Iэшъынэ А.
Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу зэтырагъэпсыхьащт чIыпIэхэм якъыхэхынкIэ Урысые онлайн-мэкъэтыныр мы уахътэм макIо.
Ар мэлылъфэгъум и 21-м аублагъ, непэрэ мафэм ехъулIэу Адыгеим щыщ нэбгырэ мин 43-м ехъу хэлэжьагъ. Мэкъуогъум и 12-м аухыщт.Мы мэкъэтыныр апэрэ илъэсэп Урысыем зыщызэхащэрэр. Ау мы илъэсым къыщегъэжьагъэу УФ-м и Президентэу Владимир Путиным иунашъокIэ нэбгырэ мин 20-м къыщымыкIэу зыдэс псэупIэхэр ащ къыхеубытэх.Мэкъэтыным хэлэжьэрэ псэупIэхэм ащыщэу Кощхьаблэ мы мафэхэм тыщыIагъ. Къоджэ псэупIэм ипащэу Хьамдэхъу Байзэт гущыIэгъу тыфэхъугъ. Ащ къызэриIуагъэмкIэ, мы программэм апэрэу хэлажьэх ыкIи цIыфхэм амакъэхэр афатынхэу чIыпIитIу къырагъэуцуагъэр. Къуаджэм ипчэи мэз цIыкIу изэтегъэпсыхьанрэ урамэу Степноим кIэлэцIыкIу джэгупIэ щышIыгъэнымрэ.— Илъэс пчъагъэкIэ узэкIэIэбэжьымэ пчэй мэз цIыкIукIэ зэджэгъэхэ чIыпIэр агъэпсыгъагъ. Ар къоджэ гупчэм пэчыжь, гъогуи 7 щызэхэкIы ыкIи урам анахь инхэм ащыщэу Шъэумэн Хьазрэт ыцIэ зыхьырэм икъежьапI. ГъэрекIо къоджэ псэупIэхэм хэхъоныгъэхэр ашIынхэм фытегъэпсыхьэгъэ программэм къыдыхэлъытагъэу мы гъогум игъэкIотыгъэ гъэцэкIэжьынхэр етшIылIагъэх. Джы урамым тесхэр мы чIыпIэр зэтедгъэпсыхьанэу, лъэхъаным диштэрэ гъэпсэфыпIэ чIыпIэ дахэ яIэным къыкIэлъэIух. Ащ ахъщэшхо зэрэпэIухьащтым къыхэкIыкIэ зи тфешIэщтыгъэп, джы мы программэм иамалхэр къызфэтэгъэфедэ. ЯтIонэрэ чIыпIэр урамэу Степноим кIэлэцIыкIу джэгупIэ щытшIыныр ары, — еIо тигущыIэгъу.
Мы чIыпIэхэр къыхахынхэм пае цIыфхэм яшIоигъоныгъэ къыдалъытагъ ыкIи нахь макъыбэ зыфатыгъэр ары агъэцэкIэжьыщтыр. Къуаджэм тызыкIогъэ мафэм ехъулIэу къоджэдэсхэр мэкъэты-ным чанэу зэрэхэлажьэхэрэр Хьамдэхъу Байзэт къыхигъэщыгъ. Къуаджэм ипчэи мэз цIыкIу мэкъэ 2600-м кIахьэу фатыгъэхагъ, урамэу Степноим кIэлэцIыкIу джэгупIэ щышIыгъэным нэбгыри 165-мэ дырагъэштагъ.— Зэфэхьысыжьхэр джыри тшIыгъэхэп, ау пчэи мэз цIыкIур мэкъэтынымкIэ ыпэ зэришъыгъэр гъэнэфагъэ. Ахъщэ къызытфатIупщыкIэ, ыпэрапшIэу чъыгхэр итхыжьыщтых, сыда пIомэ, пчэи чъыгхэр жъы хъугъэх. ЧIыпIэр лъэхъаным диштэу зэтедгъэпсыхьанэу тыфай, чъыгхэр, куандэхэр, къэгъагъэхэр кIэу щыдгъэтIысхьащтых, къэзыгъэнэфырэ пкъыгъохэр дгъэуцущтых, кIэлэцIыкIухэм джэгупIэ чIыпIэ афэтшIыщт, нахьыжъхэм апае тетIысхьапIэхэр дгъэуцущтых, — еIо тигущыIэгъу.Зыныбжь илъэс 14 икъугъэхэм къащегъэжьагъэу платформэ зыкIэу «Къэралыгъо фэIо-фашIэхэр» зыфиIорэм ихьанхэшъ мэкъэтыным хэлэжьэнхэ амал яI.— Къэралыгъо программэхэм шIуагъэу апылъыр нэрылъэгъу, тызыхэлэжьэн тлъэкIыщтхэр блэдгъэкIыхэрэп, цIыфхэм заIутэгъакIэ, тызэхэгущыIэжьы, чIыпIэхэр къыхэтэхых. Тикъоджэ гупчэ дэгъоу зэтегъэпсыхьагъэ хъугъэ, джы нэмыкI къогъу къуачIэхэм гъогухэр ащызэтедгъэпсыхьанхэу, кIэлэцIыкIу площадкэхэр тшIынхэу тыфай, — еIо Хьамдэхъу Байзэт.Мы аужырэ илъэсхэм къэралыгъо программэ зэфэшъхьафхэм яшIуагъэкIэ къуаджэм хэхъоныгъэу ышIыгъэхэр нэужым тигущыIэгъу къыIотагъэх. «Къуаджэхэм зэдиштэу хэхъоныгъэ ягъэшIыгъэныр» зыфиIорэм къыдыхэлъытагъэу кIэлэцIыкIу IыгъыпIэм ишIын гъэрекIо рагъэжьагъ, IофшIэным ипроцент 80-м ехъу агъэцэкIэгъах. Ащ пэмычыжьэу кIэлэцIыкIухэм ясэнаущыгъэ зыщыхагъэхъощт гупчэу «Кванториум» зыфиIорэр агъэпсы, къэкIорэ илъэсым ар аухыщт. Мы илъэсым ыкIэм нэс кинотеатрэу зэтырагъэпсыхьэрэр атыщт. Джащ фэдэу атлетикэ онтэгъумкIэ спортзал ашIы ыкIи физкультурэмрэ псауныгъэм игъэпытэнрэ япхыгъэ зэIухыгъэ чIыпIэ зэтырагъэпсыхьагъ. Ащ нэмыкIэу гъэрекIо километри 6 хъурэ гъогухэр зэтырагъэпсыхьагъэх, мы илъэсым джыри гъогуищ ашIынэу щыт.ДЕЛЭКЪО Анет.