В. Погосян
Урысыем IофшIэнымкIэ и ЛIыхъужъэу, Адыгеим, Къэбэртэе-Бэлъкъарым, Къэрэщэе-Щэрджэсым, Абхъазым янароднэ тхакIоу, СССР-м, РСФСР-м ыкIи Адыгеим я Къэралыгъо шIухьафтынхэм ялауреатэу, Урысые общественнэ-политическэ премиеу «Гордость нации» зыфиIорэр къызфагъэшъошагъэу, общественнэ IофышIэшхоу МэщбэшIэ Исхьакъ ыныбжь илъэс 96-рэ зэрэхъугъэмкIэ цIыфыбэ къыфэгушIуагъ.
МэщбэшIэ Исхьакъ цIыф гъэшIэгъон дэд, ихэгъэгу фэшъыпкъ. Республикэми хэгъэгуми яобщественнэ, яполитическэ щыIэныгъэ хэхъухьэрэ пстэуми дэгъоу ащыгъуаз, IэкIыб къэралыгъохэм арыс тилъэпкъэгъухэм ящыIакIэ лъэплъэ. Ар щыIэныгъэр куоу изышIыкIыгъэ цIыф хьалэмэт.Урысые Федерацием и Президентэу Владимир Путиным шIуфэс телеграммэ тхакIом къыфигъэхьыгъ:«Лъытэныгъэ зыфэсшIырэ Исхьакъ Шумафэ ыкъор! Уныбжь илъэс 96-рэ зэрэхъугъэмкIэ сыгу къыздеIэу сыпфэгушIо!ШъуилIэуж ушэтынышхохэр зэпичынхэ, тарихъ текIоныгъэшхохэр ышIынхэу хъугъэ. Шъори, шъуиныбджэгъухэми ренэу хьалэлэу шъулэжьагъ, тиIоф зэрэзафэм шъуицыхьэ телъыгъ, лIыхъужъныгъэ зешъухьэзэ, псэемыблэжьэу Iоф шъушIэзэ Къэралыгъошхор жъугъэпсыгъэ.ЩыIэныгъэ гъогоу къэпкIугъэмкIэ, Хэгъэгур шIу зэрэплъэгъурэмкIэ, ащ къырыкIощтым узэригъэгумэкIырэмкIэ непэ ныбжьыкIэхэми, тэркIи щысэтехыпIэшIоу ущыт. Псауныгъэ уиIэнэу, шIоу щыIэр зэкIэ къыбдэхъунэу сыпфэлъаIо!»УФ-м и Президент и Администрацие ипащэ иапэрэ гуадзэу Сергей Кириенкэр тхэкIо цIэрыIом къыфэгушIуагъ.«Лъытэныгъэ зыфэсшIырэ Исхьакъ Шумафэ ыкъор. Уныбжь илъэс 96-рэ зэрэхъугъэмкIэ сыгу къыздеIэу сыпфэгушIо. ЛитературэмкIэ зэчыишхо зэрэпхэлъым, бэ зэрэпфэукIочIырэм, уикIэсэ Iофым угу етыгъэу узэрэпылъым яшIуагъэкIэ творческэ гъэхъагъэхэр пшIынхэ, тхэкIо, усэкIо, зэдзэкIэкIо цIэрыIо ухъун, цIыф лъэпкъыбэмэ якультурэрэ яшэн-хэбзэ шIагъохэмрэ язегъэушъомбгъун уиIахьышIу хэпшIыхьан плъэкIыгъ. ЦIыф жъугъэхэм яфедэхэм якъэухъумэн, общественнэ Iофхэм чанэу узэрахэлажьэрэм, Урысыем итхакIохэм я Союз и Адыгэ шъолъыр къутамэ итхьамэтэ IэнатIэ дэгъоу зэрэбгъэцакIэрэм афэшI лъытэныгъэшхо къыпфашIы. Псауныгъэ пытэ уиIэу, угушхоу бэрэ ущыIэнэу, шIоу щыIэр зэкIэ къыбдэхъунэу сыпфэлъаIо», — къыщеIо телеграммэм.Адыгеим и ЛIышъхьэу КъумпIыл Мурат ителеграммэ къыщитхыгъ:«Лъытэныгъэ зыфэсшIырэ Исхьакъ Шумафэ ыкъор. Укъызыхъугъэ мафэм фэшI гуфэбэныгъэ хэлъэу сыпфэгушIо! УищыIэныгъэ зэрэпсаоу литературэм, культурэм ыкIи Хэгъэгум гуетыныгъэшхо хэлъэу узэрафэлэжьэн фаемкIэ щысэ шIагъоу щыт.Адыгеир къыорэгушхо, уитворчествэ, республикэм имызакъоу, зэрэ Урысыеу икультурнэ кIэн изы Iахь.ТхэкIо, усэкIо цIэрыIоу узэрэщытым елъытыгъэу къыптефэ шъыпкъэу джырэ классикэу, щыIэныгъэ гъогу гъэшIэгъон къэзыкIугъэ цIыфэу уалъытэ. Илъэсыбэ хъугъэу урысые литературэм, адыгабзэм якъэухъумэн уиIахьышхо хэошIыхьэ».МэщбэшIэ Исхьакъ Урысые Федерацием и Общественнэ палатэ хэтэу лъэпкъ ыкIи дин зэфыщытыкIэхэр гъэпытэгъэнхэм яIофыгъохэм адэлажьэ.ГущыIэ фабэхэр зэрыт тхыгъэ тхэкIо цIэрыIом къифигъэхьыгъ АР-м и Парламент и Тхьаматэу Владимир Нарожнэм.«МэщбэшIэ Исхьакъ адыгэ лъэпкъ литературэм иклассик зэрэхъугъэм имызакъоу, республикэм ыкIи хэгъэгум зэдыряунае хъугъэ произведение пшIы пчъагъэ икъэлэмыпэ къычIэкIыгъ. Федеральнэ ыкIи шъолъыр мэхьанэ зиIэ тын лъапIэхэмкIэ уиIофшIагъэхэм уасэ къафашIыгъ, щыIэныгъэ гъогоу къэпкIугъэм пае лъэпкъ зэфэшъхьафыбэхэм лъытэныгъэ къыпфашIы, къыпфэразэх», — къыIуагъ Владимир Нарожнэм.МэщбэшIэ Исхьакъ фэбагъэ хэлъэу къыфэгушIуагъэх Къэбэртэе-Бэлъкъарым и ЛIышъхьэу КIокIо Казбек, Къэрэщэе-Щэрджэсым и ЛIышъхьэу Рашид Темрезовыр, Абхъазым и Президентэу Бадра Гунба, Краснодар краим игубернаторэу Вениамин Кондратьевыр, УФ-м и Общественнэ палатэ исекретарэу Лидия Михеевар, сенаторхэу Хъопсэрыкъо Муратрэ Александр Наролинымрэ, Къэралыгъо Думэм идепутатхэу Владислав Резник, Хьасанэкъо Мурат, Пэнэшъу Къэплъан, сенаторэу Къанэкъо Арсен, Дунэе Адыгэ Хасэм ипрезидентэу Сэхъурэкъо Хьаути.Ащ нэмыкIэу Адыгеим икъалэхэм ыкIи ирайонхэм япащэхэр, тхылъеджэхэр, IэкIыбым щыпсэурэ тилъэпкъэгъухэр юбилярым къыфэгушIуагъэх.Апшъэрэ къэралыгъо IэнатIэхэр зыIыгъхэм яшIуфэс псалъэхэм, мы мафэхэм гущыIэ фабэу тхэкIо цIэрыIом фаIохэрэм адыригъаштэзэ, республикэм и ЛIышъхьэ къызэрэхигъэщыгъэмкIэ, МэщбэшIэ Исхьакъ изэчыйрэ итворчествэрэ ары адыгэ литературэм иклассик зышIыгъэр.КъыфэгушIуагъэхэм, гущыIэ фабэхэр къыфэзыIуагъэхэм тхакIом тхьашъуегъэпсэу ареIо.Лъэпшъыкъо Фатим.