Щэбзэ щэрыонымкIэ Адыгеим спортымкIэ мастер иIэ хъугъэ. Ар къызфагъэшъошагъэр олимпийскэ резервым испорт еджапIэу Владимир Максимовым ыцIэ зыхьырэм зыщызыгъэсэрэ Иван Лемешевыр ары. Мыщ фэгъэхьыгъэ унашъом кIэтхэжьыгъ УФ-м спортымкIэ и Министерствэ ипащэ.
Иван Лемешевым IэпэIэсэныгъэшхоу хэлъым, къэгъэлъэгъон дэгъоу иIэхэм ар къакIэлъыкIуагъ. 2025-рэ илъэсым шэкIогъум къалэу Великие Луки щыкIогъэ зэнэкъокъоу «Надежды России» зыфиIорэм мы цIэр къыфагъэшъошэнымкIэ фитыныгъэ къыщыдихыгъагъ. Ащ иапэрэ едзыгъо тиспортсмен очко 579-рэ щыригъэкъугъ ыкIи апэрэ чIыпIэр къыщыдихыгъ.Спортсмен ныбжьыкIэм итренерхэу спортымкIэ мастерэу Александр Баламутовымрэ Урысыем спортымкIэ изаслуженнэ мастерэу Светлана Баранцевамрэ къызэрэхагъэщырэмкIэ, Иван сыд фэдэ чIыпIэ къин ифагъэми, рэхьатэу, зышъэ итэу мэзекIо, ащ ишIуагъэкIэ къэгъэлъэгъон дэгъухэр иIэх. Ежь спортсменым пшъэрылъ шъхьаIэу зыфигъэуцужьырэр 2028-рэ илъэсым Лос-Анджелес щызэхащэщт зэнэкъокъухэм ахэлэжьэныр ары.