Теннис цIыкIумкIэ зэнэкъокъоу Апшеронскэ районым икъутырэу Николаенкэм щыкIуагъэм тиспортсменхэм хагъэунэфыкIырэ чIыпIих къыщыдахыгъ. Мыекъуапэ, Шытхьалэ, Апшеронскэ, Хъыдыжъ, Псыфабэ, Лабинск, станицэу Тбилисскэм ялIыкIохэм заушэтыгъ.
Лигэу «Предгорье Кубани» зыфиIорэм хэтхэр яIэпэIэсэныгъэкIэ зэтеутыгъэх, нэмыкIкIэ зэхэдз щыIэп. Ящэнэрэ лигэм Нэгъэрэкъо Миланэ тыжьын медаль къыщихьыгъ, кIэух едзыгъом ащ къытекIуагъ Шытхьалэ къэзыгъэлъэгъогъэ Богдан Гоголь. ЯтIонэрэ лигэм Вероника Ивановам дышъэ медаль къыщыдихыгъ, Арина Петровскэр ятIонэрэ хъугъэ, Владимир Скобелевым джэрз медаль къыфагъэшъошагъ. Нэбгырищыми Мыекъуапэ къагъэлъагъо. Апшъэрэ лигэм спортсмен анахь лъэшхэр хэтых. КIэух едзыгъом щызэIукIагъэх республикэм икъэлэ шъхьаIэ илIыкIохэр. Александр Воронцовым текIоныгъэр къыдихыгъ, Дмитрий Гончаровым ятIонэрэ чIыпIэр фагъэшъошагъ.Лигэу «Предгорье Кубани» зыфиIорэр едзыгъуиплI мэхъу. Ящэнэрэр шышъхьэIум ыкIэм рагъэкIокIыщт. Зэфэхьысыжьхэм ялъытыгъэу анахь лъэшхэр къэнэфэщтых, ахэм кубокхэр, медальхэр афагъэшъошэщтых.