Апэрэ зыкI къэралыгъо ушэтынхэм язэфэхьысыжьхэр къэнэфагъэх. Балл анахь иныр нэбгыри 5-мэ къырахыгъ.
Мыекъопэ лицееу N 19-р къэзыухырэ Алиса Зоринам тарихъымкIэ балли 100 къырихыгъ. ХимиемкIэ анахь къэгъэлъэгъон дэгъур яI Красногвардейскэ районымкIэ гимназиеу N 1-м къычIэкIырэ Вероника Сергейчук, Мыекъопэ гурыт еджапIэу N 10-м щеджэгъэ Виолетта Куманяйкинам. Тэхъутэмыкъое районымкIэ гурыт еджапIэу N 6-р къэзыухырэ нэбгыритIумэ джащ фэдэу химиемкIэ балли 100 къахьыгъ. Ахэр Мелине Симонянрэ Хадижа Абдулхаликовамрэ.— Къэгъэлъэгъон анахь дэгъумкIэ сышъуфэгушIо. ГъэсакIохэм ыкIи ны-тыхэм яIахьышIу мыщ хэлъ, шIэныгъэ куу яIэнымкIэ, сэнаущыгъэ кIэлэцIыкIухэм ахэлъынымкIэ IофшIэнышхо зэрэжъугъэцакIэрэмкIэ сышъуфэраз, — къащеIо исоциальнэ нэкIубгъохэм АР-м и ЛIышъхьэ.БлэкIыгъэ илъэсым балли 100 нэбгыри 10-мэ къырахыгъагъ. Мы илъэсым къэгъэлъэгъонхэр джыри нахь дэгъунхэм зэрэщыгугъырэр КъумпIыл Мурат къеIо. Мы илъэсым къыщегъэжьагъэу балли 100 къизыхырэ ныбжьыкIэхэм предмет пэпчъ сомэ мини 100 зырыз аратыщт.— КIэлэеджакIохэм яинтеллектуальнэ, творческэ ыкIи физическэ сэнаущыгъэ ахэхъоным фэIорышIэрэ инфраструктурэм игъэпсынкIэ IофшIэнхэр джыри лъыдгъэкIотэщтых. Партиеу «Еди-нэ Россием» илъэпкъ проектхэу «Унагъу», «КIэлэцIыкIухэр ыкIи ныбжьыкIэхэр» зыфиIохэрэм яамалхэр зэрифэшъуашэу къызфэтэгъэфедэх. Хэхъоныгъэхэр ашIынхэмкIэ республикэм щыпсэурэ кIэлэцIыкIу пэпчъ зэфэдэ амалхэр яIэнхэр типшъэрылъ шъхьаI, — социальнэ хъытыухэм къащиIуагъ КъумпIыл Мурат.