А. Гусев
Адыгеим и ЛIышъхьэу КъумпIыл Мурат ветеринар, фитосанитар лъыплъэнымкIэ Федеральнэ къулыкъум и Къыблэ шъолъыр гъэIорышIапIэ ипащэу Юрий Епановым IукIагъ.
Уцыжъхэм, псэушъхьэхэм къяутэлIэрэ узхэм зэрябэныжьхэрэм, чIыгум епхыгъэ хэбзэгъэуцугъэхэр зэрагъэцакIэхэрэм, уплъэкIун Iофтхьабзэхэр зезыхьэрэ къулыкъухэм зэрадэлажьэхэрэм ащ щатегущыIагъэх.ЗэIукIэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, ащ игуадзэу ЛIыхэсэ Махьмуд, министерствэхэу, къулыкъухэу мэкъу-мэщым, ветеринарием, тыкъэзыуцухьэрэ дунаимрэ чIыопс къэкIуапIэхэмрэ якъэухъумэн афэгъэзагъэхэм япащэхэр.Россельхознадзорым и Къыблэ шъолъыр гъэIорышIапIэ ипащэ зэрэхигъэунэфыкIыгъэмкIэ, уцыжъхэм, анахьэу амброзием, ябэныжьыгъэнымкIэ 2025-рэ илъэсым республикэм амалыбэ щызэрахьагъ. ЧIыгу Iахьхэр зиехэм уплъэкIун 600-м ехъу арашIылIагъ. Тхьаусыхэ тхылъэу къаIэкIэхьэгъэ пстэумкIи ищыкIэгъэ амалхэр зэрахьагъэх.«Адыгеим имэзхэр, ичIыгухэр зэрищыкIагъэм лъыкIахьэу Iыгъыгъэнхэм мэхьанэшхо иI. УплъэкIунхэр зэрашIылIэрэ чIыгу Iахьхэм ахэгъэхъогъэн фае уцыжъхэр къызыщыкIырэ ыкIи зыщышъхьэлъэрэ чIыпIэхэр нахь макIэ шIыгъэнхэм фэшI. Джыдэдэм охътэшIур зыIэкIамыгъэкIыным мэхьанэшхо иI. Хэбзэ къулыкъухэм, муниципалитетхэм, хъызмэтшIапIэхэм япшъэрылъ шъхьаIэхэм ар зэу ащыщ», — къыIуагъ КъумпIыл Мурат.Министерствэ, къулыкъу гъэнэфагъэхэм япащэхэм пшъэрылъ афашIыгъ федеральнэ автомобиль гъогухэмрэ псэупIэхэм ягъунапкъэхэмрэ язытет нахьышIу ашIынэу. Амброзиер бэдзэогъум — шышъхьэIум иублэгъу къызэрэкъэгъагъэрэр къыдалъытэзэ, джыдэдэм ар къызыщыкIырэ чIыпIэхэм якъыхэгъэщын мэхьанэшхо зэриIэр зэIукIэм щыхагъэунэфыкIыгъ. Мы лъэныкъомкIэ Россельхознадзорым и Къыблэ шъолъыр гъэIорышIапIэ Iутхэм яIофшIэнкIэ республикэм и ЛIышъхьэ щыкIэгъэ заулэ афилъэгъугъ.Iофтхьабзэм хэлэжьагъэхэр чIыгу Iахьэу амыгъэфедэхэрэр, чIыгум епхыгъэ Кодексыр аукъозэ агъэфедэрэ чIыгу Iахьхэр къыхэгъэщыгъэнхэм япхыгъэ Iофыгъохэми атегущыIагъэх. ЧIыгу Iахьхэр зыгъэфедэрэ заулэмэ зэрадэгущыIагъэхэр, зэрафагъэпытагъэр зэIукIэм къыщыхагъэщыгъ. ЧIыгу Iахьхэр зэрагъэфедэрэмкIэ муниципальнэ уплъэкIунхэу Россельхознадзорым испециалистхэр къызыхэлажьэхэрэм нахьыбэу шIуагъэ къягъэтыгъэнымкIэ IофышIэ куп зэхащагъ.Республикэм и ЛIышъхьэ псэупIэхэр къэбзэнхэм, былымхэм зэпахырэ узхэм ахэм закъыщимыштэным япхыгъэ Iофыгъохэми анаIэ тыраригъэдзагъ.БлэкIыгъэ илъэсым муниципалитет заулэмэ мыгъэнэфэгъэ чIыпIэхэм гъогогъу 16-рэ хэкIхэр щарадзыгъэу агъэунэфыгъ. Ахэм ащыщэу 14-р аукъэбзыжьыгъ. Мыгъи хэкIитэкъупIи 9 къыхагъэщыгъ, ахэмкIэ муниципалитетхэм дэо тхылъхэр афарагъэхьыгъ. БылымIыгъыпIэхэм протоколхэм адиштэу былымхэм вакцинэхэр щахалъхьэх. КъумпIыл Мурат къулыкъухэм пшъэрылъ афишIыгъ мы лъэныкъомкIэ яIофшIэн нахь агъэлъэшынэу, былымIыгъыпIэхэм ыкIи унэе хъызмэтшIапIэхэм ащаIыгъ былымхэм язытет лъэшэу гъунэ лъафынэу.АР-м и ЛIышъхьэипресс-къулыкъу къытырэкъэбархэмкIэ ЛIышэ Саныет.