Республикэм икъэлэ шъхьаIэ
Урысыем и Мафэ фэгъэхьыгъэ Iофтхьабзэхэр Адыгеим имуниципалитетхэм зэкIэми ащыкIуагъэх. Республикэм икъэлэ шъхьаIэ пштэмэ, ахэм янахьыбэр къэлэ паркым, культурэм и Унэу «Гигантым» дэжь, мэз-парк гъэпсэфыпIэу «Мэздахэм» ащыкIуагъ. МэфэкI Iофтхьабзэхэр Лениным ыцIэ зыхьырэ Гупчэм концертэу къыщатыгъэмкIэ аухыгъэх. Ар рагъэжьэным ыпэкIэ ныбжьыкIэ активым патриотизмагъэ зыхэлъ флэшмоб зэхищэгъагъ. Ащ хэлажьэхэрэм къэралыгъом, етIанэ республикэм ягимнхэр къаIозэ Урысые Федерацием икъэралыгъо быракъ къаубгъугъ.Нэужым Адыгеим и ЛIышъхьэу КъумпIыл Мурат мэфэкI зэхахьэм къекIолIагъэхэм закъыфигъэзагъ. Тызхэт илъэсэу Урысые Федерацием и Президентэу Владимир Путиным лъэпкъхэм языкIыныгъэ и Илъэсэу къыгъэнэфагъэм Урысыем и Мафэ ихэгъэунэфыкIын анахьэу мэхьанэ ин зэриIэр шъолъырым ипащэ къыхигъэщыгъ.«Сыда пIомэ, зэкъотыныгъэр ары тикIэгъэкъон шъхьаIэ хъурэр. ЦIыфхэм цыхьэ зэфашIыжьэу, зэгурыIохэмэ мурад пстэури пхырыщыгъэ хъущт. Зы нэбгырэм бэ зэшIуихын ылъэкIыщт, ау узэгъусэмэ ары зэкIэри зыпшIэшъущтыр. Зэпстэуми зы тарихъ тызэрепхы. Ар тыкъызтекIыгъэхэм, лъэпкъ зэфэшъхьафхэм къахэкIыгъэхэу, зыч-зыпчэгъухэу тихэгъэгу хэхъоныгъэ езыгъэшIыгъэхэм, зэдатхыгъ. А зыкIыныгъэ хэбзэшIухэр непи пытэх: Урысыеми, ти Адыгейи зихабзэхэр, зыбзэ зэфэшъхьаф цIыф лъэпкъыбэ зэгурыIоу ащызэдэпсэу, — къыIуагъ АР-м и ЛIышъхьэ.КъумпIыл Мурат къызэрэхигъэщыгъэу, а зэпхыныгъэр тидзэкIолIхэу Хэгъэгум иухъумакIохэм лъагъэкIуатэ. Ахэм Урысыем ишъхьафитныгъэ къаухъумэ, титарихъ, тикультурэ, лъэпкъхэр мамырэу, зэгурыIоныгъэ азыфагу илъэу яхэгъэгу гупсэ щыпсэунхэм афэбанэх. ТидзэкIолIхэм ячIыпIэгъухэр сыдигъокIи зэракъотхэр ашIэ.«ХэушъхьафыкIыгъэ дзэ операцием хэлажьэхэрэм IэпыIэгъу афэхъухэрэм зэкIэми лъэшэу тафэраз. Республикэм хэхъоныгъэ ышIыным шъуиIахьышхо зэрэхашъулъхьэрэм, хъызмэтшIапIэхэм, губгъохэм, еджапIэхэм, сымэджэщхэм, бизнесым Iофышхоу ащышъушIэрэм афэшI «тхьашъуегъэпсэу» шъотэIо. Шъори, шъуигупсэхэми псауныгъэ пытэ шъуиIэнэу, шIоу щыIэ пстэур къыжъудэхъунэу сышъуфэлъаIо. ТидзэкIолIхэм ТекIоныгъэр къыдахынышъ псаухэу къагъэзэжьынэу афэсэIо. СичIыпIэгъухэр, мэфэкIымкIэ сышъуфэгушIо!», — къыIуагъ Адыгеим и ЛIышъхьэ.Депутатхэм ацIэкIэ мэфэкI зэхахьэм къекIолIагъэхэм къафэгушIуагъ АР-м и Къэралыгъо Совет — Хасэм и Тхьаматэу Владимир Нарожнэр. Шъолъыр Парламентым ипащэ тичIыпIэгъухэм яIофшIэн гуетыныгъэу фыряIэм, ти Родинэ цIыкIу ыкIи тихэгъэгу зэрэщытэу хэхъоныгъэ ашIыным фытегъэпсыхьагъэу Урысыем и Президент кIэщакIо зыфэхъухэрэм япхырыщын зэрэхэлажьэхэрэм фэшI лъэшэу зэрафэразэхэм къыкIигъэтхъыгъ. ХэушъхьафыкIыгъэ дзэ операцием хэлажьэхэу, я Хэгъэгу къэзыухъумэхэрэм зэрафэразэхэр шъхьафэу къыхигъэщыгъ. Владимир Нарожнэм лъэпкъхэм зыкIыныгъэу ахэлъыр гъэхъагъэхэм ыкIи хэхъоныгъэхэм зэрафэIорышIэщтым ицыхьэ зэрэтелъым къыкIигъэтхъыгъ.Пстэумэ ауж орэдыIохэм ыкIи творческэ купхэм мэфэкI концерт къатыгъ.