Чир спортымкIэ ыкIи спорт жъугъэмкIэ Дунэе ыкIи Урысые зэнэкъокъухэр къалэу Самарэ щыкIуагъэх. Ахэм къэралыгъом ишъолъыр 39-мэ яспорт клуби 152-мэ ялIыкIо 4689-рэ ахэлэжьагъ.Мы спорт лъэпкъыр команднэ зэнэкъокъоу щыт, акробатикэр, гимнастикэр, хореографиер ык1и къэшъоныр ащ къыдыхэлъытагъэх.
Адыгэ Республикэр къэзыгъэлъэгъуагъэхэр Мыекъопэ спорт еджапIэу С.М. Джэнчатэм ыцIэ зыхьырэм зыщызыгъасэхэрэр ары. Тиспортсменхэм хагъэунэфыкIырэ чIыпIищ къыдахыгъ. Диана Киселевар, Игнат Лузган, Кира Поляковар ыкIи Дарья Слободченкэр зыхэхьэгъэхэ зэхэпхъэгъэ командэм текIоныгъэр къыдихыгъ. Апэрэ чIыпIэр къыфагъэшъошагъ Ульяна Перепелица, Анастасия Золотцевар, Никита Середницкэр ыкIи Арина Бушмалевар зыхэтыгъэхэ командэм. Алиса Спицинам, Диана Молотовам, Вероника Резниченкэм ыкIи Венера Косиненкэм джэрз медальхэр къахьыгъэх. Тренерхэу Денис ыкIи Ирина Махноносовхэм, спортымкIэ инструкторэу Софья Водяник, хореографэу Абэзэ Алинэ спортсменхэр агъэхьазырыгъэх.