А. Балабась
Партиеу «Единэ Россием» и Адыгэ шъолъыр къутамэ ия ХХХVIII-рэ конференцие Мыекъуапэ щыкIуагъ. Партием и Зэфэсэу мэкъуогъум ыкIэм Москва щыкIощтым Адыгеим ыцIэкIэ хэлэжьэщтхэр ащ щыхадзыгъэх. Джащ фэдэу 2026-рэ илъэсым ихэдзын кампание изыфэгъэхьазырын зэрэлъыкIуатэрэм зэхахьэм щытегущыIагъэх.
Конференцием иIофшIэн хэлэжьагъэх АР-м иминистрэхэм я Кабинет хэтхэр, Къэралыгъо Совет — Хасэм идепутатхэр, муниципальнэ образованиехэм, общественнэ организациехэм япащэхэр, партием дезгъаштэхэу Адыгэ шъолъыр къутамэм и Совет хэтхэр, чIыпIэ къутамэхэм ясекретарьхэр, партием и Адыгэ шъолъыр къутамэ и «НыбжьыкIэ гвардие» илIыкIохэр.АР-м и ЛIышъхьэу, «Единэ Россием» и Адыгэ шъолъыр къутамэ и Секретарэу КъумпIыл Мурат ыцIэкIэ конференцием хэлажьэхэрэм шIуфэс къарихыгъ партием икъутамэ игъэцэкIэкIо комитет ипащэу АфэшIэгъо Рэмэзан.
ХэушъхьафыкIыгъэ дзэ операцием щыIэхэм IэпыIэгъу ягъэгъотыгъэным ыкIи партием инароднэ программэ игъэцэкIэн чанэу хэлэжьэрэ гуфакIохэм «Единэ Россием» и Адыгэ шъолъыр къутамэ ыкIи АР-м ибзылъфыгъэхэм я Союз ацIэкIэ рэзэныгъэ тхылъхэр Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуардрэ бзылъфыгъэхэм я Союз ипащэу Вэрэкъо Хьалымэтрэ аратыжьыгъэх. Джащ фэдэу республикэм щыщхэу «Единэ Россием» хэхьагъэхэм ар къэзыушыхьатырэ тхылъхэр АфэшIэгъо Рэмэзанрэ хэушъхьафыкIыгъэ дзэ операцием иветеранэу, «ЛIыхъужъхэм яуахът» зыфиIорэ федеральнэ программэм хэтэу Сергей Ковалевымрэ аратыжьыгъэх.— АР-м и Къэралыгъо Совет — Хасэм идепутат хъунхэмкIэ зикандидатурэхэр электроннэ мэкъэтыным пхырыкIыгъэхэм ятхылъхэм ягъэхьазырын игъэкIотыгъэу дэлэжьэнхэ фае. Бэдзэогъум ыгузэгухэм анэс АР-м хэдзынхэмкIэ и Гупчэ комиссие ахэр ратынхэм фэхьазырынхэу партием ичIыпIэ къутамэхэм япащэхэм сыкъяджэ, — хигъэунэфыкIыгъ АфэшIэгъо Рэмэзан.Джащ фэдэу «Единэ Россием» и Зэфэсэу мы мазэм ыкIэм Москва щыкIощтым АР-м илIыкIо купэу нэбгырэ 25-рэ зыхэтыщтыр зэрэхэлэжьэщтыр АфэшIэгъо Рэмэзан къыIуагъ. Зэфэсым илIыкIохэу конференцием щыхадзыгъэх Мыекъопэ къэлэ администрацием ипащэу Геннадий Митрофановымрэ Тэхъутэмыкъое районым инароднэ депутатхэм я Совет итхьаматэу Апсэламэ Руслъанрэ.Тэу Замир.