М. Гордышов
Стратегическэ гухэлъхэмкIэ Агентствэм УФ-м ишъолъырхэм инвесторхэр къегъэблэгъэгъэнхэмкIэ яIофхэм язытет зызэрегъапшэм, кIэухэу фэхъугъэр Дунэе экономическэ форумэу Санкт-Петербург щыкIорэм къыщызэфихьысыжьыгъ. Бизнесым IофшIэкIэ амал тэрэзхэр етыгъэнхэм фытегъэпсыхьагъэу шъолъыр хэбзэ къулыкъухэм зэшIуахыхэрэм ащ тетэу илъэс къэс уасэ фашIы, анахь дэгъухэр къыхахых. Адыгеир мыгъэ я 19-рэ хъугъэ, шъолъыр 20-у пэрытныгъэр зыубытыгъэхэм ахэфагъ.
АР-м и ЛIышъхьэу КъумпIыл Мурат къызэрэхигъэщыгъэмкIэ, бизнес цIыкIум ыкIи гурытым административнэ пэрыохъоу иIэр нахь макIэ шIыгъэным ыкIи IэпыIэгъу фэхъугъэным шъолъыр хэбзэ къулыкъухэм Iофэу дашIэрэр ащ къегъэлъагъо. Ащ фытегъэпсыхьагъэу федеральнэ ыкIи шъолъыр IэпыIэгъу зэфэшъхьафхэр Адыгеим щыпхыращы.ГущыIэм пае, бизнес цIыкIум ыкIи гурытым щылажьэхэрэм апае щыIэх чIыфэ цIыкIухэр (микрозайм), гарантие зыпылъ IэпыIэгъухэр, мэкъумэщ хъызмэтшIэпIэ цIыкIухэм хэушъхьафыкIыгъэу адеIэх. Джащ фэдэу Урысыем къыщашIыгъэ оборудование къэзыщэфыгъэхэм ащ пэIуагъэхьагъэм ипроцент 50 къыфырагъэгъэзэжьы. «Мой бизнес» зыфиIорэ Гупчэм илъэсищым фэIо-фашIэу мини 8 фэдиз ыгъэцэкIагъ.
«УФ-м и Президентэу Владимир Путиным шъолъырыр инвесторхэмкIэ нахь хъопсагъо шIыгъэным ылъэныкъокIэ IэпыIэгъушхо къызэрэтитырэм фэшI тызэрэфэразэр етэIо. Инвесторхэм зыпкъитыныгъэрэ неущырэ мафэмкIэ гугъапIэрэ республикэм зэрилъхэр зэхашIэн фае. Ащ фэшI федеральнэ IэпыIэгъур дгъэфедэзэ, бизнесым иIофшIэн нахь къызэрыкIо фэтшIыгъ, непэрэ лъэхъаным ишапхъэхэм адиштэрэ инфраструктурэр дгъэпсыгъэ. Инвестициехэр нахьыбэу къыхэлъхьагъэ хъунхэм ищыкIэгъэ амалхэм ягъэпсын пае къэралыгъо программэхэр, лъэпкъ проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэр, «Единэ Россием» ипрограммэхэр тэгъэфедэх. ТапэкIи хэгъэгум итехнологическэ суверенитет игъэпытэн фытегъэпсыхьэгъэ пшъэрылъэу Президентым къытфишIыгъэхэм ягъэцэкIэн лъыдгъэкIотэщт», — къыIуагъ КъумпIыл Мурат.Стратегическэ гухэлъхэмкIэ Агентствэм бизнесым Iоф зэришIэрэ лъэныкъо пстэоу, инвесторхэм якъегъэблэгъэн фэгъэзэгъэ шъолъыр командэхэм яIофшIэн зэрэзэхэщагъэм епхыгъэр зэкIэ къызэлъиубытызэ зэрегъапшэх. Ащ ипащэу Светлана Чупшевам къызэриIуагъэмкIэ, инвесторым шъолъырым щикIурэ гъогур къэзыгъэлъэгъорэ лъэныкъохэм блэкIыгъэ илъэсым къахэхъуагъ. Рейтингыр лъэныкъуи 8 зэрэзэхагъэуцуагъэр.
Экспертхэм къызэрэхагъэщырэмкIэ, инвесторхэм Iоф ашIэнэу фитыныгъэ къэзытырэ тхылъхэм ягъэхьазырын, хъызмэтшIапIэхэр гъэстыныпхъэ шхъуантIэм, электричествэм, инфраструктурэм япхыгъэ псэуалъэхэм зэрапашIэщтхэм уахътэу пэIухьэрэр хэпшIыкIэу нахь макIэ шъолъырхэм ашIыгъ, административнэ пэрыохъур къеIыхыгъ, лъыплъэн-уплъэкIун Iофтхьабзэхэм къащагъэкIагъ. Инвесторхэм агъэпсырэ хъызмэтшIапIэхэм Iоф ащызышIэщтхэр къафэгъотыгъэнхэм анаIэ нахь тырагъэтынэу пшъэрылъ къафашIыгъ.Культурнэ кIэным хэхьэрэ псэуалъэхэр экономикэм шIуагъэ къыфахьынэу шIыгъэнхэм ылъэныкъокIэ шъолъырхэм Iофэу ашIэрэми уасэ джы фашIыщт. Ар Урысыем и Президент пшъэрылъэу къышIыгъэхэм ащыщ.КъумпIыл Мурат культурнэ кIэным икъызэтегъэнэн, Президентым пшъэрылъэу къыгъэуцугъэхэм ягъэцэкIэн ыкIи мы лъэныкъомкIэ къэралыгъо политикэр пхырыщыгъэным мэхьанэшхо зэряIэм къыкIигъэтхъыгъ.Шъугу къэдгъэкIыжьын, Мыекъопэ къэлэ администрацием итарихъ унэ игъэцэкIэжьын джырэблагъэ аухыгъ. Ащ ыпэкIэ Пушкиным ыцIэкIэ щыт унэр, концертхэр зыщызэхащэрэ залэу «Налмэсыр», Гупчэ почтэр зычIэтыр, медицинэ колледжыр, «пчыхьэ» еджапIэр, «водолечебницэщтыгъэр», «Адыгеим иныбжьыкIэхэр» зыфиIорэ Гупчэр зычIэтыр агъэкIэжьыгъэх.Джыри культурнэ кIэным хэхьэрэ псэуалъэу сатыушIэу Терзиевым и Унэ игъэцэкIэжьын ищыкIэгъэ тхылъхэм ягъэхьазырын ыуж итых. Ащ инвестор къырагъэблэгъэщт. Джащ фэдэу хьакIэщэу «Адыгея» зыфиIорэм игъэкIэжьын инвесторым еухы, ыпэкIэ унэм теплъэу иIагъэр ащ къызэтыригъэнагъ.Ащ ыпэкIэ шъолъырым ипащэ архитектурэм исаугъэтхэм ахэмыхьэхэу, ау къалэр зыщагъэпсыгъэ уахътэм ашIыгъэгъэ унэу зэтебгъэуцожьын ыкIи бизнесым щыбгъэфедэн плъэкIыщтхэм язытет ауплъэкIунэу къэлэ администрацием пшъэрылъ фишIыгъ. Непэ ащ фэдэу Мыекъуапэ псэолъэ 40-м ехъу дэт. Культурнэ кIэным хэхьэрэ псэуалъэу республикэм итыр зэкIэмкIи мини 4,4-рэ мэхъу. Ахэм язытет, зэраIыгъыхэм, къызэрэзэтырагъанэхэрэм, зэрагъэфедэхэрэм лъэплъэх.«Тарихъ бай зиIэ тиреспубликэкIэ культурнэ кIэным икъызэтегъэнэн игъо дэдэу щыт. Хэхъоныгъэ тшIэу, проектыкIэхэм тягупшысэми, титарихъ къыткIэхъухьэхэрэм алъыдгъэIэсыжьыным фэшI лъытэныгъэ фэтшIын фае. Ар тимурадэу тарихъ унэхэр зэтетэгъэуцожьых, экономикэм ахэр фэтэгъэIорышIэх. Ащ пае шъолъыр ыкIи федеральнэ программэхэр тэгъэфедэх, инвесторхэр къетэгъэблагъэх», — къыхигъэщыгъ КъумпIыл Мурат.Адыгэ Республикэм и ЛIышъхьэ ипресс-къулыкъукъытырэ къэбархэмкIэХъут Нэфсэт.