А. Гусев
Мыекъуапэ хабзэ зэрэщыхъугъэу, кушъхьэфачъэхэм атесхэу мыгъи цIыфхэр жъугъэу къызэпэчъагъэх. Кушъхьэфэчъэтесхэм я Дунэе мафэрэ Урысыем и Мафэрэ афэгъэхьыгъэ Iофтхьабзэр Урысыем щыпсэурэ лъэпкъхэм языкIыныгъэ и Илъэс къыдыхэлъытагъэу рагъэкIокIыгъ.
Спорт мэфэкIым изэхэщакIор АР-м физкультурэмрэ спортымрэкIэ и Комитет ары. Урысые политическэ партиеу «Единэ Россием» и Адыгэ шъолъыр къутами ащ IэпыIэгъу къыфэхъугъ.Мыекъуапэ игупчэ урамхэм кушъхьэфэчъэ спортыр зикIэсэ нэбгырэ мини 3 фэдиз къащызэпэчъагъ, ахэм километрэ 18 зикIыхьэгъэ гъогууанэр акIугъ. Адыгеим и ЛIышъхьэу КъумпIыл Мурат, хэбзэ къулыкъухэм, муниципалитетхэм, ныбжьыкIэ, общественнэ движениехэм ялIыкIохэр, Краснодар краим къикIыгъэ хьакIэхэр ахэм ахэтыгъэх.Зэкъошныгъэм игупчэу къызэпэчъэныр зыщаублагъэм кIэлэцIыкIухэм атегъэпсыхьэгъэ зэнэкъокъухэр щыкIуагъэх, творческэ купхэм зыкъыщагъэлъэгъуагъ.«Къызэпэчъэным нэбгыракIэхэри къыхэлэжьагъэх. ЗэхэщакIохэм алъэкI къагъэнагъэп, чIыопсым изытет дэгъугъэ. МэфэкIым зэкIэми гушIуагъорэ гухахъорэ къафихьыгъэу сэгугъэ. Кушъхьэфачъэм тесэу непэ къызэпэчъагъэхэм нэмыкIынэкIэ къалэр алъэгъугъ. Мыщ фэдэ Iофтхьабзэхэм тапэкIэ къэлэдэсхэр зэкIэ къыхэлэжьэнхэу къетэгъэблагъэх», — къыIуагъ КъумпIыл Мурат къэбар жъугъэм иамалхэм яIофышIэхэм адэгущыIэзэ.
Адыгеим и ЛIышъхьэ зэрэхигъэунэфыкIыгъэмкIэ, цIыфхэр жъугъэу зыхэлэжьэрэ спорт Iофтхьабзэхэр зыщызэхащэрэ чIыпIэхэм илъэс къэс къахэхъо зэпыт. Республикэм ипащэ къызэриIуагъэмкIэ, мы охътэ благъэм зыгъэпсэфыгъо мафэхэм пчэдыжьыпэм тефэу, автотранспортым пэрыохъу фэмыхъухэу кушъхьэфачъэкIэ Мыекъуапэ къыщызэпэчъэнхэу рахъухьэ.Къызэпэчъэныр къызаухым Урысые политическэ партиеу «Единэ Россием» ишъолъыр къутамэ хэтхэм атекIуагъэхэм шIухьафтынхэр афагъэшъошагъэх. Ахэр: анахьыкIэхэмкIэ илъэситIу зыныбжь Мирон Леонович, анахьыжъхэмкIэ илъэс 80 зыныбжь Анатолий Зуевыр, нэбгыри 10 зэрыс Денисовхэм яунагъо, кушъхьэфэчъэ анахь гъэшIэгъон тесыгъэ Александр Кесовыр, шъошэ анахь дахэ зыщыгъыгъэ Наталья Пахомовар.