КIэлэцIыкIухэм ыкIи ныбжьыкIэхэм япроектхэм япхыгъэ зэнэкъокъоу Апэрэхэм я Движение зэхищагъэм изэфэхьысыжьхэр къэнэфагъэх. Мыгъэ ар ящэнэрэу рагъэкIокIыгъ.
Илъэсныкъом къыкIоцI зэнэкъокъум хэлэжьэрэ купхэм шIуагъэ къэзытыщт гъэцэкIэнхэр ашIыгъэх, Iофтхьэбзэ зэфэшъхьафхэр зэхащагъэх, социальнэ мэхьанэ зиIэ проектхэр щыIэныгъэм щыпхыращыгъэх, шIушIэным епхыгъэ Iофхэр агъэцэкIагъэх.ЗэфэхьысыжьхэмкIэ Урысые Федерацием ишъолъыр 84-мэ ащыщхэм агъэцэкIэгъэ проект 2000-мэ текIоныгъэ къыдахыгъ. Ахэм сомэ мин 200-м къыщегъэжьагъэу миллионым нэс афагъэшъошэщт. ЗэкIэмкIи шIухьафтын фондыр сомэ миллион 475-рэ мэхъу.ПсэупIэ цIыкIухэм ащыщхэм нахь дэгъоу зыкъагъэлъэгъуагъ. ТекIоныгъэ къыдэзыхыгъэхэм ащыщэу процент 54-р къутырхэм, поселкэхэм, къуаджэхэм ащыщых.Зэнэкъокъум зэкIэмкIи куп 19597-рэ хэлэжьагъ, кIэлэеджэкIо ыкIи гъэсэкIо 199345-рэ хъущтыгъэх.Зэнэкъокъум текIоныгъэ къыщыдэзыхыгъэхэр ыкIи сомэ миллион зыфагъэшъошагъэхэр Республикэу Башкортостан икъалэу Уфа дэт кIэлэцIыкIу IыгъыпIэу N 11-р, Самарскэ хэкум ит гимназиеу N 1-р, Ивановскэ коррекционнэ еджапIэу N 3-р, Кемеровскэ хэкум ит гурыт еджапIэу N 74-р, Республикэу Башкортостан икъалэу Янаул дэт кIэлэцIыкIу IыгъыпIэу N 7-р.Апэрэхэм я Движение ишъолъыр къутамэу Адыгеим щыIэм зэхищэгъэ купи 126-рэ мы зэнэкъокъум хэлэжьагъ. Ахэм ащыщэу купитIумэ текIоныгъэ къыдахыгъ. «Лига возможностей» зыфиIорэ лъэныкъомкIэ гурыт еджапIэу N 11-м ыкIи гурыт еджапIэу N 2-м икIэлэеджакIохэм зэрифэшъуашэу зыкъагъэлъэгъуагъ ыкIи сомэ мин 200 зырыз къаратыщт.Зэнэкъокъум хэлэжьагъэхэм зэкIэмкIи IофшIэн 212578-рэ агъэцэкIагъ, ахэм ащыщэу 102220-м социальнэ мэхьанэ яIагъ, 34095-мэ гуфэкIо Iофтхьабзэхэр зэхащагъэх.2026 — 2027-рэ илъэс еджэгъум яплIэнэрэу зэнэкъокъур зэхащэнэу мурад яI. Непэрэ мафэм ехъулIэу Апэрэхэм я Движение нэбгырэ миллион 12-м ехъу хэт, Урысыем ишъолъыр 89-мэ ащ икъутэмэ мин 50-м ехъумэ Iоф ащашIэ.ЗыгъэхьазырыгъэрДЕЛЭКЪО Анет.