Атлетикэ онтэгъумкIэ Урысыем ипервенствэ мэкъуогъум и 1-м къыщегъэжьагъэу и 7-м нэс Ямало-Ненецкэ автоном хэкум икъалэу Ноябрьскэ щыкIуагъ. Мыщ илъэс 15 — 23-рэ зыныбжь кIалэхэр ыкIи пшъашъэхэр хэлэжьагъэх, Урысыем ишъолъыр 47-мэ къарыкIыгъэ спортсмен 211-мэ заушэтыгъ. Адыгэ Республикэм илIыкIохэм гъэхъэгъэшIухэр ашIыгъэх, медалих къахьыгъ.
Анахьэу къахэбгъэщын фаер Урысыем спортымкIэ имастерэу Роман Оглы. Ар килограмм 55-м нэс къэзыщэчыхэрэм якуп хэтыгъ, республикэм илIыкIо ухьазырыныгъэ дэгъу къыгъэлъэгъуагъ, къэралыгъом тIогъогогъо ичемпион хъугъэ, джащ фэдэу «рывок» зыфаIорэмкIэ тыжьын медаль къыфагъэшъошагъ. Тибатыр екIолIэгъуитIум килограмм 203-рэ къыIэтыгъ. Ар зыгъасэрэр зэлъашIэрэ тренерэу Сихъу Аслъан.
Тэхъутэмыкъое районым щыщ Ацумыжъ Самири зэнэкъокъум дэгъоу зыкъыщигъэлъэгъуагъ, ащ тыжьын медалитIурэ зы джэрзрэ къыхьыгъэх. ЕкIолIэгъуитIумкIэ килограмм 236-рэ къыIэтыгъ.Тиспортсменхэм ыкIи ахэр зыгъасэхэрэм тафэгушIо, тапэкIи мыщ фэдэ гъэхъэгъэшIухэр ашIынхэу, республикэм ыцIэ дахэкIэ рарагъэIонэу афэтэIо.