ШIуагъэ къытэу язэдэлэжьэныгъэ лъагъэкIуатэ

Адыгэ Республикэм и Правительствэ зычIэт унэм АР-м и ЛIышъхьэу КъумпIыл Мурат IофшIэгъу зэIукIэгъу щадыриIагъ Урысыем IэкIыб къэрал IофхэмкIэ и Министерствэ хэушъхьафыкIыгъэ пшъэрылъхэмкIэ и ЛIыкIоу Сергей Кошкиным ыкIи федерацием ишъолъырхэм, Парламентым, общественнэ зэхахьэхэм адыряIэ зэпхыныгъэхэмкIэ Департаментым ипащэ игуадзэу Кирилл Сапоженковым.

ЗэIукIэгъум джащ фэдэу хэлэжьагъэх Адыгэ Республикэм и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, Урысыем IэкIыб къэрал IофхэмкIэ и Министерствэ илIыкIоу Краснодар щыIэ Ольга Шалимовар, УФ-м IэкIыб къэрал IофхэмкIэ и Министерствэ и ЛIыкIо IофшIапIэу къалэу Краснодар щыIэм и УпчIэжьэгъоу Игорь Терзиян.Дунэе сатыу-экономикэ, научнэ-техническэ, гуманитар ыкIи социальнэ-культурнэ IофыгъохэмкIэ шъолъырымрэ УФ-м IэкIыб къэрал IофхэмкIэ и Министерствэрэ язэдэлэжьэныгъэ илъэныкъо зэфэшъхьафхэм ахэр атегущыIагъэх.«Урысыем IэкIыб къэрал Iоф­хэмкIэ и Министерствэ и ЛIыкIо IофшIапIэу къалэу Краснодар щыIэм IофшIэным илъэныкъо шъхьэIэ пстэухэмкIи зыпкъитыныгъэ зыхэлъ зэдэлэжьэныгъэ дытиI. ТызгъэгумэкIырэ, тищыкIэгъэ IофыгъохэмкIэ дипломатическэ IофышIэхэм яшIуагъэ къытагъэ­кIы, Адыгеим илIыкIохэр бизнесым епхыгъэу нэ­мыкI къэралхэм кIонхэ хъуми, дунэе зэлъыIэсыкIэ амалхэм япхыгъэ Iофыгъохэу къэу­цухэрэм язэшIохынкIи IэпыIэгъу къытфэ­хъух, — къыIуагъ АР-м и ЛIышъхьэу КъумпIыл Мурат.Республикэм ипащэ агу къызэригъэ­кIыжьыгъэмкIэ, IэкIыб къэрал IофхэмкIэ Министерствэм иIэпыIэгъу хэлъэу адыгэхэу хэгъэгу заулэмэ ащыпсэухэрэм ахэхьан ыкIи къахэхьанхэ амал щыIэ хъугъэ. Дунэе экспортым хэхъоныгъэ ышIынымкIи, культурнэ-гъэсэныгъэ, научнэ ыкIи нэмыкI проектхэр зэшIохыгъэнхэмкIи дипломатхэм IэпыIэгъу къа­раты, республикэм иэкономикэ пае IэкIыб къэрал инвестициехэри къызфэгъэфедэгъэнхэм иамал щыIэ мэхъу.Урысыем IэкIыб къэрал IофхэмкIэ и Министерствэ хэушъхьафыкIыгъэ пшъэ­рылъхэмкIэ и ЛIыкIоу Сергей Кошкиным къызэрэхигъэщыгъэмкIэ, Министерствэм ичIыпIэ къулыкъурэ республикэм игъэцэкIэкIо къулыкъухэмрэ язэдэлэжьэныгъэ лъэгэпIэ иным тетэу макIо.«Шъолъырым нахьышIоу Iоф зэрэдэтшIэщтым тынаIэ тетэгъэты, игъоу шъулъэ­гъухэрэр ыкIи шъуифэныкъоныгъэхэр гъэцэкIагъэ зэрэхъущтхэм яамал­хэм тяусэ, Урысыем IэкIыб къэрал IофхэмкIэ иминистрэу Сергей Лавровыр ахэплъэнэу шъуишIоигъоныгъэхэр лъытэгъэIэсых», — къыIуагъ Урысые Федерацием IэкIыб къэрал IофхэмкIэ и Министерствэ хэушъхьафыкIыгъэ пшъэрылъхэмкIэ и ЛIыкIо.Кирилл Сапоженковым къызэрэхи­гъэхъожьыгъэмкIэ, дунэе зэдэлэжьэныгъэм епхыгъэ пшъэрылъхэр зэкIэ Адыгеим шIуагъэ хэлъэу игъом гъэцэкIагъэ щэхъух, ащ фэдэ зыпкъитыныгъэ зы­хэлъ зэдэлэжьэныгъэ дэгъум пае респуб­ликэм ипащэхэм зэрафэразэри ащ къыхигъэщыгъ.Шъолъырым зекIонымкIэ, экономикэмкIэ, мэкъу-мэщымкIэ ыкIи нэмыкI лъэныкъохэмкIэ амалэу иIэхэр къыдалъы­тэхэзэ, дунэе зэпхыныгъэхэм тапэкIи нахь зызэрарагъэушъомбгъущтым епхыгъэ Iофыгъохэм зэIукIэгъум икIэухым щатегущыIагъэх.

АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.