А. Гусев
Хабзэ зэрэхъугъэу, зэIухыгъэ концертхэр Адыгеим изыгъэпсэфыпIэхэм къащатынхэу аублагъ.
Мы зыгъэпсэфыгъо мафэхэм классическэ мэкъамэм иконцерт зыгъэпсэфыпIэу «Мэздахэ» щызэхащагъ. АР-м и Къэралыгъо симфоническэ оркестрэ программэу «Призрак Оперы» къытыгъ.АР-м и ЛIышъхьэ исоциальнэ нэкIубгъо къызэрэхигъэщырэмкIэ, ащ фэдэ Iофтхьабзэхэу лIэуж зэфэшъхьафхэмрэ мэкъэмэ зэмылIэужыгъохэмрэ зэзыщалIэхэрэм мэхьанэшхо яI.— Республикэм щыпсэурэ пэпчъ культурэм лъыIэсыным тыпылъ. МыщкIэ мэхьанэ зиIэр инфраструктурэу дгъэпсыгъэр икъоу дгъэфедэныр ары: культурэм икъоджэ унэхэм кружокхэр, къэшъокIо купхэр, дэкIыгъо концертхэр ащызэхэщэгъэнхэр, зэлъашIэрэ ансамблэхэр ыкIи театральнэ купхэр къягъэблэгъэгъэнхэр муниципальнэ, къоджэ тхылъеджапIэхэм ыкIи музейхэм Iофтхьэбзэ зэфэшъхьафхэр ащызэхэщэгъэнхэр. ЗэIухыгъэ концерт къэтыпIэхэм тиансамблэхэм зыкъащагъэлъэгъоныр шэнышIу хъугъэ, ахэм цIыфыбэ къякIуалIэ. Ащ къыхэкIэу гъэмэфэ лъэхъаным Мыекъуапэ имызакъоу, район гупчэхэми ахэр ащыкIощтых, — къыIуагъ АР-м и ЛIышъхьэу КъумпIыл Мурат.ЗэхэщакIохэм ыкIи Къэралыгъо симфоническэ оркестрэм къэгъэлъэгъоныр шъошэ лъагэм илъэу агъэпсыгъ. Концертыр анахь къэзыгъэкIэрэкIагъэхэм ащыщ орэдыIоу Дарья Умбинар. Урыс лъэпкъ музыкальнэ Iэмэ-псымэхэм я Къэралыгъо оркестрэу «Русская удаль» зыфиIорэм исолистэу Абас Долэт, ансамблэу «Ислъамыем» иорэдыIохэу, АР-м изаслуженнэ артистэу Тыгъужъ Асиет, Темыр Осетием изаслуженнэ артистэу Дэкъшэкъо Динарэ концертым хэлэжьагъэх.Музыкальнэ пчыхьэзэхахьэм къекIолIагъэхэм ащыщыбэм жьы къабзэм хэтхэу, языгъэпсэфыгъо уахътэ агъэкIонымкIэ амал дэгъу яIэ зэрэхъугъэр зэрягуапэр къыхагъэщыгъ.«Мэздахэм» зыгъэпсэфыгъо мафэхэм ямызакъоу, нэмыкI мафэхэми зыщызыгъэпсэфыхэрэм япчъагъэ нахьыбэ зэрэхъурэр зэкIэми тинэрылъэгъу. ТапэкIи чIыпIэ Iэрыфэгъу дахэу мыр зэрэхъущтым тицыхьэ телъ.