СамбэмкIэ Урысыем ичемпионатрэ ипервенствэрэ Адыгеим икъэлэ шъхьаIэ щыкIуагъэх. Зэхэзымыхырэ спортсменхэр ары зызыушэтыгъэхэр. Ахэр къэралыгъом ишъолъыр 23-мэ къарыкIыгъэх, зэкIэмкIи нэбгырэ 80 хъущтыгъэх.
Iофтхьабзэм икъызэIухын фэгъэхьыгъэ мэфэкI зэхахьэм хэлэжьагъэх УФ-м и Къэралыгъо Думэ идепутатэу Хьасанэкъо Мурат, АР-м физическэ культурэмкIэ ыкIи спортымкIэ и Комитет итхьаматэ игуадзэу Андрей Бородиныр, зэхэзымыхыхэрэм яспорт Федерцие и Адыгэ шъолъыр къутамэ ипащэу Виктор Митрий, самбэмкIэ Урысыем ихэшыпыкIыгъэ командэ итренерэу хадзыгъэ Николай Данькевич.
Спортсменхэм ухьазырыныгъэу яIэр къагъэлъэгъуагъ, нэбгырэ пэпчъ текIоныгъэм фэбэнагъ. Ащ дакIоу спортымкIэ анахь мэхьанэшхо зиIэ шъхьэкIэфэныгъэр зэфыряIэу зэбэныгъэх. Адыгэ Республикэм паралимпийскэ ыкIи сурдлимпийскэ резервымкIэ испорт еджапIэ зыщызыгъасэхэрэм дэгъу дэдэу зыкъагъэлъэгъуагъ. Команднэ зэнэкъокъум ящэнэрэ чIыпIэр къыщыдахыгъ. Ащ джыри зэ къыгъэлъэгъуагъ тишъолъыр спортсменхэр зэрифэшъуашэу зэрэщагъэхьазырхэрэр, ащкIэ тренерхэм япшъэрылъхэр щытхъу хэлъэу зэрагъэцакIэхэрэр.Чемпионатым къыдыхэлъытэгъэ зэнэкъокъум республикэм илIыкIохэм медалиплI къыщахьыгъ. СпортымкIэ заслуженнэ мастерэу Беданэкъо Заур текIоныгъэр къыдихыгъ. Ар зыгъасэрэр ятэу, зэлъашIэрэ тренерэу Беданэкъо Байзэт. Джащ фэдэу Инна Кибиткинам дышъэ медаль къыхьыгъ, ащи итренерыр Беданэкъо Байзэт.Урысыем ипервенстви тиспортсменхэм дэгъу дэдэу зыкъыщагъэлъэгъуагъ. Беданэкъо Заур ыгъэсэхэрэ Арсен Зениным апэрэ чIыпIэр, Тимур Маремшаевым ящэнэрэр къафагъэшъошагъ.Команднэ зэнэкъокъухэр пштэмэ, Урысыем ипервенствэ Адыгеим ящэнэрэ чIыпIэр щиубытыгъ. Ащ ыпэ ишъыгъэх ятIонэрэ хъугъэ Дагъыстан Республикэмрэ пэрытныгъэр зыубытыгъэ Челябинскэ хэкумрэ.Урысые спорт фондым иIэпыIэгъукIэ зэнэкъокъухэр рагъэкIокIыгъэх.