Мыекъопэ къэралыгъо гуманитар-техническэ колледжым ихъарзынэщ.
Мы мафэхэм Мыекъопэ къэралыгъо гуманитар-техническэ колледжым къыщызэIуахыгъэ зекIо клубэу «Фыщт» зыфиIорэм зэнэкъокъу ин щыкIуагъ. «Спортивнэ зекIон» зыфиIорэм ылъэныкъокIэ Адыгэ Республикэм имуниципалитетхэм къарыкIыгъэ ныбжьыкIэхэм зыкъагъэлъэгъуагъ.
ЗекIо клубэу «Фыщтыр» Iофтхьабзэм кIэщакIо фэхъугъ, ащ иIэпыIэгъугъ Адыгэ Республикэм спортивнэ зекIонымкIэ Федерациер.Зэнэкъокъум ныбжь зэфэшъхьаф зиIэхэр хэлэжьагъэх. Ахэм спорт ухьазырыныгъэу яIэр, зекIо Iэмэ-псымэхэр зэрагъэфедэхэрэр, псынкIэу япшъэрылъхэр зэрэзэшIуахыхэрэр, щэIагъэу ахэлъыр къагъэлъэгъуагъ.Iофтхьабзэр мэфэкI шIыкIэм тетэу къызэIуахыгъ. Зэнэкъокъум хэлэжьагъэ пэпчъ дэгъоу зыкъыгъэлъэгъоным пылъыгъ. Спорт мэфэкI шъыпкъэ мы мафэр хъугъэ. Къафагъэуцугъэ пшъэрылъхэр зэрагъэцэкIэрэ уахътэм экспертхэр лъыплъагъэх.ЗекIо ныбжьыкIэхэм кIуачIэу яIэр къызэрагъэлъэгъуагъэм дакIоу, сэнаущыгъэу ахэлъым хагъэхъуагъ.ЗекIоным Iофым хэхъоныгъэхэр ышIынхэмкIэ клубэу «Фыщтым» мэхьанэшхо иI. Ар Мыекъопэ къэралыгъо гуманитар-техническэ колледжым бэмышIэу къыщызэIуахыгъ. Владимир Потаниным ишIушIэ фонд ишIуагъэкIэ проектыр гъэцэкIагъэ хъугъэ. Илъэс 13-м къыщегъэжьагъэу 17-м нэс зыныбжьыхэр ыпкIэ хэмылъэу зекIоным илъэныкъо зэфэшъхьафхэм афагъасэх, чIыопсым икъэухъумэнкIэ щынэгъончъэу узэрэзекIощтыр арагъашIэ.Мыщ фэдэ зэнэкъокъухэм язэхэщэн проектым къыдыхэлъытагъ. Клубым къекIуалIэхэрэм шIэныгъэу арагъэгъотыхэрэр щызэфахьысыжьых.Зэнэкъокъум анахь дэгъоу зыкъыщызыгъэлъэгъуагъэхэр къагъэнэфагъэх. Апэрэ чIыпIэр ахьыгъ гъэсэныгъэ тедзэ зыщызэрагъэгъотырэ гупчэм икIэлэцIыкIухэм, ятIонэрэ чIыпIэр афагъэшъошагъ Мыекъопэ гимназиеу N 22-м икIэлэеджэкIо купэу «Вершина 22» зыфиIорэм, ящэнэрэ хъугъэх Джэджэ районым къикIыгъэ ныбжьыкIэхэр. ТекIоныгъэ ыкIи хагъэунэфыкIырэ чIыпIэхэр къэзыхьыгъэхэм щытхъу тхылъхэр афагъэшъошагъэх.— Мы зэнэкъокъум джыри зэ къыгъэлъэгъуагъ зекIо спортыр ныбжьыкIэхэм зэрашIогъэшIэгъоныр. ЗекIо клубэу «Фыщтыр» цIыф кIуапIэ хъугъэ, спорт зэнэкъокъухэр щызэхэпщэщтхэмэ, Iэрыфэгъу, ныбжьыкIэхэм спорт ухьазырыныгъэ дэгъу яIэнымкIэ ишIогъэшхо къэкIо. Мыщ фэдэ зэнэкъокъухэр илъэс къэс зэхэщагъэ хъухэмэ, республикэм изекIо спорт хэхъоныгъэхэр ышIынымкIэ ишIуагъэ къэкIощт», — къыIуагъ АдыгеимкIэ зекIонымкIэ и Федерацие ипрезидентэу Владимир Зотовым.
ДЕЛЭКЪОАнет.