ШхончыбэшIэ С. ихъарзынэщ
Социальнэ IофышIэхэм мафэ къэс ягукIэгъурэ яфэбагъэрэ цIыфхэм апагъохы, дунаир нахьышIу, нахь дахэ ашIы. Ахэм ягущыIэ фабэхэмкIэ, IэпыIэгъоу аратырэмкIэ чIыпIэ къин ифагъэхэм агу къаIэты.
МэфэкIым ехъулIэу социальнэ фэIо-фашIэхэр зыгъэцэкIэрэ отделениеу Красногвардейскэ районым ит къуаджэу Джамбэчые щыIэм ипащэу ШхончыбэшIэ Светланэ гущыIэгъу тыфэхъугъ. Ар социальнэ IофышIэу зылажьэрэр илъэс 37-рэ хъугъэ. Мы сэнэхьатыр къыхихыным лъапсэ фэхъугъэр къедгъэIотагъ.— СицIыкIугъом къыщегъэжьагъэу лъэкI зимыIэхэм, сымаджэхэм сишIуагъэ язгъэкIыныр сыгу рихьыщтыгъ. Социальнэ IофшIэныр къызэрэхэсхыгъэм зы мафи сырыкIэгъожьэу къыхэкIыгъэп. Ар къыспэблагъ, сыгу рехьы, къыздэхъу. Илъэс пчъагъэхэм къакIоцI нэжъ-Iужъхэр сигупсэм фэдэ хъугъэх. Шъхьэзакъоу псэухэрэм гущыIэгъу сафэхъу. Арышъ, щыIэныгъэ гъогоу къакIугъэм сыщыгъуаз, ягукъауи ягушIуагъуи къыздагощы. Джырэ уахътэм отделением сырипащэу Iоф сэшIэ, — къеIуатэ Светланэ.
Мы сэнэхьатым урылэжьэным щэIэгъэшхо ищыкIагъ. Хэти къекIущтыр пшIэн, екIолIакIэ къыфэбгъотын фае. Ар къызэрадэхъурэмкIэ тигущыIэгъу теупчIыгъ.— ПшъэдэкIыжьышхо зыпылъ IофшIэн къин тэгъэцакIэ. Анахьэу тынаIэ зытедгъэтырэр нэжъ-Iужъхэу социальнэ IэпыIэгъу зищыкIагъэхэм тишIуагъэ ядгъэкIыныр ары. Мы мафэм ехъулIэу социальнэ IофышIи 10 тиотделение щэлажьэ. Ахэм IэпэIэсэныгъэшхо аIэкIэлъ. Гуфэбэныгъэр, гукIэгъур, щэIагъэр, хъупхъагъэр — мыхэр ары социальнэ IофышIэм инэшэнэ шъхьаIэхэр, — еIо Светланэ.Социальнэ IэпыIэгъу зэрагъэгъотырэ цIыфхэм мазэм зэ зэраIукIэрэр тигущыIэгъу къыхигъэщыгъ.— Социальнэ фэIо-фашIэхэм ягъэцэкIэн епхыгъэ хэбзэгъэуцугъэр тымыукъоу тиIофшIэн тэгъэцакIэ. Унагъохэр къэтэкIухьэх, пшъэрылъхэр гъэцэкIагъэхэ зэрэхъурэр тэуплъэкIу. ТиIофышIэ бзылъфыгъэмэ сарэгушхо, ахэм ацIэ дэйкIэ рагъэIуагъэу зэхэпхыщтэп. Зыныбжь хэкIотагъэхэм ящыкIэгъэ Iэзэгъу уцхэр, гъомылапхъэхэр афахьы, коммунальнэ фэIо-фашIэхэм апкIэ афа-ты, унэхэр къафызэIуахы, — еIо ШхончыбэшIэ Светланэ.Светланэ иIофшIэн республикэми, къэралыгъоми осэшIу къыфашIыгъ, щытхъу ыкIи рэзэныгъэ тхылъхэмкIэ, шIухьафтынхэмкIэ пчъагъэрэ къыхагъэщыгъ.Къэралыгъом хэхъоныгъэ ышIынымкIэ социальнэ IофышIэм ипшъэрылъхэр зэригъэцакIэрэм мэхьанэшхо иI. Ар чIыпIэ зэжъу ифагъэхэм адеIэ, ишIуагъэ арегъэкIы. Мы сэнэхьатым рылажьэхэ-рэм ящытхъу пIоныр атефэ.Лъэпшъыкъо Фатим.