ЩыIакIэрIэр ыфэгъуным пай

Федеральнэ гупчэр IэпыIэгъоу ыкIи АР-м и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат ынаIэ тетэу, 2017-рэ илъэсым къыщегъэжьагъэу программэу «Iэрыфэгъу къэлэ щыIакIэр» зыфиIорэр шIуагъэ хэлъэу Адыгеим щагъэцакIэ.

КъэIогъэн фае, 2025-рэ илъэсым Лъэпкъ проектэу «ЩыIэныгъэм пае инфраструктурэр» зыфиIорэм программэр хагъэхьажьыгъэу мэлажьэ. Къэ­ралыгъо программэр зигукъэкIыгъэр партиеу «Единэ Россиер» ары. ШIуа­гъэу къыхьырэр цIыфхэм зэрэзэхашIагъэм къыхэкIэу партием илъэпкъ программэ зыдэлэжьэрэ лъэныкъо шъхьаIэхэм ар ащыщ хъугъэ.Къыхэгъэщыгъэн фае, къэралыгъом хахъо ышIынымкIэ лъэпкъ программэм партиемкIэ мэхьанэ ин иI, цIыфхэм яшIоигъоныгъэхэм ялъытыгъэу агъэ­псы. Хъытыу нэкIубгъоу «естьрезультат.рф» зыфиIорэмкIэ ахэм яеплъыкIэхэр аугъоих.АдыгеимкIэ лъэпкъ проектэу «ЩыIэныгъэм пае инфраструктурэм» ипрограммэу «Iэрыфэгъу къэлэ щыIакIэр» зыфиIорэм игъэIорышIакIор Джарымэкъо Азмэт. Ащ игъэцэкIэн шъолъырым зыщиублагъэм къыщегъэжьагъэу пIоми хъунэу а лъэныкъом ар дэлажьэ.

— Партием къыздыхэт сиIофшIэ­гъухэм цыхьэ къысфашIи, программэмкIэ гъэIорышIакIоу сагъэнэфагъ. Ащ къы­дыхэлъытагъэу, зэтырагъэпсыхьэрэ чIы­налъэ пэпчъкIэ, яихъухьан къыще­гъэ­жьагъэу, IофшIэнхэр зэрыкIохэрэр ренэу тэуплъэкIух. Джы зыдэлажьэхэрэм ямызакъоу, ыпэкIэ ашIыгъагъэхэри зэдгъэлъэгъунхэу дэкIыгъохэр теIэх. Хэу­къоныгъэу, щыкIагъэу къыхэдгъэщыхэ-рэр дэгъэзыжьыгъэнхэм фэшI, ахэм афэгъэзэгъэ къулыкъухэм къэбар афэтэгъэхьы. Мыщ фэдэ IофшIэнхэр шъо­лъырым зэрэщытэу щызэхэтэщэ, — къы­Iуагъ Джарымэкъо Азмэт.2026-рэ илъэсымкIэ цIыфыбэ зэкIо­лIэрэ чIыпIэхэм язэтегъэпсыхьан пшъэрылъ шъхьаIэу программэмкIэ къэ­нэжьы. Ары нахь мышIэми, къатыбэу зэтет унэхэм ящагухэм ягъэцэкIэжьыни бэхэр къызкIэлъэIурэмэ ащыщ. Партием ипроект фэгъэзагъэхэу къэралыгъом ишъолъыр пстэуми ащылажьэхэрэм ар къыхагъэщы.Ащ елъытыгъэу мы илъэсымкIэ Iоф­шIэнхэр Адыгеим щырахъухьагъэх. ПстэумкIи чIыпIэ 21-рэ мыгъэ респуб­ликэм щызэтырагъэпсыхьащт. А пчъагъэм щыщэу 18-р цIыфыбэ кIуапIэх, 3-р — щагух. Ащ фэшъхьафэу, къэлэ цIыкIухэм азыфагукIэ Урысые зэнэкъо­къум текIоныгъэ къыщыдэзыхыгъэ проектищ мыгъэ агъэцэкIэщт.Ахэр:— Мэздахэ имэзылъэ зыгъэпсэфыпIэ зэтегъэпсыхьан (Iоф­шIэнхэм яя 3-рэ Iахь);— «Зэкъошныгъэм и Гупчэу» псэупIэу Инэм дэтым игъэцэ­кIэжьын ( ур. Сединым ыцIэ зыхьырэм иунэу N 42-р);— «Зэкъошныгъэм ипаркэу» псэу­пIэу Яблоновскэм иIэр.Джащ фэдэу, шхъонтIэгъакIэхэм ягъэ­тIыс­хьанкIэ IофшIэнышхо Адыгеим щэкIо. АР-м и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат иунашъокIэ чъыг минипшI республикэм мыгъэ щагъэ­тIысхьанэу рахъухьэ. Пчъагъэм инахьыбэмэ Мыекъуапэ иурамхэр къагъэдэ­хэщт.— Хэбзэихъухьэхэм, партиеу «Единэ Россием» хэтхэм, къалэм ущыпсэуныр нахьышIу шIыгъэнымкIэ гукъэкIхэм ренэу адырагъаштэ ыкIи ащ фытегъэ­псыхьэгъэ Iофтхьабзэхэм ахэлажьэх. Шъугу къэзгъэкIыжьын, «ЩыIэныгъэм пае инфраструктурэр» зыфиIорэм ипрограммэу «Iэрыфэгъу къэлэ щыIакIэр» зыфиIорэм къыдыхэлъытагъэу 2027-рэ илъэсым агъэкIэжьыщт цIыфыбэ кIопIэ чIыналъэхэм якъыхэхынкIэ онлайн-мэкъэтыныр мэлылъфэгъум и 21-м къыщегъэжьагъэу макIо, — къыхигъэщыгъ Джарымэкъо Азмэт.Онлайн-мэкъэтыныр мэкъуогъум и 12-м нэс кIощт. Илъэс 14 зыныбжьхэм къащегъэжьагъэу ащ хэлэжьэнхэ фитых. Адыгеим ирайониблымэ ыкIи икъэ­литIумэ ячIыналъэхэр ащ хэлажьэх.АдыгэкъалэкIэ: урамэу Пролетарскэм тет кIэлэцIыкIу джэгупIэр, скверэу урам­хэу Пролетарскэмрэ Чайковскэм ыцIэ зыхьырэмрэ атетыр.ИнэмкIэ: къутырхэу Суповскэмрэ Новый Садрэ адэт кIэлэцIыкIу джэгупIэхэр.ЯблоновскэмкIэ: кIэлэцIыкIу спорт площадкэу урамэу Космическэм тетыр, я 15-рэ еджапIэм къыпэIулъ общественнэ чIыналъэр ыкIи урамэу Железнодорожнэм тет площадкэу спортым зыщыпылъхэр.ДжаджэмкIэ: скверэу «Центральнэр» зыфиIоу урамэу Краснэм тетыр (я 2-рэ уцугъор) ыкIи культурэм и Унэу Афанасовым ыцIэ зыхьырэм къыпэIулъ общественнэ чIыпIэр.КощхьаблэкIэ: пчэи мэзцIыкIур ыкIи урамэу Степноим тет кIэлэцIыкIу джэгупIэр.КрасногвардейскэмкIэ: культурэмрэ зыгъэпсэфынымрэкIэ паркыр (я 3-рэ чэзыур) ыкIи район цIыкIоу Черемушкэм тет общественнэ чIыпIэр.Мыекъопэ районымкIэ: псэупIэу Кужорскэм иобщественнэ чIыналъэу Лениным ыцIэ зыхьырэ урамым тетыр ыкIи зэкIэми зэдагъэфедэрэ чIыпIэу спортплощадкэ къыздыхэлъытагъэу Хъы­мыщкIэй иурамэу Советскэм тетыр.Шэуджэн районымкIэ: Хьакурынэхьаблэ игупчэ ыкIи хэушъхьафыкIыгъэ дзэ операцием хэлэжьагъэхэм яскверэу псэупIэу Заревэм дэтыр.Къэралыгъо проектэу «Iэрыфэгъу къэлэ щыIакIэр» зыфиIорэм къыдыхэлъытагъэу чIыпIэ пшIы пчъагъэ Адыгеим щызэтырагъэпсыхьэгъах. БлэкIыгъэ илъэсым имэкъэтынхэм язэфэхьысыжьхэмкIэ, къалэу Мыекъуапэ дэт Свято-Успенскэ кафедральнэ чылысым къыпэ­Iулъ чIыпIэр, къуаджэу БжыхьэкъоякIэ культурэм и Унэу дэтым дэжь щыгъэ­псыгъэ кIэлэцIыкIу джэгупIэр ыкIи кIэлэ­цIыкIу-спорт чIыпIэу Яблоновскэ иIэр мыгъэ зэтырагъэпсыхьэх.Анцокъо Ирин.