Тэхъутэмыкъое чIыпIэ коим иадминистрацие ипащэрэ АР-м и Къэралыгъо Совет — Хасэм идепутатэу Джастэ Вячеславрэ яшIухьафтынхэр зэрылъ урым-рим бэнэнымкIэ зэнэкъокъухэр мы мафэхэм зэхащагъэх. Москва, Краснодар краим, Адыгэ Республикэм яспортсмени 120-рэ ащ хэлэжьагъ.
Олимпийскэ резервым икIэлэцIыкIу-спорт еджапIэу N 3-м зыщызыгъасэхэрэр зэнэкъокъум хэлэжьагъэх. Урым-рим бэнэнымкIэ тренерэу, мы спорт лъэпкъымкIэ мастерэу Асэкъалэ Бислъан къызэриIуагъэмкIэ, спортсменэу къекIолIагъэхэм гъэхьазырыныгъэ дэгъу къагъэлъэгъуагъ. КIуачIэу, къулайныгъэу ахэлъымкIэ ныбжьыкIэхэм заушэтыгъ. 2014 — 2015-рэ илъэсхэм къэхъугъэхэм язэнэкъокъу текIоныгъэр къыщыдихыгъ Нэхэе Бислъан, ятIонэрэ хъугъэ Артур Пойтян, ящэнэрэ чIыпIэр нэбгыритIумэ зэдагощыгъ — Лев Пироевымрэ Сэхъутэ Айдаррэ.— КIалэхэр яшъыпкъэу зэнэкъокъугъэх, уалъыплъэнкIэ гъэшIэгъоныгъэ. ГущыIэм пае, Лев Пироевым Краснодар ыкIи Тэхъутэмыкъуае ащыкIогъэ зэнэкъокъухэм апэрэ чIыпIэр къащыдихыгъэмэ, джы Нэхаир апэрэ хъугъэ, Пироевыр я 3-рэ. Джащ фэдэу жъоныгъуакIэм и 29 — 31-м шъолъыр зэфэшъхьафхэм къарыкIыгъэ спортсменхэр зыхэлэжьэгъэхэ зэнэкъокъоу Налщык щыкIуагъэм Нэхэе Бислъан я 2-рэ чIыпIэр къыщыдихыгъ. Джащ фэдэу турнир инхэм тикIэлакIэхэм хагъэунэфыкIырэ чIыпIэхэр къащыдахых, ахэм тарэгушхо, — къыIуагъ тренерэу Асэкъалэ Бислъан.Республикэм испортсменхэу мы зэнэкъокъухэм анахьэу къащыхэщыгъэхэр ыкIи ухьазырыныгъэ дэгъу къэзыгъэлъэгъуагъэхэр — Тырку Азэмат, Константин Цахиловыр, ЯхъулIэ Муслъим, Мамый Дамир ыкIи Халид Раджабовар.