Тыгъуасэ гурыт еджапIэр къэзыухырэ ныбжьыкIэхэм апэрэ шIокI зимыIэ ушэтынэу урысыбзэр атыгъ.
Аттестатыр къаратыжьыным пае урысыбзэмкIэ ушэтыныр зэратын фаем имызакъоу, апшъэрэ еджапIэ пэпчъ мы предметым изэфэхьысыжьхэр епхьылIэн фае.АР-м и Къэралыгъо аттестационнэ къулыкъу къызэрэщытаIуагъэмкIэ, республикэмкIэ нэбгырэ 2082-мэ тыгъуасэ заушэтыгъ. Ушэтынхэр зыщатырэ чIыпIэ 11-мэ мы мафэм зыпкъ итэу, рэхьатэу Iоф ашIагъ.УрысыбзэмкIэ ушэтыныр сыхьатищрэ ныкъорэ кIуагъэ. Тест шIыкIэм тетэу IофшIэнэу агъэцэкIагъэхэм анэмыкIэу сочинение атхыгъ. Аттестатыр къаратыжьыным пае анахь макIэу балл 24-рэ къахьын фаер, ау апшъэрэ еджапIэ пэпчъ узэрэчIэхьан плъэкIыщт баллыр ежь егъэнафэ.Мыекъопэ лицееу N 8-м ушэтыныр зэрэщыкIорэр зэдгъэлъэгъунэу тыщыIагъ. БлэкIыгъэ илъэсхэм ялъытыгъэмэ, ныбжьыкIэхэм нахь рэхьатныгъэ ахэлъэу, мыщынэхэу шIэныгъэу аIэкIэлъыр къагъэлъэгъоным фэхьазырыгъэх.Ушэтыныр зытыщтхэм ятхылъхэр ауплъэкIухэзэ, зырызэу чIагъэхьагъэх. Шапхъэхэм къызэрэдалъытэрэмкIэ, къэлэмым нэмыкIэу псы ахэм аIыгъын фит, ау ащ тегъэпкIэгъэ тхылъыпIэхэр тетхъыгъэнхэ фае, сыда пIомэ тхьапэм ушэтынымкIэ агъэфедэн алъэкIыщтхэр тыратхэнхэ алъэкIынэу агъэунэфыгъагъ.— Зэтыгъо къэралыгъо ушэтыныр зэрифэшъуашэу, шъыпкъагъэ хэлъэу зэрэкIощтым тынаIэ тет. БлэкIыгъэ илъэсхэм ябгъапшэмэ, еджапIэр къэзыухыхэрэр нахь рэхьатых, шапхъэхэм адимыштэу зекIон мурад зиIэ тлъэгъурэп. КIэлэеджакIохэр аудиторием чIэхьагъэх, рамыгъажьэзэ шапхъэу агъэцэкIэн фаехэр къафаIотагъэх. Сыхьатыр 10-м къэралыгъо ушэтын комиссием хэтхэр щытхэу IофшIэнхэр къыдагъэкIыгъэх ыкIи ахэр афагощых, — къыIуагъ пунктым ипащэ.Лицеим мы мафэм нэбгыри 177-мэ зыщаушэтыгъ. ЗэкIэмкIи класс 13-мэ еджапIэр къэзыухыхэрэр ачIэсыгъэх, зы аудиторием зипсауныгъэкIэ илэгъухэм акIэмыхьэрэ ныбжьыкIэм зыщиушэтыгъ. Общественнэ лъыплъакIом хэушъхьафыкIыгъэ чIыпIэ иIэу, онлайн шIыкIэм тетэу ушэтыным лъыплъагъ, унэе кабинетым ылъэгъурэр зэкIэ ритхагъ. Мыгъэ ар апэрэу къыхагъэхьагъ. ЫпэкIэ ащ къыкIухьэзэ тхьапэм тыритхэщтыгъ.Мы илъэсым ушэтыным изэхэщэн зэхъокIыныгъэ фэхъугъэп, ау гъэцэкIэжьынхэм шапхъэу апылъхэр зэблахъугъэх. ГущыIэм пае, сочинением джы гущыIи 150-м нахь макIэ хэты хъущтэп, ар изымыгъэкъухэрэм баллэу «0» афагъэуцущт.Ушэтыным изэфэхьысыжьхэр мэкъуогъум и 18-м къэлъэгъощтых. Ар зыфэмытыгъэхэр ыкIи ушъхьагъу зэфэшъхьафхэм апкъ къикIыкIэ емыкIолIэшъугъэхэм апае IэпэчIэгъэнэ мафэхэр агъэнэфагъэх, мэкъуогъум и 22-м е 24 — 25-м атыжьын алъэкIыщт. ПIэлъэ шъхьаIэм ушэтынхэр зыфэмытыгъэхэм Iоныгъом и 4-м е и 25-м атыжьын алъэкIыщт.ШIокI зимыIэ ушэтынэу хьисапыр мэкъуогъум и 8-м атыщт.ДЕЛЭКЪО Анет.