 8-р), Джэндэрэ Миланэ (Теуцожь районым игурыт еджапIэу N 3-р), Къэращэкъо Эльдар (Адыгэкъалэ игурыт еджапIэу N 3-р), Джарымэ СултIан (Тэхъутэмыкъое районым игурыт еджапIэу N 6-р), Вадим Рябенкэм (Мыекъопэ районым гъэсэныгъэмкIэ и Гупчэу N 2-р), Роман Бобровым (Мыекъуапэ илицееу N 8-р), Матвей Шабалкиным (Мыекъуапэ игурыт еджапIэу N 11-р).КъумпIыл Мурат Урысыем игражданин ныбжьыкIэу УФ-м и Президентэу Владимир Путиным лъэпкъхэм языкIыныгъэ и Илъэсэу къыгъэнэфагъэм паспортыр къызэратыгъэхэм афэгушIуагъ. Респуб­ликэм ипащэ лъэпкъхэм языкIыныгъэ зэкIэми зэдытибаиныгъэу ыкIи хэгъэгум щыпсэухэрэм ягушъхьэ кIэгъэкъонышхоу зэрэщытым къыкIигъэтхъыгъ. Ащ къызэриIуагъэмкIэ, ары хэушъхьафыкIыгъэ дзэ операцием хэлэжьэрэ тидзэкIолIхэр къэзыухъумэхэрэр.Шъолъырым ипащэ гражданиныр фитыныгъэхэм ямызакъоу, пшъэрылъхэри зиIэ цIыфэу зэрэщытыр, изекIуакIэхэмкIэ пшъэдэкIыжь зэрихьырэр джыри зэ агу къыгъэкIыжьыгъ.«ТапэкIэ Адыгеир нахьышIу зышIыщтыр, тиродинэ цIыкIу, ти Хэгъэгу зэ­рэщытэу ящытхъу языгъэIощтыр шъоры. Тэ талъэныкъокIэ ныбжьыкIэхэм сэ­наущыгъэу ахэлъыр агъэфедэжьышъуным, кIэщакIо зыфэхъухэрэр, проектхэр пхыращышъунхэм ищыкIэгъэ пстэур ядгъэгъотыным тыпылъыщт. Шъуицыхьэ зытелъыжьэу гъэхъэгъакIэхэм шъуа­фэбан, шъуигупсэхэр, шъуичIыпIэгъухэр жъугъэгушIох», — къыIуагъ КъумпIыл Мурат.ЗэIукIэгъум икIэухым Адыгеим и ЛIы­шъхьэ кIэлэеджакIохэм ямурадхэм, ны-тыхэм, кIэлэегъаджэхэм, яныбджэгъу­хэм, ялэгъухэм зэфыщытыкIэу афыряIэхэм ягугъу зыщашIыгъэ зэдэгущыIэгъу адыриIагъ. КъумпIыл Мурат псауныгъэ пытэ яIэнэу, гъэхъэгъакIэхэр ашIынэу кIэлэцIыкIухэм афэлъэIуагъ, паспортхэр къы­зэратыгъэхэм ыкIи Урысыем и Мафэ афэшI джыри зэ къафэгушIуагъ.АР-м и ЛIышъхьэ ипресс-къулыкъу къытырэ къэбархэмкIэХъут Нэфсэт.