Iэшъынэ С.
Унэгъо спорт Iофтхьабзэу «Всей семьей на выходной» зыфиIорэр спорт псэуалъэу «Шэнтыкъо» щыкIуагъ. Ар унагъом и Мафэу хагъэунэфыкIыгъэм къыдыхэлъытэгъагъ.
Республикэм ипсэупIэ зэфэшъхьафмэ къарыкIыгъэ кIэлэцIыкIубэ зэрыс унэгъуи 9 зэнэкъокъум хэлэжьагъ. Ахэм зэкIэм муниципальнэ едзыгъом текIоныгъэ къыщыдахыгъ.Iофтхьабзэм пшъэрылъ шъхьаIэу иIэхэр — унагъом имэхьанэ гъэпытэгъэныр, къыткIэхъухьэрэ лIэужхэм япсауныгъэ зэрар езыхырэ лъэныкъохэр щагъэзыенхэр, шэн-хэбзэ зэхэтыкIэхэм атетэу зекIонхэр.АР-м IофшIэнымкIэ ыкIи социальнэ хэхъоныгъэмкIэ и Министерствэ сабыйхэм, бзылъфыгъэхэм ыкIи унагъом яIофхэмкIэ иотдел ипащэу Саида Стрикачевам шIуфэс гущыIэхэмкIэ къэзэрэугъоигъэхэм закъыфигъэзагъ. КIэлэцIыкIухэм якъэухъумэн и Дунэе мафэкIэ ар къафэгушIуагъ,псауныгъэрэ насыпрэ яIэнэу, унагъо пэпчъ текIоныгъэ къыдихышъунэу къафэлъэIуагъ.Зэнэкъокъур ныбджэгъуныгъэ шапхъэр ыкIи зэдеIэжьыныр къыхэщхэу рекIокIыгъ. Командэ пэпчъ ны-тыхэр ыкIи кIэлэцIыкIуищ хэтыгъ. Ахэр чъэнымкIэ, пкIэнымкIэ, пэрыохъухэр зэпачынхэмкIэ, баскетболымкIэ, нэмыкIхэмкIи зэныкъокъугъэх. Хэти зэрэфэлъэкIэу илъэшыгъэ къыгъэлъэгъуагъ.КIэух зэфэхьысыжьхэм къызэрагъэлъэгъуагъэмкIэ, апэрэ чIыпIэр къыдэзыхыгъэр Теуцожь районым къикIыгъэ Хъот Бислъанрэ Рузанэрэ яунагъоу сабыитф зыщапIурэр ары. ЯтIонэрэ хъугъэ Красногвардейскэ районым щыщ Цэй Руслъанрэ Альбинэрэ яунагъо, зэшъхьэгъусэхэм кIэлищ зэдапIу. Ящэнэрэ чIыпIэр фагъэшъошагъ Митрофановхэу Алексейрэ Людмилэрэ яунагъо. Ахэр Шуэджэн районым къикIыгъэх, кIэлэцIыкIуищ зэдыряI.Анахь къахэщыгъэ унагъом ибысымгуащэу Хъот Рузанэ къызэрэтиIуагъэмкIэ, апэрэп мы зэнэкъокъум яунагъокIэ зэрэхэлажьэхэрэр ыкIи хагъэунэфыкIырэ чIыпIэхэр къызэрэщыдахыгъэр. Лъэшэу игуапэу къыхигъэщыгъ сабыибэ зыщапIурэ унагъохэм къэралыгъом ынаIэ зэратетыр, псауныгъэр зыпсыхьэрэ, унэгъо зэфыщытыкIэхэр зыгъэпытэрэ Iофтхьабзэм хэлэжьэнхэу амал зэряIагъэр.АР-м IофшIэнымкIэ ыкIи социальнэ хэхъоныгъэмкIэ иминистрэ иапэрэ гуадзэу Екатерина Леоновам текIоныгъэ къыдэзыхыгъэхэм щытхъу тхылъхэмрэ сертификатхэмрэ аритыжьыгъэх. Апэрэ чIыпIэр къыдэзыхыгъэм — сомэ мин 50 фагъэшъошагъ, ятIонэрэм — сомэ мин 40, ящэнэрэм — сомэ мин 30 афагъэшъошагъ. Адрэхэм зэрэхэлэжьагъэхэм пае сомэ мин 20 зырыз аратыгъ.Унэгъо-спорт Iофтхьабзэр унагъохэм мэфэкI шъыпкъэ афэхъугъ, ар гукъэкIыжь дахэу яIэщт.IЭШЪЫНЭ Сусан.