Гурыт еджапIэр къэзыухыхэрэм мы мафэхэм обществознаниемкIэ ыкIи физикэмкIэ заушэтыгъ.
Мы илъэсым еджапIэр къэзыухыхэрэм япроцент 43,5-мэ обществознаниемкIэ заушэтыгъ. Ащ итын зэхъокIыныгъэ фэхъугъэп. Ар сыхьати 3-рэ такъикъ 30-рэ кIуагъэ, IофшIэн 25-рэ къыдыхэлъытэгъагъ. Апшъэрэ еджапIэм чIэхьанхэм пае балл 42-м нахь мымакIэу къырахын фае.ФизикэмкIэ ушэтынми зэхъокIыныгъэ фэхъугъэп. IофшIэн 26-рэ ныбжьыкIэхэм къашIыгъ. Мы илъэсым физикэмкIэ зызыушэтыгъэхэр проценти 4-кIэ нахьыб ыкIи еджапIэр къэзыухыхэрэм япроцент 14-мэ къыхахыгъ.Ушэтыныр сыхьати 3-рэ такъикъ 55-рэ кIуагъэ. Ахэм линейкэ ыкIи программэ зытемыт калькулятор аIыгъынхэ фитыгъэх.Обществознаниемрэ физикэмрэ язэфэхьысыжьхэр мэкъуогъум и 23-м къэнэфэщтых. Ушэтыным ушъхьагъу зэфэшъхьафхэмкIэ къемыкIолIэшъугъэхэм IэпэчIэгъэнэ мафэхэр апэ илъых. ФизикэмкIэ — мэкъуогъум и 22-м, обществознаниемкIэ и 23-м ушэтынхэр атынхэ алъэкIыщт.Мэкъуогъум и 15-м биологиемкIэ, географиемкIэ ыкIи IэкIыб къэралыгъуабзэхэмкIэ (тхэнымкIэ) гурыт еджапIэхэр къэзыухыхэрэм заушэтыгъ.— Зэфэхьысыжьхэм къагъэнэфагъ мы предметхэр зытыхэрэм япчъагъэ зэрэхэхъуагъэр. ГъэрекIо егъэпшагъэмэ, биологиер зытыхэрэм нэбгырэ 97-рэ ахэхъуагъ, географиер къыхэзыхыгъэр нэбгырэ 39-кIэ, IэкIыб къэралыгъуабзэхэр нэбгырэ 24-кIэ нахьыбэ хъугъэх, — еIо шъолъыр гупчэм ипащэу Людмила Айриян.Биологиер сыхьати 3-рэ такъикъ 55-рэ, географиер — сыхьати 3, IэкIыб къэралыгъуабзэхэр сыхьати 3-рэ такъикъи 10-рэ кIуагъэх.Ушэтыныр атыгъэу алъытэным пае биологиемкIэ балл 36-рэ, географиемкIэ — балл 37-рэ, инджылызыбзэмкIэ (жэрыIомкIэ ыкIи тхэнымкIэ ) — 22-рэ анахь макIэу къырахын фае. Ау апшъэрэ еджапIэм чIэхьанхэм пае балл 40-м къыщыкIэ хъущтэп.БиологиемкIэ ыкIи географиемкIэ зэфэхьысыжьхэр мэкъуогъум и 27-м, инджылызыбзэмкIэ — и 30-м къэнэфэщтых.Япсауныгъэ изытеткIэ ушэтыныр зымытышъугъэхэм е ушъхьагъу зэфэшъхьафхэмкIэ емыкIолIэшъугъэхэм мэкъуогъум и 23-м, 24-м е 25-м атыжьын алъэкIыщт. IэкIыб къэралыгъуабзэмкIэ тхэн IофшIэныр мэкъуогъум и 22-м, жэрыIокIэ ушэтыныр и 23-м атыжьыщтых. Ащ нэмыкIэу ежь яшIоигъоныгъэкIэ зы ушэтын кIатыкIыжьын алъэкIыщт.ДЕЛЭКЪО Анет.