Теннис цIыкIумкIэ зэнэкъокъухэр Краснодар краим икъалэу Лабинскэ щыкIуагъэх. Урысыем и Къыблэ испортсмен ныбжьыкIэхэр текIоныгъэм ыкIи хагъэунэфыкIырэ чIыпIэхэм афэбэнагъэх. Краснодар ыкIи Ставрополь крайхэм, Ростов хэкум, Адыгеим, Къэбэртэе-Бэлъкъарым, Къырым ялIыкIохэр зэнэкъокъугъэх. Ахэр кIэли 196-рэ ыкIи пшъэшъи 159-рэ хъущтыгъэх.
Мыхэр ныбжьыкIэх нахь мышIэми, ухьазырыныгъэ дэгъу зэраIэкIэлъыр къагъэшъыпкъэжьыгъ, нахьыжъхэм афэдэу джэгугъэх. Адыгэ Республикэр къэзыгъэлъэгъуагъэхэр къалэу Мыекъуапэ, Кощхьэблэ ыкIи Тэхъутэмыкъое районхэм ятеннисистхэр ары. Ахэм медалищ къахьыгъ.НахьыкIэхэм якуп зыщызыушэтыгъэхэ Дмитрий Устянскэмрэ Пелагея Калининамрэ (тIури Кощхьэблэ районым ипсэупIэу Вольнэм щыщых) джэрз медальхэр къахьыгъэх. Мы псэупIэ дэдэм илIыкIоу Арсений Семеновым ятIонэрэ чIыпIэр къыфагъэшъошагъ. ХагъэунэфыкIырэ чIыпIэхэр къыдэзыхыгъэхэр зыгъасэхэрэр Игорь Асоцкэр ары.
Турнирым текIоныгъэр къыщыдэзыхыгъэхэр: Максим Ткач (Тимашевск), София Богдан (Симферополь), Дмитрий Мойсейкэр (Ростов-на-Дону), София Ляльченкэр (Славянск-на-Кубани), Кирилл Амосовыр (Шъачэ), Самира Черныш (псэупIэу Ильскэр).Турнирым изэфэхьысыжьхэм къагъэлъэгъуагъ Адыгеим испортсменхэр мэхьанэшхо зиIэ зэнэкъокъухэм ащытекIонхэм зэрэфэхьазырхэр. Арышъ, гъэхъэгъакIэхэм тяжэ.