Гурыт еджапIэр къэзыухыхэрэм ятIонэрэ шIокI зимыIэ ушэтынэу хьисапыр атыгъ. Мы аужырэ илъэсхэм ар тIоу гощыгъэ — базовэ ыкIи профильнэ лъэныкъохэмкIэ.
Апшъэрэ еджапIэм чIэхьан мурад зимыIэхэм е хьисапыр яеджэнкIэ зимыщыкIэгъэщтхэм базовэ программэм тетэу аты, профильнэр мы предметыр нахь къызыфэфедэжьыщтхэм къыхахы. Мы мафэм шъхьадж зэпхыгъэ чIыпIэм екIолIагъ.АР-м и Къэралыгъо аттестационнэ къулыкъу къызэрэщытаIуагъэмкIэ, мы мафэм базовэ шIыкIэм тетэу нэбгырэ 1215-мэ, профильнэмкIэ — 858-мэ заушэтыгъ. Мы аужрэ илъэсхэм профильнэ хьисапыр зытыхэрэм япчъагъэ хэхъуагъ. ГущыIэм пае, 2024-рэ илъэсым нэбгырэ 623-мэ, 2025-м — 648-мэ атыгъ. Ащ къеушыхьаты инженерно-техническэ, физико-хьисап ыкIи экономическэ лъэныкъохэр нахь къызэрэхахыхэрэр.Ушэтыныр зыщатырэ чIыпIэ 11-мэ Iоф ашIагъ, шапхъэхэм адимыштэу зи агъэунэфыгъэп.ХьисапымкIэ ушэтыным зэхъокIыныгъэ фэхъугъэп, базовэ лъэныкъом упчIэ 21-рэ хэтыгъ, сыхьати 3 заушэтыгъ. Ушэтыныр атыгъэу щытыным пае анахь макIэу упчIи 7-мэ джэуап тэрэз къаратыжьын фэягъ. Профильнэм упчIэ 19-рэ хэтыгъ, ар сыхьати 3-рэ такъикъ 55-рэ кIуагъэ. Аттестатыр къаратыжьыным пае анахь макIэу балл 27-рэ къырахын фае, апшъэрэ еджапIэм чIэхьанхэр балл 40-м къыщежьэ.Мэкъуогъум и 20-м къыщегъэжьагъэу хьисапымкIэ ушэтыным изэфэхьысыжьхэр къэнэфэщтых. Ар зыфэмытыгъэхэм е ушъхьагъу зэфэшъхьафхэм апкъ къикIыкIэ къемыкIолIэшъугъэхэм IэпэчIэгъэнэ мафэ яIэщт.ДЕЛЭКЪО Анет.